1 Kira-kira iyaro wettuè mappammulani Arung Hèrodès tenre'i anggota-anggota jema'è. 2 Nasaba parèntana, Yakobus silessurenna Yohanès riyunoi sibawa peddang. 3 Wettunna naita Hèrodès makkedaè iyaro pangkaukenna napèsennangiwi atinna sining tau Yahudiè, napogau'si pada-padaèro, nasurosi tauwè tikkeng towi Pètrus. Iyaro gau'è kajajiyangngi ri wettu Esso Maraja Roti Dè'è Raginna. 4 Ritikkennana, riputtama'ni Pètrus ri laleng tarungkuè. Eppa regu tentara riwèrèng tugas untu' jagaiwi Pètrus kuwaro -- tungke'-tungke' regu eppa tentara. Purapi Ramè-ramè Paskaè, nainappa Hèrodès maèlo madèlèkiwi Pètrus ri yolona tau maègaè. 5 Jaji ritahanni Pètrus ri tarungkuè, iyakiya anggota-anggota jema'è matteru-terui massempajangengngi Pètrus sibawa tonget-tongeng lao ri Puwangngè. 6 Ri wenni dè'napa namaèlo Hèrodès pangoloi Pètrus ri yolona tau maègaè, matinroi Pètrus sibawa tassiyo duwa balenggu ri yelle'na duwa tentara pengawal. Ri sumpanna tarungkuè, pengawal-pengawal laingngè najagai towi tarungkuè. 7 Tennasenna-sennana malaèka'na Puwangngè tettong kuwaro sibawa sèuwa cahaya mattappa ri laleng bili'na iyaro tarungkuè. Iyaro malaèka'è nagottangngi Pètrus angkanna moto. Nainappa makkeda iyaro malaèka'è, "Eh, asitta'ko moto!" Iyatoro wettuè naddenne rantè bessiè polè ri limanna Pètrus. 8 Purairo, makkedani iyaro malaèka'è, "Pakèni pakèyammu sibawa siyoni sapatummu. " Napakèni Pètrus pakèyanna sibawa nasiyoni sapatunna. Nainappasi makkeda iyaro malaèka'è, "Pakèi jumbamu namuwaccowèrika. " 9 Naccowèrini Pètrus iyaro malaèka'è massu polè ri tarungkuè. Iyakiya dè' namaingekiwi Pètrus makkedaè aga iyaro napogau'è malaèka'è tonget-tongengngi kajajiyang. Nasemmi Pètrus iyaro sèddi pakkitang. 10 Wettunna mennang nalaloi onrong jagang mammulangngè sibawa maduwaè, lettu'ni mennang ri tange' bessiè, iya mattujuè ri kotaè. Iyaro tange'è natimpa' alèna, nainappa mennang massu lalo risèuwaè lorong. Tennasenna-sennana iyaro malaèka'è nasalaiwi Pètrus. 11 Purairo nappai Pètrus mainge' aga pura kajajiyang ri alèna, nainappa makkeda, "Uwajeppuini makkekkuwangngè makkedaè tonget-tongengngi Puwangngè kiringngi malaèka'-Na untu' paleppe'ka polè ri akuwasanna Hèrodès sibawa polè risininna aga iya maèloè nagaukekka bangsa Yahudiè. " 12 Namaingekinnana keadaangngèro, laoni Pètrus ri bolana Maria, indo'na Yohanès iya riyasengngètto Markus. Kuwaro maèga tau maddeppungeng sibawa massempajang. 13 Nagetto'ni Pètrus tange'è ri saliweng, na sèddi pattumani makkunrai riyaseng Rodè, polè untu' timpa'i tange'è. 14 Matterui naisseng saddanna Pètrus. Nasaba senna, mapperi-perini muttama' paimeng nadè' natimpa'i tange'è, nanapowadangngi sining tauwè kuwaro makkedaè engkai Pètrus ri saliweng. 15 Nakkeda mennang, "Jangekko!" Iyakiya mattedde'i Rodè makkedaè iyaro tonget-tongengngi Pètrus. Nakkeda mennang, "Malaèka'na iyaro!" 16 Nanagetto'ni Pètrus tange'è matteru-teru. Na wettunna mennang natimpa' tange'è, sibawa naitana Pètrus, hèrang senna'ni mennang. 17 Mabbèrèni Pètrus tanra-tanrang sibawa limanna kuwammengngi natennang mennang, nainappa nacurita pèkkugi Puwangngè pura tiwii massu polè ri tarungkuè. Nainappa makkeda, "Powadangngi iyaè lao ri Yakobus sibawa saudara-saudara laingngètto. " Purairo nasalaini Pètrus iyaro onrongngè nalao ri onrong laingngè. 18 Pappa bajanana èlèè marukkani tentara-tentara pengawal-è. Bengnga senna'ni mennang passalenna aga pura kajajiyang sibawa Pètrus. 19 Nainappa Hèrodès nasuroni tauwè sappai Pètrus, iyakiya dè' naullèi lolongengngi. Jaji napparèntanni kuwammengngi iyaro tentara-tentara pengawal-è ritanaiwi nainappa riyuno. Purairo nasalaini Hèrodès ri Yudèa naonro siyagangngarè ittana ri Kaisarèa. 20 Macai senna'ni Hèrodès lao risining tau Tirus-è sibawa Sidongngè. Rimakkuwannanaro silaonni mennang lao mangolo ri alèna. Mula-mulanna napalècèi Blastus, iya kapalaiyèngngi saorajana Hèrodès, angkanna maccowèni mennang. Nainappa lao mangolo ri Hèrodès, nanaèllauwi sidamè, saba' iyaro wanuwanna mennang taggattungngi ri anrè polè ri wanuwanna Hèrodès. 21 Risèuwaè esso iya pura ripattentuè, napakèni Hèrodès pakèyang arajanna nainappa tudang ri kadèra arajanna nappammula mappidatong ri yolona ra'ya'è. 22 Gora-gorani iyaro ra'ya'è iya mèngkalingaèngngi, "Iyaè sadda dèwata, tenniya sadda tolino!" 23 Iyatoro wettuè narileppa Hèrodès ri malaèka'na Puwangngè, saba' dè' napakarajai Allataala. Nanrèni lati Hèrodès nainappa matè. 24 Napèdè' mallebbanni ada-adanna Allataala sibawa pèdè' makkasse'na. 25 Puranana jama-jamanna Barnabas sibawa Saulus, lisuni mennang polè ri Yèrusalèm sibawa tiwii Yohanès Markus silaong mennang.
