1 Tèofilus iya makessing atiè. Ri laleng kitta'ku iya mammulangngè pura mèmenni upakatajang iya napogau'è sibawa nappagguruwangngè Yèsus sipongen-Na mappammula napogau' jama-jaman-Na, 2 narapi esso riyakkana mènrè ri surugaè. Riwettu dè'napa naènrè ri surugaè, nasibawang akuwasanna Rohna Allataala mabbèrèi panunju'-panunju' lao ri rasul-rasul-Na iya tappilè. 3 Matènana, patappulo esso ittana biyasai nappaitang alèna sibawa cara manessa senna'è lao ri rasul-rasul-èro makkedaè tonget-tongengngi tuwo. Naitai mennang, nenniya mabbicarai sibawa mennang passalenna pèkkugi Allataala mapparènta selaku Arung. 4 Na wettun-Na maddeppungeng massibawa mennang, nabbèrèyangngi parèntaèwè lao ri mennang, "Aja' musalaiwi Yèrusalèm. Tajengngi kuwaro narapi Ambo'è mabbèrèyangngi aga iya puraè najjanciyangngè, iyanaritu iya puraè Upowadakko riyolo. 5 Saba' Yohanès maccemmèi sibawa uwai, iyakiya siyagangngarè essonapa ricemmèko matu sibawa Rohna Allataala. " 6 Wettunna iyaro rasul-rasul-è maddeppungeng sibawa Yèsus, makkutanani mennang ri Alèna, "Puwang, maèloki'ga Puwang makkekkuwangngè patettongngi paimeng Apparèntanna bangsa Israèliè?" 7 Nappèbali Yèsus, "Alèna Ambo'-Ku pattentui esso sibawa wettunna. Iyaro dè' naparellu muwisseng, saba' iyaro ha'na Ambo'è. 8 Iyakiya lolongekko matu kuwasa, rèkko engkani ri iko Rohna Allataala. Mancajiko matu sabbi-sabbik-Ku ri Yèrusalèm, ri sininna Yudèa, ri Samaria, sibawa lettu ri cappa'na linoè'. " 9 Puranana Yèsus makkeda makkuwaro, riyakkani mènrè ri surugaè ri yolona matanna mennang, naritongko-Na ri ellungngè polè ri pakkitanna mennang. 10 Ri wettu makkitana mupa mennang ri langiè, ri wettu laona Yèsus, tappa engka muna duwa tau mappakèyang maputè tettong ri seddèna mennang. 11 Nakkeda iya duwa tauwèro, "Eh sining tau Galilèaè, magi mutettong bawang kuwatu makkita ri langiè? Yèsus, iya muwitaè tarakka mènrè ri surugaèro ri yolomu, maèloi lisu paimeng sibawa caraèttoro pada-pada muwitaè onna'. " 12 Nainappa lisu iyaro rasul-rasul-è ri Yèrusalèm polè ri Bulu-bulu Zaitun. Onronna iyaro bulu-buluè kira-kira sèddi kilo bèlana polè ri Yèrusalèm. 13 Ri Yèrusalèm laowi mennang ri bola nappèrumaiyè mennang, nainappa mènrè ri bili' yasè'è. Iyaro rasul-rasul-è, iyanaritu Pètrus sibawa Yohanès, Yakobus sibawa Andrèas, Filipus sibawa Tomas, Bartolomèus sibawa Matius, Yakobus ana' Alfèus, Simon Patriot sibawa Yudas ana' Yakobus; 14 iya manennaro tuli massèddi atiwi maddeppungeng untu' massempajang. Massempajangngi mennang silaong sining makkunraiè sibawa Maria indo'na Yèsus kuwaèttopa silessu-silessurenna Yèsus. 15 Risèuwaè esso, wettunna mennang maddeppungeng -- engka kira-kira sèratu duwappulo tau hadèrè' -- tettonni Pètrus untu' mabbicara. Nakkeda, 16 "Saudara-saudara! Aga taroki ri laleng Kitta'è, harusu'i kajajiyang iyaro. Riyolo naolai Daud, purani naboto Rohna Allataala passalenna Yudas, pamimpinna sining tau iya tikkengngèngngi iyaro Yèsus. 17 Yudas iyanaritu sala sèddinna polè ri idi, napura toni ripilè untu' maccowè majjama sibawakki. " ( 18 Iyaè Yudas nalolongengngi tana tampunna polè ri saro bali'bellana iya majaè. Mabuwanni sibawa matè mapuwè' babuwana angkanna massu lise babuwana. 19 Sininna tau monroè ri Yèrusalèm naisseng iyaro gau'è. Iyanaro saba'na ri laleng basana mennang, nasengngi mennang iyaro tanaè Akeldama, bettuwanna 'Tana Dara'. ) 20 "Nasaba ri laleng Kitta Mazmur-è engka taroki makkuwaèwè, 'Leppessanni siya onrong naonroiyè masino-sino; aja' naengka sèddi tau monro ri lalenna. ' Engkato taroki makkuwaè, 'Leppessanni siya tudangenna nala tau laingngè. ' 21 - 22 Rimakkuwannanaro, harusu'i engka sèddi tau maccowè ri idi mancaji sabbi makkedaè Puwang Yèsus tuwoni paimeng polè ri amatèngngè. Iyaro tauwè harusu'i polè ri yelle'na sining tau iya tuli sibawangngèkki kègi-kègiki lao maccowèriwi Puwang Yèsus, sipongenna Yohanès mappammula maccemmè lettu ri wettu riyakkana Yèsus mènrè ri surugaè polè ri tengnga-tengngata. " 23 Nasininna tau iya engkaè hadèrè kuwaro nappètangngarenni duwa tau, iyana ritu Yusuf iya riyasengngètto Barsabas (riyaseng towi Yustus), sibawa Matias. 24 - 25 Nassempajanna mennang. Makkedai mennang, "Puwang Muwissengngi atinna sininna tauwè. Sempè'ni Yudas polè ri pangka'na selaku rasul sibawa matèni. Jaji jellorenni, niga polè ri iya duwa tauwèwè iya tapilè Puwang untu' riwèrèng jamang sullèi Yudas. " 26 Purairo riloterèini iya duwa asengngèro, na Matias nakenna. Jaji riyakkani mancaji rasul untu' maccowè silaong iya seppulo sèddi rasul laingngè.
