1 Paccappurenna, Saudara-saudara, assempajangekki. Assempajanno kuwammengngi biritta polè ri Puwangngè weddingngi matteru mallebbang sibawa masitta enrengngè ritarima sibawa madècèng, pada-pada iya puraè kajajiyang ri iko riyolo. 2 Assempajang tokko kuwammengngi napassalama'ki Allataala polè risining tau iya dè'è nakkèyampè sibawa majaè. Saba' dè' nasininna tauwè mateppe' matu ri biritta iya polè ri Puwangngèro. 3 Iyakiya matinului Puwangngè. Napèwatangiko matu sibawa nalinrungiko polè ri Si Majaè. 4 Nasukkuki mateppe' lao ri Puwangngè passalemmu, makkedaè mattengngakko pogau'i sibawa matteru matu pogau'i aga iya riyappètangngarengngè lao ri iko. 5 Tennapodo Puwangngè pimpikko untu' lebbi pahangngi makkedaè Allataala mamasèiko sibawa Kristus mabbèrè asabbarakeng lao ri iko. 6 Saudara-saudara, ri laleng akuwasanna Puwang Yèsus Kristus, riparèntakko kuwammengngi muwabèlaiwi sininna Saudara iya tuwoè makkuttu-kuttu, sibawa iya dè'è naturusiwi sining pappagguruwang iya riyabbèrèyangngè lao ri mennang. 7 Alèmuna misseng tongengngi makkedaè harusu'ko turusiwi contota. Dè' takkuttu-kuttu wettutta engka ri tengnga-tengngamu. 8 Dè' tanrèi inanrèna tauwè sibawa tenriwaja. Sibalè'na esso wenniki mappallaung maggangka ullè kuwammengngi dè' tasussaiwi muwi niga polè ri yelle'mu. 9 Ripogau'i iyaro tenniya nasaba dè' tappunnai ha' mattuntu' kuwammengngi mutulukki, iyakiya nasaba maèloki mancaji conto lao ri iko. 10 Wettutta engka mupa ri tengnga-tengngamu, riyabbèrèyangngi peraturangngèwè, "Tau iya dè'è namaèlo mappallaung, dè' nawedding manrè. " 11 Ripowadai iyaè nasaba riyèngkalingai makkedaè engka tau ri yelle'mu iya tuwoè makkuttu-kuttu. Dè'gaga napogau' mennang sangadinna sibu'i campuru'i urusanna tau laingngè. 12 Ri laleng asenna Puwatta Yèsus Kristus riparèntangngi sining tauwèro sibawa parèngngerangiwi, kuwammengngi nappallaung mennang sibawa tennang enrengngè sappai dallè'na muto. 13 Iyakiya aja' mucau pogau' dècèng. 14 Naullè engka tau ri yelle'mu iya dè'è namaèlo turusiwi aga iya ripowadaè ri laleng sure'èwè. Jaga-jagako ri tau makkuwaèro sibawa aja' musiwollompollong sibawa alèna kuwammengngi namasiri. 15 Iyakiya aja' mugaukengngi selaku bali, banna pangajariwi selaku sèddi Saudara. 16 Puwangngè iyanaritu assalenna asalèwangetta. Tennapodo tuli mabbèrèi lao ri iko asalèwangeng ri laleng sininna gau'è. Tennapodo Puwangngè sibawang manengngi Saudara. 17 Sellekku polè ri Iyya, Paulus. Alèku muto mokii iyaè bagiyangngè. Mappakkuwaiyè tanranna iya utaroè ri laleng sininna sure'ku. 18 Tennapodo Puwatta Yèsus Kristus barakkaki manengngi Saudara. Salama, Paulus
