1 Saudara-saudaraku iya upojiyè! Iyanaè sure'ku maduwaè lao ri iko. Ri laleng iya duwa sure'èwè, makkuragaka paompoi pikkirang-pikkirang iya makessingngè ri iko. 2 Uwappètangngarengngi kuwammengngi muwèngngerangngi lao ri ada-ada iya napowadaè riyolo nabi-nabinna Allataala, sibawa lao ri parènta polè ri Puwangngè, Arung Pappassalama', iya ripalettu'è ri iko naolai rasul-rasul-è. 3 Bunge'-bunge'na, harusu'i muwisseng makkedaè ri esso-esso paccappurengngè, mompoi matu sining tau iya rikuwasaiyè atuwonna ri hawa napessunna muto. Naèllèkèllè'ko matu mennang 4 sibawa makkeda makkuwaè, "Adanna majjanciwi Puwangngè maèlo polè! Kègani makkekkuwangngè Alèna? Bapa'-bapa' toriyolota matèni, iyakiya sini-sininnaè pada-pada mupi sipongenna ripancaji alangngè!" 5 Nattungka mennang dè' namaèlo mangaku makkedaè riyolo Allataala pancajiwi langiè sibawa linoè, polè ri saddan-Na; makkedaè ripancajiwi linoè polè ri uwai, enrengngè nasibawang uwai; 6 kuwaèttopa nasibawang towi uwai, iyanaritu uwai polè ri lèmpe rajaè, iyaro linoè riyolo ripabbinasai. 7 Iyakiya langi sibawa lino iya engkaè makkekkuwangngèwè, ripiyara towi ri saddanna Allataala untu' ripallennye' sibawa api matti. Makkekkuwangngè langiè sibawa linoè ripiyara mupi narapi ri esso sining tau majaè rihukkung sibawa ripabbinasa. 8 Iyakiya Saudara-saudaraku, iyaro sèddiè passaleng aja' muwallupaiwi: makkedaè ri laleng pakkitanna Puwangngè, sèddiè esso dè'gaga sisalana sibawa sisebbu taung -- duwa-duwanna pada-pada muwi ri Alèna. 9 Dè' namatengnge Puwangngè mabbèrèyangngi aga iya puraè najjanciyang, namuni engka masengngi makkuwaro. Sibalè'na, sabbara'i lao ri iko, saba' dè' namaèlo muwi sèddi tau binasa. Macinnai kuwammengngi sininna tauwè natoba' polè ri dosa-dosana. 10 Iyakiya Esso apolènna Puwangngè polèi matu pada-pada pangaè. Iyaro Essoè, lennye'i matu langiè sibawa oni memmu sibawa anu engkaè ri langiè cappui matu ritunu, enrengngè linoè sibawa sininna iya engkaè ri lalenna lennye'i matu. 11 Nasaba iya manennaro riyancuru'i matu sibawa cara makkuwaèro. Pèkkugiko harusu tuwo? Harusu'ko tuwo mapaccing sibawa banna untu' Allataala, 12 ri wettu mattajemmu mupa enrengngè muddaningiwi apolènna Essona Allataala. Ri Essoèro cappui matu ritunu langiè, sibawa nasaba pellana, nasining anu engkaè ri langiè maccolo'i matu. 13 Iyakiya mattajekki aga iya puraè najjanciyang Allataala, iyanaritu langi mabaruè sibawa lino mabaruè, kègi engka adèlèkeng. 14 Rimakkuwannanaro, Saudara-saudara iya upojiyè, ri wettu mutajenna iyaro Essoè, akkuragano tonget-tongeng untu' tuwo mapaccing sibawa dè' cellana ri yolona Allataala. Sibawa piyarai assisumpungeng iya makessingngè sibawa Allataala. 15 Angga'ni asabbarakenna Puwatta selaku kasempatang iya Nabbèrèyangngè lao ri iko kuwammengngi naweddikko salama'. Paulus, saudarata iya ripojiyè pura toni naoki makkuwaèro lao ri iko. Naokii iyaro sibawa apanrèng iya Nabbèrèyangngè Allataala ri alèna. 16 Ri laleng sininna sure'na, tuli naokii Paulus passalenna gau'èro. Mèmeng engka siyagangngarè passaleng iya mawatangngè ri pahang ri laleng sure'naro. Na iyaro bagiyab-bagiyangngè purani naputara'balè sining tau iya dè'è agaga naisseng sibawa iya dè'è namasse teppe'na. Dè' nappahèrang gau'èro, bagiyab-bagiyanna Kitta'è rigaukeng towi makkuwaro ri mennang. Aga iya napogau'èro mennang banna ancurukeng ri mennang muto. 17 Iyakiya iko, Saudara-saudara iya upojiyè, muwissenni passalenna gau'èro. Rimakkuwannanaro, atike'no, aja' narapiko ritiwi ri laleng apusanna sining tau maja ampè angkammu sempè' polè ri onrong akkellaremmu iya matedde'è. 18 Sitinajako pèdè' mupèrasa pammasèna Yèsus Kristus, Puwang sibawa Arung Pappassalama'ta, sibawa sitinaja tokko pèdè' missengngi Alèna. Ripojiwi Alèna, makkekkuwangngè sibawa lettu mannennungeng! Aming. Salama, Pètrus
