1 Saudara Gayus iya upojiyè! Iyya, pamimping jema' iya tonget-tongengngè mamasèiko, 2 massempajang tennapodo madisid-disingngi Saudara sibawa makessing maneng muwi sibawakko, pada-pada nyawamu makessing muto. 3 Masennang senna'ka wettunna siyagangngarè saudara Kristèng lettu sibawa powadakka pèkkugi atinulurenna Saudara lao ri Allataala iya tongengngè, saba' mèmeng Saudara tuli tuwoi situru pappagguruwanna Allataala. 4 Dè'gaga iya mullè pancajika lebbi marennu, naiya mèngkalingai makkedaè ana'-ana'ku tuwoi manuru' pappagguruwanna Allataala. 5 Saudaraku! Makkuwamani tinuluna Saudara ri laleng jama-jamang iya napogau'è Saudara untu' sellao-sellao pada-padatta Kristèng; mala muwi sining tau Kristèng iya dè'èppa naissengngi Saudara, natumaningiwi Saudara. 6 Purani nappaissengeng mennang lao ri jema'è ri onrotta passalenna pammasèmu. Tulungngi mennang kuwammengngi naullèi patterui joppana mennang nanallalengiwi napèsennangiwi atinna Allataala. 7 Saba' ri laleng allalengengngè untu' tumaningiwi Kristus, dè' natarima mennang bantuwang muwi aga polè risining tau iya dè'è naissengngi Allataala. 8 Rimakkuwannanaro, idi sining tau Kristèngngè harusu'ki tulungngi sellao-sellao pada-padatta Kristèng iya pada-padaèro, kuwammengngi taullèi maccowè ri laleng usahana mennang untu' mappallebbangengngi pappagguruwanna Allataala. 9 Purana moki sure' iya maponco'è lao ri jema'è, iyakiya Diotrèfès iya macinnaè mancaji pamimping ri laleng jema'è, dè' namaèlo turusika. 10 Rèkko polèka matti, maèloka bongkara'i sininna sèuwa-sèuwaè iya puraè napogau', iyanaritu passalenna gau'-gau' majaè enrengngè bellè iya puraè napowada passaletta! Iyakiya iya manennaro dè'pa nagenne untu' alèna. Ri wettu sellao-sellao pada-padatta Kristènro polè, dè' namaèlo tarimai mennang. Mala nattèyangngi sining tau iya maèloè tarimai iyaro saudara-saudaraè, enrengngè nasuroi sining tauwèro massu polè ri jema'è! 11 Saudara iya upojiyè, aja' muturusiwi aga iya majaè. Turusiwi aga iya makessingngè. Tau iya pogau'èngngi iya makessingngè, iyanaritu appunnangennai Allataala. Sibawa tau iya pogau'èngngi iya majaè, dè'pa naissengngi Allataala. 12 Sininna tauwè pojiwi Dèmètrius. Mala muwi Allataala poji towi. Idi poji towi, sibawa naisseng saudara, makkedaè aga iya tapalettu'è wedding riyatepperi. 13 Maèga senna' iya parelluè upowada lao ri iko, iyakiya upèrasai lebbi kessing muwi dè' naolai sure'. 14 Mammènasaka dè'na namaitta tasiruntu matu sibawa tasipabbicara matu. 15 Tennapodo Puwangngè barakkakiwi Saudara! Sellao-sellaomu ri onrokkuè masselleng lao ri iko. Palettukekka sellekku lao ri sininna sellao-sellaota tassèddi-sèddi.
