1 Passalenna Puwatta Yèsus Kristus, sibawa passalenna ripaddeppungetta matu untu' monro sibawa Alèna, iyanaè uwèllau sibawa masero polè ri iko: 2 Aja' mumasitta mammaling-maling iyarè'ga mausè nasaba engkana biritta makkedaè narapini Essona Puwang Yèsus polè paimeng. Naullè iyaro karèbaè assalenna polèi risèuwaè boto, iyarè'ga polè risèuwaè pappagguruwang; iyarè'ga wedding towi jaji engka powadai makkedaè engka naengka taokii iyaè makkuwaèro ri laleng sala'sèddinna sure'ta. 3 Muwi maga, aja' muleppessangngi tauwè bengnguwakko. Saba' riwettu dè'napa narapii iyaro Essoè, harusu'i kajajiyang iyaè gau'èwè lebbi riyolo: Maèga tau salaiwi atepperenna, massakkarengngi Kristus; sibawa Tolino Maja iya ripatotoriyè untu' muttama ri ranakaè, mappaitangngi matu alèna. 4 Namatempo maèlo mèwai sibawa pakatanrèi alèna ri yasè'na sininna iya nasompaè tolinoè, iyarè'ga sininna iya nangga'è dèwata tolinoè. Mala muttama'i matu sibawa tudang ri laleng Bolana Allataala sibawa mappallebbangengngi makkedaè alèna iyanaritu Allataala. 5 Engngerangngi makkedaè purani uwappaddissengeng iya manennaro wettukku engka mupa sibawa iko. 6 Muwisseng aga iya lawa-lawaiyèngngi kajajiyanna iya manennaro. Matti ri wettu iya puraè napattentu Allataala, iyaro Tolino Majaè mompoi matu. 7 Awatangeng iya jamaèngngi iyaro jaè mammulani majjama secara rahasiya, iyakiya tuli ritahat-tahang mupi. Matti rèkko iya tahangngèngngiro ripaddèsu'ni, 8 nappai paita iyaro Tolino Majaè. Narèkko polèni Puwang Yèsus, naunoi matu iyaro Tolino Majaè sibawa nappase' polè ri tèmun-Na, enrengngè pabbinasai sibawa cahaya ahadèrèken-Na. 9 Iyaro Tolino Majaè mompoi sibawa akuwasang iya battowaè polè ri Ibillisi'. Napakangkai matu sininna rupanna anu makalallaingngè sibawa gau'-gau' iya dè'è padanna iya pennoè sibawa bellè. 10 Napakèi matu sininna bellè iya majaè untu' papusai sining tau iya maèloè binasa. Binasai matu mennang saba' nasampèyangngi sibawa dè' napojiwi biritta iya tongengngè iya polè ri Allataala iya weddingngè passalama'i mennang. 11 Iyanaro saba'na na Allataala napapolèngengngi mennang sèuwa akuwasang iya papusaèngngi mennang, angkanna mateppe'i mennang lao ri aga iya dè'è natongeng. 12 Addimonrinna, sininna tauwè iya pojiyèngngi dosaè sibawa dè'è namateppe' lao ri iya tongengngèro, rihukkungngi matu. 13 Saudara-saudara iya namasèiyè Puwangngè! Tuli harusu'ki mattarima kasi lao ri Allataala passalemmu, saba' pammulanna mupa Allataala pura pilèko untu' ripassalama'. Kajajiyangngi iyaro gau'è nasaba aga iya napogau'è Rohna Allataala lao ri iko untu' pancajiko umma'na Allataala iya mapaccingngè sibawa nasaba mateppe'ko lao ri biritta iya tongengngè polè ri Allataala. 14 Untu' iyanaro Allataala mobbiko naolai Karèba Madècèng iya riyabbirittangngè lao ri iko. Naobbiko Allataala, nasaba maèloi kuwammengngi muwaccowè pèneddingiwi arajanna Puwatta Yèsus Kristus. 15 Rimakkuwannanaro, Saudara-saudara, tettong masse'no sibawa attenninno matteru lao risining pappagguruwang iya puraè riyabbirittang lao ri iko, muwi ada-ada iyarè'ga taroki. 16 - 17 Tennapodo alèna Puwatta Yèsus Kristus, sibawa Allataala Ambo'ta massalèwo sibawa pèwatangiwi atimmu, kuwammengngi muwullèi pogau'i sibawa mabbirittangngi aga iya makessingngè. Saba' Allataala mamasèiki, sibawa nasaba akessingeng atin-Na naèbbuki tette' sabbara' mammènasaiwi iya makessingngè.
