1 Timotius, ana'ku! Sitinajako mancaji mawatang nasaba pammasè iya nabbèrèyangngè lao ri idi, nasaba massèddiki sibawa Kristus Yèsus. 2 Pappagguruwang iya puraè muwèngkalinga riyolo polè ri iyya ri yolona maèga tau, sitinajai muwappaddettangeng lao risining tau iya weddingngè riyatepperi sibawa iya maccaè paggurui tau laingngè. 3 Harusu'ko maccowè manrasa-rasa selaku parajuri'na Kristus Yèsus iya matinuluè. 4 Sèddiè parajuri' iya mattengngangngè jaga, dè' namaèlo palippuiwi alèna sibawa urusang-urusang alèna, saba' macinnai sennangiwi atinna pallimana. 5 Sèddiè pacculè dè' namancaji pakala matu ri laleng sèuwaè attandingeng, rèkko dè' naturusiwi peraturang-peraturangngè. 6 Patani iya majjama senna'è, alèna ritu bunge'-bunge' punna ha' untu' lolongengngi wassèlè' tanet-tanenna. 7 Nennun-nennungngi aga iya upangoloèwè, saba' nabbèrèyangngi matu Puwangngè lao ri iko pakkullèngngè untu' pahang manengngiro. 8 Engngerangngi iyaè: Karèba Madècèng iya uwabbirittangngè iyanaritu karèba passalenna Yèsus Kristus, wija-wijanna Daud: Alèna ritu Kristus iya tuwoènna paimeng polè ri amatèngngè. 9 Nasaba nabbirittangngi Karèba Madècèngngèro, naumanrasa-rasa; mala narapi rirantèka pada-pada sèddiè tomaja. Iyakiya ada-adanna Allataala dè' nariyullè rantèi. 10 Iyanaro saba'na nausabbara tanggung manengngiro untu' apentingenna sining tau iya puraè Napilè Allataala, kuwammengngi nalolongetto mennang asalamakeng iya riyabbèrèyangngè naolai Kristus Yèsus, sibawa iya nasibawangngè arajang mannennungengngè. 11 Tongeng senna' ada-adaèwè, "Rèkko matèni' silaong Alèna, tuwo tokki matu silaong Alèna. 12 Rèkko tette'ki sabbara, mapparènta tokki matu silaong Alèna. Rèkko riyassakkarengngi Alèna, Nassakkareng tokki matu. 13 Rèkko dè' tamatinulu, tette' Alèna matinulu, saba' dè' naullèi sièwa Alèna muto. " 14 Sitinajako parèngngerangiwi sining tauwè passalenna iya manennaè. Ri yolona Allataala, pangajariwi mennang kuwammengngi aja' nassasa passalenna warèkkada-warèkkadaè. Dè'gaga gunana iyaro, mala napakacauwi sining tau iya mèngkalingaèngngi. 15 Sitinajako makkuraga tonget-tongeng kuwammengngi nariyakuiko ri Allataala selaku tau iya sitinajaè majjama untu' Allataala. Akkuragano kuwammengngi aja' mumasiri passalenna jama-jamammu, sangadinna mappagguru sibawa sicoco' sining pappagguruwang tongengngè iya polè ri Allataala. 16 Abèlaiwi assipabbicarang-assipabbicarang iya dè'è gaga gunana sibawa iya pakatunaèngngi Allataala. Sining assipabbicarang pada-padaèro banna mèbbui tauwè pèdè' maja. 17 Pappagguruwanna sining tauwèro, makkalolo'i pada-pada lasa kangker iya masekkangngè. Ri yelle'na mennang muttama'ni Himènèus sibawa Filètus. 18 Lèssèni mennang polè ri pappagguruwang tongengngè, sibawa pakacauwi atepperenna sibagiyang tauwè. Napowadai mennang makkedaè amotokengngè polè ri amatèngngè purani kajajiyang. 19 Iyakiya allèjjakenna iya masse'è iya naèbbuè Allataala dè' nariyullè gottangngi. Ri yasè'na tarokii iyaè, "Naisseng Puwangngè sining tau appunnangen-Na, " sibawa "Tau iya powadaèngngi makkedaè appunnangennai Puwangngè, iyaro tauwè harusu'i mappèsau pogau'i pangkaukeng iya salaè". 20 Ri laleng bola iya battowaè engka maddupa-rupang parabo'na. Engka riyèbbu polè ri pèra'è iyarè'ga ulawengngè, iyakiya engkato iya polè ri ajuè iyarè'ga tanaè. Engka iya ripakè untu' apparelluwang-apparelluwang mattentuè iya dè'è padanna, sibawa engkato iya ripakè untu' apparelluwang-apparelluwang biyasaè. 21 Tau iya pèpaccingiyèngngi alèna polè ri sininna iya dè'è namakessing ripakèi matu untu' apparelluwang-apparelluwang iya dè'è padanna. Mancajiwi appunnangenna iya ripallaingngè sibawa makkègunaè untu' puwanna. Ripassadiyai untu' ripakè lao ri tungke' jama-jamang iya makessingngè. 22 Abèlaiwi asennangeng-asennangenna tau malaloè. Akkuragano untu' tuwo situru èlona Allataala, matinulu lao ri pappagguruwan-Na, mamasèiwi pada-padatta sibawa mappunnai ariyawang ri laleng atiè. Tuwono makkuwaro sibawa mennang iya mangobbiè mèllau pattulung ri Puwangngè sibawa ati iya mapaccingngè. 23 Aja' muwaccowè ri laleng addebbakenna sining tau madonggoè iya temmissengngè agaga. Muwisseng makkedaè iya manennaro banna paompo appangèwang. 24 Tau iya majjamaè untu' Puwangngè dè' nasipato mappangèwang; harusu'i mabessa lao ri sininna tauwè, sibawa naullèi paggurui tauwè sibawa makessing enrengngè sabbara. 25 Harusu'i nasibawang lemma kininnawa paggurui sining tauwè iya pojiyèngngi mèwa; memmuwarè Allataala mpèrèngngi wettu lao risining tauwèro untu' toba' polè ri dosa-dosana mennang sibawa missengngi pappagguruwang iya tongengngè. 26 Nanallalengiro namainge' mennang paimeng, sibawa leppe' polè ri siyo-siyona Ibillisi' iya puraè tawangngi mennang sibawa passai mennang maccowèriwi èlona.
