1 Ri laleng jema'è ri Antiokhia engka nabi-nabi sibawa guru-guru, iyanaritu Barnabas, Simèon iya ritellangngè Si Bolong, Lukius polè ri Kirènè, Menahèm iya ripawekke'è silaong Arung Hèrodès, sibawa Saulus. 2 Wettunna mennang massompa lao ri Puwangngè sibawa mappuwasa, makkedani Rohna Allataala lao ri mennang, "Pilèi Barnabas sibawa Saulus untu' Iyya, kuwammengngi napogau'i mennang jamang iya puraè Upattentungengngi mennang. " 3 Puranana mappuwasa sibawa massempajang napalènne'ni mennang limanna ri yasè'na Barnabas sibawa Saulus nainappa nakiring sipadduwa. 4 Nasaba rikiringngi ri Rohna Allataala, joppani Barnabas sibawa Saulus lao ri Selèukia. Polè kuwaro sompe'ni mennang lao ri pulo Siprus. 5 Wettunna lettu ri Salamis, nabbirittanni mennang ada-adanna Allataala risining bola assompang Yahudiè. Yohanès Markus bantui mennang ri laleng allalengenna. 6 Najalajja'ni mennang sininna puloèro lettu ri Pafos. Siruntu'ni mennang kuwaro sèddi tau Yahudi, asenna Bar Yèsus. Sèddiwi passèhèrè' iya mangakuè nabi. 7 Sergius Paulus, gubernurna puloèro iyanaritu sellao marèppè'na iyaro passèhèrè'è. Iyaro gubernur-è sèddiwi tau macca namapanrè. Purai naobbi Barnabas sibawa Saulus saba' macinnai mèngkalingai ada-adanna Allataala. 8 Iyakiya riyèwai Barnabas sibawa Saulus ri Elimas passèhèrè'èro, nasaba Elimas (iyaro asenna ri laleng basa Yunani) makkuragai kuwammengngi iyaro gubernur-è aja' namateppe' lao ri Yèsus. 9 Iyakiya Saulus -- iya riyasengngètto Paulus -- rikuwasaiwi ri Rohna Allataala, angkanna naita iyaro passèhèrè'è, 10 nainappa makkeda, "Eh pabbellèng senna', ana' madoraka! Iko balinna sininna makessingngè. Magi namutèya mappèsau solangiwi rencanana Allataala untu' passalama'i rupa tauwè? 11 Itai makkekkuwangngè, Puwangngè maèlo hukkukko! Butako matu, angkanna dè' mullèi mitai tappa essoè siyagangngarè ittana. " Iyatoro wettuè napèneddingiwi Elimas engka salèwu iya mapettangngè tongkoi matanna, angkanna makkapèse'ni joppa sappa tau untu' rènrèngngi. 12 Wettunna naita iyaro gubernur-è aga pura kajajiyang, mateppe'ni lao ri Yèsus; saba' bengnga senna'ni lao ri pappagguruwanna passalenna Puwangngè. 13 Polè ri Pafos, Paulus sibawa sining sellaona sompe'ni lao ri Pèrga ri Pamfilia. Kuwaniro Yohanès Markus salaiwi mennang, nainappa lisu ri Yèrusalèm. 14 Polè ri Pèrga napatteruni mennang joppana lao ri Antiokhia ri Pisidia, nainappa ri Esso Saba'è laoni mennang tudang ti laleng bola assompangngè. 15 Puranana nabaca Kitta'na Musa sibawa Kitta'na Nabi-nabiè, iyaro sining pamimpinna bola assompangngè nasuroni tauwè makkutana lao ri Paulus sibawa sellao-sellaona, "Saudara-saudara, rèkko engka pangajana saudara untu' sining tauwèwè, tapalettu'ni iyaro pangajaè. " 16 Tettonni Paulus, nainappa mabbèrè tanra-tanrang sibawa limanna, nainappa makkeda, "Saudara-saudara bangsa Israèliè sibawa sininna saudara-saudara laingngè kuwaè iya matinuluè ri Allataala! Cobasai mèngkalingaka: 17 Allataalana bangsa Israèliè pura pilèi nènè-nènèta, sibawa napancajinna bangsaèwè bangsa battowa wettunna mennang monro ri Masèrè' selaku topolè-polè. Nainappa nasibawang akuwasanna Allataala iya battowaè tiwii mennang massu polè ri Masèrè'. 18 Sabbara'i lao ri ampè-ampèna mennang 19 Pitu bangsa Napaccappu ri wanuwa Kanaan untu' bagè-bagèi iyaro wanuwaè lao ri bangsa Israèliè kuwammengngi iyaro wanuwaè mancajiwi appunnangenna. 20 Iya manennaro ittana eppadatu limappulo taung. Puranana nabagè iyaro wanuwa Kanaan nabbèrèyanni Allataala lao ri mennang haking-hakingngè. Haking paccappurengngè iyanaritu Nabi Samuèl. 21 Nainappa mèllau mennang sèddi arung. Nabbèrèyanni Allataala lao ri mennang Saul ana' Kish polè ri suku bangsa Bènyamin untu' arunna mennang patappulo taung. 22 Puranana napaèsa' Allataala polè ri tudangenna, nakkani Allataala Daud mancaji arunna mennang. Na iyanaè naseng Allataala passalenna Daud, 'Ulolongenni Daud ana'na Isairo sèddi tau iya sennangiyèngngi atik-Ku. Iyanaè tau pogau'èngngi matu Uwèloriyè. ' 23 Polè ri wija-wijanna Daud, Allataala pura passadiyangengngi bangsa Israèliè sèddi Arung Pappassalama'è, pada-pada pura najjanciyangngè. Na Yèsus ritu Arung Pappassalama'èro. 24 Riwettu dè'napa napammulai Yèsus jamanna, purani nappallebbangeng Yohanès lao risining tau Israèliè kuwammengngi natoba mennang polè ri dosana sibawa ricemmè. 25 Namacawè'nana maccappa jama-jamanna, makkedani Yohanès lao risining tauwè, 'Niga iyya'è manuru' pallolongemmu? Tenniyaka Tau iya mutajengngè. Engngerangngi, iyaro Tauwè polèi matu ri munrikku; namuwi untu' ludungngi sapatun-Na dè'to usitinaja. ' 26 Saudara-saudara wijanna Abraham, sibawa sininna Saudara-saudara laingngè kuwaè iya matinuluè ri Allataala! Allataala pura kiringngi lao ri idi karèba asalamakengngèro; 27 saba' sining tau iya monroè ri Yèrusalèm sibawa sining pamimpinna dè' najeppuiwi makkedaè Alèna ritu pappassalama'èro. Dè' napahangngi mennang pappagguruwanna nabi-nabiè iya ribacaè tungke' Esso Saba'. Angkanna mennang nahukkung Yèsus. Iyakiya mala nasaba napogau'i mennang makkuwaèro nassabariwi makkedaè aga naboto iyaro nabi-nabiè kajajiyangngi. 28 Namuni dè'gaga mennang wedding nalolongeng ri Alèna iya sitinajaè rihukkung sibawa pahukkungeng matè, iyakiya naèllauwi mennang ri Pilatus kuwammengngi nariyuno. 29 Na puranana napogau' maneng mennang iya tarokiè ri laleng Kitta'è passalenna alèna, napanonnoni mennang uju-Na polè ri aju salliè, nainappa napalèsso ri laleng tampungngè. 30 Iyakiya Allataala patuwoi paimeng polè ri amatèngngè. 31 Nainappa siyagangngarè esso ittana polèi mappaitangngi Alèna lao risining tau iya naèwaè silaong polè ri Galilèa lao ri Yèrusalèm. Iyanaro mennang makkekkuwangngè mancaji sabbi-sabbi untu' Alèna lao ri bangsa Israèliè. 32 Jaji, makkekkuwangngè ripalettu'ni iyaro Karèba Madècèngè lao ri Saudara-saudara: Aga pura najjanciyang Allataala lao ri nènè-nènèta, 33 iyaro purani Napogau' ri alèta ri laleng napatuwona Yèsus paimeng polè ri amatèngngè. Saba' ri laleng Mazmur maduwaè engka taroki, 'Ikona Ana'-Ku, iyaè essoè Umancaji Ambo'-Mu. ' 34 Allataala pura patuwoi paimeng polè ri amatèngngè, makkekkuwangngè dè'na napèneddingiwi matu amatèngngè ri laleng tampungngè. Passalenna iyaro gau'è makkedai Allataala; 'Maèlo-Ka mpèrèk-Ko janci mapaccingngè iya mattentuè rirupai matu, iya pura Uwajjanciyangngè lao ri Daud. ' 35 Makkuwatoro ri laleng aya' laingngè ripowadai, 'Dè' Muleppessangngi matu Atam-Mu iyaro matinuluè makebbong ri laleng tampungngè. ' 36 Matèni Daud sibawa purana tona ritampung silaong nènè-nènèna, puranana napogau' aga iya nassurowangngè Allataala ripogau'. Ancuru'ni cappu maneng ujuna Daud. 37 Iyakiya Yèsus, iya napatuwoè paimeng Allataala polè ri amatèngngè, iyaro Yèsus dè' nacappu ancuru. 38 - 39 Rimakkuwannanaro Saudara-saudara, harusu'i muwisseng iko makkedaè naolai iyaè Yèsus biritta passalenna addampengeng dosaè riyabbirittangngi lao ri iko; makkedaè tungke'-tungke' tau iya mateppe'è ri Alèna, ripaleppe'i polè ri sininna dosa iya dè'è nawedding riledda naolai sining parèntana Allataala iya napalettu'è Musa. 40 Iyanaro saba'na naharusu'ko pènessaiwi madècèd-dècèng, aja' narapii kajajiyang ri iko aga iya napowadaè nabi-nabiè, 41 'Pènessaiwi madècèd-dècèng, èh iko sining tau iya pojiyèngngi maccella-cella! Hèrakko matu, nainappa matè! Saba' iya wettuèwè engka sèuwa Upogau' iya dè'è muwatepperiwi matu, namuni engka tau pakatajangekko. ' " 42 Wettunna Paulus sibawa Barnabas salaiwi bola assompangngèro, sining tauwè ri bola assompangngèro mèllauwi mennang lisusi ri Esso Saba' paimenna, untu' pakatajangngi matteru gau'-gau'èro. 43 Massunana sining tauwè polè ri bola assompangngèro, riyaccowèrini Paulus sibawa Barnabas ri maèga tau Yahudi sibawa tau bangsa laing iya muttama'è agama Yahudi. Naripangajarina mennang ri rasul-rasul-è kuwammengngi natteru mennang sanrè ri pammasèna Allataala. 44 Ri Esso Saba' paimennana, mawè' engka maneng sininna tauwè ri kotaèro polè mèngkalingai ada-adanna Puwangngè. 45 Wettunna sining tau Yahudiè naita tau maègaèro, mangèmpuru senna'ni mennang. Nacellani mennang Paulus sibawa naèwana sininna iya napowadaè. 46 Iyakiya pèdè' lebbi baraniwi Paulus sibawa Barnabas mabbicara terus terang. Makkedai mennang, "Ada-adanna Allataala mèmeng harusu'i ripalettu' lao ri iko riyolo. Iyakiya nasaba dè' mumaèlo tarimai, iko muto pura pattentui makkedaè dè' musitinaja tarima atuwong tongengngè sibawa mannennungengngè. Namakkekkuwangngè risalaiko natalao ri bangsa laingngè. 47 Saba' iyanaè parèntana Puwangngè lao ri idi; makkedai Puwangngè, 'Purano Upattentu mancaji sèddi tajang lao risining bangsa laing tenniyaè Yahudi, kuwammengngi mumappapolè asalamakeng lao risininna linoè. ' " 48 Wettunna bangsa-bangsa laing tenniyaè Yahudi naèngkalinga iyaro, masennang senna'ni mennang, napoji-pojiwi ada-adanna Puwangngè. Nasining tau iya puraè napattentu Allataala untu' lolongeng atuwong mannennungengngè, iyaro sining tauwè mateppe'i. 49 Mallebbang toni ada-adanna Puwangngè lao ri kègi-kègi risininna daèraèro. 50 Iyakiya sining tomarajana kotaèro sibawa sining makkunrainna iya polè ri golongang sining tomatanrè iya mètauè ri Allataala, ripakiri-kiriwi risining tau Yahudiè. Papolèi mennang assimusureng lao ri Paulus sibawa Barnabas, sibawa narukkana mennang iya duwa polè ri daèraèro. 51 Nanakkeppikenni iyaro rasul-rasul-è awuè ri ajèna ri yolona sining tauwèro selaku papparèngngerang, nainappa lao ri Ikonium. 52 Sining tau maccowèriyèngngi ri Antiokhia marennu senna'ni sibawa rikuwasai ri Rohna Allataala.
