1 Saudara-saudara jema'è ri Tèsalonika, iya mancajiyè umma'na Allataala Ambo'ta sibawa Puwang Yèsus Kristus! Idi, iyanaritu Paulus, Silas sibawa Timotius 2 mammènasa tennapodo Allataala Ambo'è sibawa Puwang Yèsus Kristus mabbèrè barakka enrengngè asalèwangeng lao ri iko. 3 Saudara-saudara, tuli waji'ki mattarima kasi lao ri Allataala nasaba iko. Na mèmeng sipato'ki pogau'i makkuwaèro, saba' pèdè' mateppe'ko lao ri Kristus, enrengngè pèdè' mamasèiwi sèddiè lao ri laingngè. 4 Iyanaro saba'na magi tatuli mabbicara passalemmu tungke' wettu ricèllèngiwi jema'-jema'na Allataala. Masennakki curitai pèkkugiko tette' masse mateppe' lao ri Kristus ri laleng paccallangngè sibawa anrasa-rasangngè iya mupèneddingiyè. 5 Purai mupèneddingi anrasa-rasangngè nasaba Lino Baruna Allataala, nariyangga'ko matu sitinaja muttama ri lalenna. Kuwaniyè manessa pèkkugi adèlè'na apettunna Allataala. 6 Napogau'i matu aga iya adèlè'è, nawalekengngi matu anrasa-rasang lao ri tau iya mèbbuèkko manrasa-rasa. 7 Nalao ri iko iya manrasa-rasaè makkekkuwangngèwè -- makkuwatoro idi -- Allataala matu mpèrèkki asennangeng ri essona Puwang Yèsus nonno polè ri surugaè sibawa mappaitangngi Alèna silaong malaèka'-malaèka'-Na iya baraniè 8 sibawa api iya malluwa'-luwa'è. Nonnoi untu' hukkungngi tau iya dè'è napaduliwi Allataala sibawa iya dè'è namaèlo tuwo situru Karèba Madècèng passalenna Yèsus Puwatta. 9 Iyaro sining tauwè tarimai matu pahukkungeng abinasang lettu mannennungeng, ribuwangngi matu massu polè ri daèrana Puwangngè sibawa polè ri akuwasanna iya marajaè, 10 ri Esso apolènna matti untu' ripakaraja ri umma'na sibawa untu' ripakalebbi ri sininna tauwè iya mateppe'è. Engka tokko matu ri yelle'na umma'na Allataalaro, saba' mateppe'ko lao ri biritta iya ripalettu'è lao ri iko. 11 Iyanaro saba'na na idi tuli massempajangekko. Massempajakki kuwammengngi Allataala pancajiko sitinaja untu' tuwo situru èlo-Na, untu' iyanaro mobbiko. Tennapodo Allataala, nasibawang akuwasan-Na, pennoiwi cinna-Na untu' pogau'i madècèngngè, sibawa passukkui sininna jama-jamang iya mupogau'è nasaba mateppe'ko lao ri Kristus. 12 Nanallalengiro Puwatta Yèsus Kristus ripakarajai ri iko, sibawa iko ripakarajato ri Yèsus nasaba akessingeng atinna Allataala enrengngè Puwang Yèsus Kristus.
