1 Siyagangngarè tau polè ri Yudèa lao ri Antiokhia sibawa paggurui sining tau mateppe'è ri Antiokhiaro kuwammengngi rèkko dè' mennang narisunna' situru parènta-parèntana Allataala iya nappagguruwangngè Musa, dè' nawedding mennang ripassalama'. 2 Paulus sibawa Barnabas naèwa senna'i pallolongenna sining tauwèro. Angkanna ripattentui kuwammengngi Paulus sibawa Barnabas silaong siyagangngarè tau laing polè ri Antiokhia lao ri Yèrusalèm untu' bicarai iyaro passalengngè sibawa rasul-rasul-è enrengngè sining pamimpingngè kuwaro. 3 Jema'è ri Antiokhia mantara'i mennang lettu ri saliweng kota, nanajoppa mennang lalo Fènèsia sibawa Samaria. Kuwaniro mennang maccurita pèkkugi sining tau bangsa laingngè tenniyaè Yahudi mabbèrèyangngi alèna lao ri Allataala. Iyaro birittaè napurennu senna'ni sining tau iya mateppe'è kuwaro. 4 Wettunna mennang lettu ri Yèrusalèm, ritarimani sibawa madècèng ri jema'è, sibawa ri rasul-rasul-è enrengngè sining pamimpingngè. Nainappa mennang maccurita lao risining tauwèro passalenna sininna iya puraè napogau' Allataala naolai mennang. 5 Iyakiya siyagangngarè tau polè ri golongang Farisiè iya mateppe'ènnaro tettongngi sibawa makkeda, "Sining bangsa laingngè iya mateppe'ènnaro harusu'i risunna sibawa riwajibkang maccowèriwi parènta-parèntana Allataala iya napalettu'è Musa. " 6 Nainappa iyaro rasul-rasul-è sibawa sining pamimpingngè maddeppungeng untu' bicarai passalengngèro. 7 Maitta senna' mennang sipabbicara. Angkanna Pètrus tettong sibawa makkeda, "Saudara-saudara! Alèmuna missengngi makkedaè siyagangngarè wettu labe'è Allataala pilèka polè ri yelle'mu untu' mabbirittangngi iyaro Karèba Madècèngngè lao risining tau bangsa laingngè tenniyaè Yahudi, kuwammengngi naèngkalinga towi namateppe'na. 8 Na Allataala iya missengngèngngi atinna tolinoè pura majjellokengngi makkedaè natarimai mennang; najjellokengngi gau'èro sibawa nabbèrèyangngi lao ri mennang Rohna Allataala pada-pada iya puraè Nabbèrèyang lao ri idi. 9 Allataala dè' napasilaingekki sibawa mennang. Napaccingiwi atinna mennang, nasaba mateppe'ki. 10 Aga saba'na mumaèlo mèwai Allataala makkekkuwangngè sibawa mpèrèngngi sèuwa kewajibang matane'è lao risining tau maccowèèwè, padahal nènè-nènèta sibawa idi dè'to nariyullèi pogau'i? 11 Sibalè'na, mateppe'ki makkedaè ripassalama'ki nasaba paressè babuwana Puwang Yèsus; makkuwatoro mennang. " 12 Mammekko manenni tau maddeppungengngè kuwaro. Nainappa naèngkalinga mennang Barnabas sibawa Paulus curitai paimeng sininna anu makalallaingngè sibawa gau'-gau' dè'è padanna iya puraè napogau' Allataala naolai mennang ri yelle'na sining tau bangsa laing tenniyaè Yahudi. 13 Pajanana mennang mabbicara, makkedani Yakobus, "Saudara-saudara! Coba mèngkalingai! 14 Silalona Simon napakatajang pèkkugi Allataala ri pammulanna mappaitangngi perhatian-Na lao risining bangsa laing tenniyaè Yahudi, akkattana pilèi polè ri mennang sining tau laingngè iya maèloè mancaji umma'-Na. 15 Situru iyaro puraè naboto nabi-nabiè. Nasaba engka taroki makkuwaèwè, 16 'Purairo maèlo-Ka polèsi, ' adanna Puwangngè, 'Maèlo-Ka patettongngi paimeng bolana Daud iya maruttungngènna, sibawa pèdècèngiwi aruttungenna, nainappa patettongngi paimeng; 17 kuwammengngi sininna tau iya nasèsaèro nasappai Puwangngè, silaong sininna bangsa laingngè iya tenniyaè Yahudi iya puraè Uwobbi mancaji appunnangek-Ku. ' 18 Makkuwaniro ada-adanna Puwangngè, iya puraè mappaddissengengngi gau'èro riyolopa nariyolo. " 19 Nakkeda Yakobus, "Jaji manuru' pallolongekku, dè' tawedding sussaiwi sining tau bangsa laingngè iya tenniyaè Yahudiro iya mabbèrèyangngèngngi alèna lao ri Allataala. 20 Iyakiya harusu'ki moki sure' lao ri mennang sibawa pangajariwi kuwammengngi aja' mennang nanrè anrè najisi'è iya puraè riyakkasuwiyangeng lao ri barahalaè, iyarè'ga manrè juku olokolo iya matè riyanrekkè'è, iyarè'ga manrè dara. Sibawato kuwammengngi napabèlaiwi alèna polè risining pangkaukeng malawengngè. 21 Saba' hukkunna Musa riyolopa nariyolo naribacangeng tungke' esso Saba' risining bola assompangngè, sibawa riyabbirittang ri sininna kotaè. " 22 Napettuini rasul-rasul-è sibawa sining pamimpingngè, silaong sininna anggota jema'èro untu' pilè siyagangngarè tau polè ri mennang iya maèloè risuro lao ri Antiokhia silaong Paulus sibawa Barnabas. Napilèni mennang Silas sibawa Yudas iya riyasengngètto Barsabas. Iya duwa tauwèwè iyanaritu sining tomariyolo ri yelle'na sining tau mateppe'è ri Yèrusalèm. 23 Silaongngi iyaro sining suroè kiring toni mennang sure' iya makkuwaè oninna, "Lao ri sininna saudara-saudara iya assalennaè polè ri bangsa-bangsa laing tenniyaè Yahudi, iya monroè ri Antiokhia, Siria sibawa Kilikia. Selletta idi, rasul-rasul-è sibawa sining pamimpingngè, iyanaritu saudara-saudaramu. 24 Riyèngkalingai engka siyagangngarè polè ri yelle'ta iya laoènna ri iko sibawa makkacau enrengngè pakamaling-malikko sibawa sining pappagguruwanna. Padahal tenniya idi suroi mennang pogau'i iyaro. 25 Iyanaro saba'na napuraki barunding nanasitujui manenni untu' mappilè siyagangngarè tau sibawa suroi mennang lao ri iko. Maèloi lao mennang silaong Saudara Barnabas sibawa Paulus iya riyamasèiyè. 26 Iya duwa tauwèwè iyanaritu sining tau iya puraè mappèsonangngi nyawana nasaba Puwatta Yèsus Kristus. 27 Jaji, risuroi Yudas sibawa Silas lao ri Saudara-saudara. Alèna ritu mennang palettu'i matu lao ri iko biritta iya tarokiè ri laleng sure'èwè. 28 Nasitujuini Rohna Allataala -- na idi risitujui toni -- kuwammengngi nadè' nariwè rèkko kewajibang-kewajibang iya lebbi matane'è naiya kewajibang-kewajibang iya parelluwè bawang: 29 aja' muwanrèi nanrè puraè riyakkasuwiyangeng lao ri barahalaè; aja' muwanrèi juku olokolo iya matè riyanrekkè'è, sibawa abèlaiwi sining pangkaukeng malawengngè. Narèkko mupabèlaiwi alèmu polè risining gau'èro, mupogau'nitu iya madècèngngè. Sikumiro bawang, salama'!" 30 Puranana siyassimangeng, joppani iyaro risuroè lao ri Antiokhia. Naobbini mennang kuwaro sininna anggota jema'è maddeppungeng nainappa napalettu sure'èro. 31 Wettunna iyaro anggota-anggota jema'è nabaca iyaro sure'è, masennang senna'ni mennang ri lise'na iyaro sure'è iya salèworiyèngngi atinna mennang. 32 Yudas sibawa Silas, iya nabiètto, maitta mabbicara sibawa iyaro saudara-saudara iya mateppe'è ri Antiokhia untu' mpèrèngngi dorongang sibawa abaraningeng lao ri mennang. 33 Puranana Yudas sibawa Silas monro kuwaro siyagangngarè ittana, iyaro sining tau mateppe'è ri Antiokhia nakirinni mennang lisu sibawa suroi mennang palettu' selleng lao risining tau iya suroèngngi mennang. [ 34 Iyakiya Silas napettuiwi untu' tette' monro ri Antiokhia. ] 35 Paulus sibawa Barnabas monro towi siyagangngarè ittana ri Antiokhia. Kuwaniro mennang mappagguru sibawa mabbirittangngi ada-adanna Puwangngè silaong maèga tau laing. 36 Dè' namaitta ri munrinna makkedai Paulus lao ri Barnabas, "Laono mai talisu mitai saudara-saudara iya mateppe'è ri Yèsus ri sininna kota puraè ribirittaiyang ada-adanna Puwangngè; kuwammengngi nariita pèkkugi keadaanna mennang. " 37 Macinnai Barnabas tiwii Yohanès Markus, 38 iyakiya napèrasai Paulus dè' namakessing ritiwi Markus, iya dè'è namaèlo majjama silaong mennang sibawa nasalaiwi mennang ri Pamfilia. 39 Nappangèwang ladde'na Paulus sibawa Barnabas angkanna mennang massarang: Barnabas nalani Markus nasompe silaong lao ri Siprus. 40 Paulus napilèi Silas nainappa joppa silaong puranana saudara-saudaraè ri Antiokhia mabbèrèyangngi mennang lao ri pammasèna Puwangngè. 41 Nattulilingini mennang Siria sibawa Kilikia; kuwaniro mennang pakkasse'i jema'-jema'è.
