1 Polèi matu paimeng Kristus Yèsus ri linoèwè untu' madèlèkiwi sining tau iya tuwoè sibawa matè; namaèloi polè untu' mapparènta selaku Arung. Rimakkuwannanaro uwèllauwi sibawa masero ri iko ri yolona Allataala sibawa Kristus Yèsus: 2 Sitinajako mabbirittangngi karèba polè ri Allataalaro, sibawa matteru maddessa kuwammengngi naèngkalingai tauwè, maèlogi mennang iyarè'ga dè'. Sitinajako patepperiwi tauwè, mappaitangngi iya salaè, sibawa mpèrèngngi dorongang mennang. Paggurui tauwè sibawa sabbara. 3 Saba' narapii matu wettunna dè'na namaèlo tauwè tarima pappagguruwang iya tongengngè. Sibalè'na, naturusiwi matu mennang cinnana muto, sibawa paddeppungeng maèga guru untu' ripagguru gau'-gau' iya malunra'è naèngkalinga ri daucculinna. 4 Natongkoi matu mennang daucculinna lao ri iya tongengngè, iyakiya napasangngi matu daucculinna lao ri pau-pau rikadongngè. 5 Namuni makkuwaro, harusu'ko kuwasaiwi alèmu ri laleng keadaang muwi maga. Sabbara'ko ri laleng anrasa-rasangngè, jamai jamammu selaku pabbiritta Karèba Madècèngngèro sibawa pajoppai sikkessik-kessinna kewajibammu selaku pattumaninna Allataala. 6 Passalenna alèku, narapini wettunna maèloka matè selaku akkarobangeng lao ri Allataala. Dè'na namaitta usalaiwi matu linoèwè. 7 Purani uwaccowèri akkalaringngè sibawa makessing, enrengngè lettu'na ri garisi paccappurengngè. Tette'ka matinulu lao ri Kristus lettu paccappurenna. 8 Namakkekkuwangngè hadiya apakalangngè tajekka. Ri Esso Kiyame', Puwangngè, Haking iya adèlè'èro mabbèrèyangngi matu iyaro hadiyaè lao ri iyya, nasaba tuwoka simadècèngeng sibawa Allataala. Na tenniya iyya bawang iya maèloè tarimai iyaro hadiyaè, iyakiya sininnato tauwè iya tajengngèngngi apolènna Puwangngè sibawa muddani senna'. 9 Akkuragano mulao ri iyya masitta-sitta, 10 saba' nasalaina' Dèmas nasaba naèloriwi linoèwè. Laoni ri Tèsalonika. Krèskès laoni ri Galatia, sibawa Titus ri Dalmatia. 11 Banna Lukas monro sibawakka. Duppaiwi Markus namutiwii lao kumaiyè saba' naullèi bantuka ri laleng jama-jamakku. 12 Purani usuro Tikhikus lao ri Efèsus. 13 Rèkko polèko, tiwii mantel iya usalaiyè ri Troas ri bolana Karpus. Tiwi towi bobbo-bobbo'ku, lebbi-lebbipi bobbo-bobbo iya riyèbbuè polè ri karettasa' bingkulangngè. 14 Alèksander, panrè tembagaèro purai napogau' gau'-gau' iya maja senna'è lao ri iyya. Puwangngè mpale'i matu situru pangkaukenna. 15 Alèmu paimeng harusu matutu lao ri alèna, saba' naèwa senna'i birittatta. 16 Wettunna bunge' upangolo untu' mèwaiwi alèku, dè' muwi sèddi tau ranrekka; nasalai manekka. Memmuwarè' Allataala dè' napasalai mennang ri laleng gau'èwè! 17 Iyakiya Puwangngè ranrekka. Mabbèrèi awatangeng angkanna uwullèi mabbirittangngi sininna Karèba Madècèngngèro, kuwammengngi naèngkalingai sininna tau tenniyaè Yahudi. Sibawa leppe'ka polè ri abala amatèngngè. 18 Mèmeng Puwangngè maèlo leppessakka polè ri tungke' pakkuraga majaè lao ri iyya. Maèloi tiwika sibawa salama' ri laleng akkarungen-Na ri surugaè. Sitinajai Alèna ripakaraja mannennungeng! Aming. 19 Sellekku lao ri Priskila sibawa Akwila enrengngè lao ri kaluwargana Onèsiforus. 20 Erastus monro ri Korintus, sibawa Trofimus usalaini ri laleng keadaang malasa ri Milètus. 21 Akkuragano siullè-ullèna untu' polè riwettu dè'napa na wettu keccè'è. Ebulus, Pudès, Linus sibawa Klaudia massellengngi mennang lao ri iko; makkuwatoro sininna Saudara siateppereng laingngè. 22 Tennapodo Puwangngè ranrekko. Tennapodo Puwangngè barakkakiwi Saudara-saudara! Salama, Paulus
