1 Naèngkalingani sining rasul-è sibawa sining tau mateppe'è ri sininna Yudèa makkedaè muwi sining tau iya dè'è naggama Yahudi natarimani ada-adanna Allataala. 2 Nainappa wettunna Pètrus lao ri Yèrusalèm, sining tau Yahudi iya mateppe'ènnaro, nacellani Pètrus. 3 Makkedai mennang, "Magi mulao ri bolana sining tau iya dè'èppa naricemmè? Mala manrè tokko sisama mennang!" 4 Rimakkuwannanaro napakatajanni Pètrus lao ri iya maneng mennang iya puraè kajajiyang, mappammulai pammulanna. Makkedai Pètrus, 5 "Mattengngakka massempajang ri kota Yopè, nauwita sèuwa pakkitang. Uwitai engka pada-pada silampa kaing iya mallebba'è ripaturung polè ri langiè, taggattung ri iya eppa sunna', nainappa lèppang ri seddèku. 6 Wettunna upènessai ri lalenna, uwitai olokolo makkèajè eppaè, olokolo liyaè, olokolo makkalolo'è sibawa manu'-manu' liyaè. 7 Nainappa uwèngkalinga sèuwa sadda makkeda lao ri iyya, 'Oto'no Pètrus! Gèrèi iyaro namuwanrèi!' 8 Iyakiya mappèbalika, 'Dè' Puwang! Dè'pa naengka uwanrè nanrè iya harangngè sibawa najisi'è. ' 9 Iyakiya iyaro saddaè makkedai paimeng polè ri langiè, 'Barang iya puraè napattentu Allataala hallala', aja' naripowada harang. ' 10 Iyaro gau'è uwitai gangka wèkkatellu, napaccappurenna tarakka manenni lisu ri surugaè. 11 Nasitujuwang toni iyaro wettuè iya tellu tau polè ri Kaisarèa, iya risuroè lao ri iyya, lettu ri bola onrokku mappèruma. 12 Nainappa nasurona Rohna Allataala lao silaong mennang sibawa dè'na ubata-bata. Iya enneng saudaraèwè maccowè toni sibawakka lao ri Kaisarèa, namuttama manenni ri lalempolana Kornèlius. 13 Nainappa nacuritakki Kornèlius pèkkugi mitai sèddi malaèka' tettong ri bolana sibawa makkeda, 'Suroi tauwè lao ri Yopè mobbii sèddi tau worowanè riyasengngè Simon Pètrus. 14 Napalettukekko matu karèba iya passalama'èkko matti sibawa kaluwargamu. ' 15 Na wettukku mappammula mabbicara makkuwaro, " makkuwaniro Pètrus patterui curitana, "Polèni Rohna Allataala ri yasè'na mennang pada-pada iya kajajiyangngè ri idi riyolo ri pammulanna. 16 Nauwèngngeranni, engka naengka nakkeda Puwangngè, 'Yohanès maccemmèi sibawa uwai, iyakiya iko ricemmèko sibawa Rohna Allataala. ' 17 Jaji manessani nabbèrèyang towi Allataala lao risining tau iya dè'è naggama Yahudiro, pabbèrè iya pada-padaè nawèrèngngèkki ri wettutta mateppe' ri Puwang Yèsus Kristus. Rimakkuwannanaro, pèkkugi weddikka mattèyangngi Allataala!" 18 Naèngkalinganaro, dè'na nabbantana mennang. Napojini Allataala. Makkedani mennang, "Rèkko makkuwaitu, muwi sining tau tenniyaè Yahudi riwèrètto kasempatang ri Allataala untu' toba' polè ri dosa-dosana sibawa nennun-nennungngi atuwong tongengngè!" 19 Puranana riyuno Stèfanus, sining tau mateppe'è ri Yèsus mappammulani rilellung, angkanna tassiya-siyani lao kègi-kègi. Engka lari narapi Fènèsia, na engkato lettu ri Siprus sibawa Antiokhia. Nappallebbangenni mennang karèba polè ri Allataala banna lao risining tau Yahudiè bawang. 20 Iyakiya polè ri yelle'na sining tau mateppe'èro, iya assalennaè polè ri Siprus sibawa Kirènè, engkato lao ri Antiokhia sibawa mabbirittangngi Karèba Madècèngngè passalenna Yèsusro lao risining tau iya dè'ètto naggama Yahudi. 21 Akuwasanna Puwangngè engkai ri mennang angkanna maèga tau mateppe' sibawa mabbèrèyangngi alèna lao ri Puwangngè. 22 Curita-curita passalenna sining kajajiyangngèwè lettu toni ri jema'è ri Yèrusalèm. Nakirinni mennang Barnabas lao ri Antiokhia. 23 Na wettunna Barnabas lettu kuwaro, sibawa naitana pèkkugi Allataala pura barakkakiwi sining tauwèro, marennu senna'ni. Nanaèllauni kuwammengngi nattonget-tongeng matinulu lao ri Puwangngè sibawa sukku atinna. 24 Iyaè Barnabas tau makessing atiwi sibawa rikuwasainna ri Rohna Allataala enrengngè mateppe' senna' ri Puwangngè angkanna maèga tau maccowèriwi Puwangngè. 25 Nainappa Barnabas lao ri Tarsus sappai Saulus. 26 Siruntu'nana Saulus, natiwini Saulus ri Antiokhia na sitaung bujuru monroni mennang ri jema'è kuwaro nanapagguru towi maèga tau. Ri Antiokhiana ritu iyaro sining tau mateppe'è ri Yèsus bunge'-bunge'na riteppu tau Kristèng. 27 Iyaro wettuè engka siyagangngarè nabi polè ri Yèrusalèm lao ri Antiokhia. 28 Ri yelle'na engka sèddi riyaseng Agabus. Nasaba doronganna Rohna Allataala nabotoni makkedaè ri sininna linoè maèloi kajajiyang akkadèreng iya maseroè. (Na iyaro gau'è mèmeng kajajiyangngi wettunna Kaisar Klaudius mapparènta. ) 29 Nasininna iyaro tau maccowèriyèngngi Yèsus massèddini untu' kiring sumbangeng lao ri saudara-saudara iya monroè ri Yudèa; tungke'-tungke' kiring situru amampungenna. 30 Iyaro assamaturusengngè napogau' tongenni, nainappa Barnabas sibawa Saulus rikiring untu' mantara'i iyaro sumbangengngè lao risining pamimpinna jema'è.
