1 Saudara-saudara iya upojiyè! Sininna iyaro janciè ripattujui lao ri idi. Rimakkuwannanaro sitinajaki pèpaccingiwi alè polè ri sininna iya rota'iyèngngi tubu nyawata. Sitinajaki mètau ri Allataala, kuwammengngi tasukku nataullèi tuwo banna untu' Allataala bawang. 2 Tarimaki ri laleng atimmu. Dè' tappasala muwi lao risèddiè tau, sibawa dè' naengka nariparogi tauwè. Dè' sises-siseng takarao' saro polè ri niga-nigato. 3 Makkeda makkuwaka'ro, tenniya untu' pasalako. Saba' pada-pada iya puraè upowada riyolo, riyamasèi senna'ko, sibawa idi iyanaritu sellao-sellao siamatèngngè sibawa siatuwongngè. 4 Uwatepperi tongekko. Mala masennang senna'ka lao ri iko! Namuni pèneddingiki maèga asukkarakeng, tassalèwo senna'ni atikku nasaba iko. Marennu tongeng atikku! 5 Muwi wettutta lettu ri Makedonia, dè' sises-siseng gaga wettutta mappèsau. Polè tulili lolongekki asukkarakeng: polè ri laingngè assasang, napolè ri laleng atiè muto iyanaritu amètaureng. 6 Iyakiya sukkuru'ki, Allataala tuli pakaloppoiwi atinna tau iya pettu paddennuwangngè; Napètakkariwi atitta ri laleng apolènna Titus. 7 Tassalèwoi atitta tenniya bawang nasaba engkani polè Titus, iyakiya nasaba nalaporo' towi pèkkugi atinna risalèwori ri iko. Napaissengiki makkedaè muddani senna'ko mèwaka siruntu'; makkedaè massesse kalèko ri pangkaukenna riyolo na makkekkuwangngè macenninni atinna mèwaika. Iyaro gau'è naèbbuka lebbi marennupasi. 8 Namuni sure'ku pamessèiwi atimmu, dè'to uwassesse kalè mokii iyaro sure'è. Mèmeng massesse kalè tokka cèddè wettunna uwita makkedaè iyaro sure'ku pamessèiko namuni iyaro amessèmmu cinampe'mi bawang. 9 Iyakiya mammènasaka makkekkuwangngè -- tenniya nasaba messèi atimmu, sangadinna nasaba iyaro amessèmmu mèbbui tappinra ampè-ampèmu. Mèmeng iyaro amessèngngè siturui èlona Allataala. Jaji, dè' taparogiko. 10 Saba' amessèng iya pada-padaèro powassèlè'i atappinrang ati iya mappapolè asalamakeng. Nadè' nassesse kalè matu tauwè lao ri gau'èro. Sibalè'na, amessèng iya situruè èlona tolinoè powassèlè'i amatèng. 11 Cobako pènessaiwi aga wassèlè'na ri iko polè ri amessèng iya situruè èlona Allataala! Wassèlè'na iyanaritu mattonget-tongekko makkuraga untu' pacinnongiwi aluccakengngè! Mubenciwi dosaè, mètauko, muddaniko, masumange'ko, macennikko hukkungngi iya pasalaè! Ri laleng sininna passalengngèwè muwappaitangngi makkedaè dè' mupasala. 12 Jaji, muni uwokii iyaro sure'è, iyaro sure'è riyokii tenniya nasaba iyaro tau pasalaè. Tenniyato nasaba tau iya manrasa-rasaè nasaba asalangngèro. Uwokii iyaro sure'è kuwammengngi na ri yolona Allataala, mumaingekiwi pèkkugi loppona pajjampamu lao ri idi. 13 Iyanaro saba'na natassalèwo atitta. Ri lainnaè tassalèwo, lebbi-lebbipi rirennuitta nasaba riitai arennunna atinna Titus; tassalèwo manengngi atimmu. 14 Mèmeng purano uwammingki-mingkikeng lao ri alèna. Sukkuru'ni dè' mupakasirika. Sininna iya puraè ripowada lao ri iko iyanaritu tongengngi. Makkuwatoro aga iya riyammingkikengngè passalemmu lao ri Titus manessani tongeng towi. 15 Makkekkuwangngè pèdè' namasèiko, saba' naèngngerangngi pèkkugiko iya manenna maèlo turusiwi pappimpinna sibawa pèkkugiko tarimai sibawa pakarajai enrengngè mapatoiwi. 16 Masennang senna'ka, nasaba weddikko riyatepperi risininna gau'è.
