1 Ripogau'i iyaè jama-jamangngè nasaba asèmpo atinna Allataala. Iyanaro saba'na nadè' tapettu paddennuwang. 2 Dè' tapakèi cara-cara mapettang iya mappakasiri-siriè. Dè' tamaèlo majjama sibawa macèko-cèko iyarè'ga putara' balè'i ada-adanna Allataala. Ritumaningiwi Allataala sibawa ati iya mattonget-tongengngè enrengngè situru èlo-Na. Rimakkuwannanaro mammènasaki sininna tauwè mangke'ki sibawa makessing ri laleng ati marilalenna. 3 Rèkko Karèba Madècèng iya riyabbirittangngèro, dè' mupa naripahang, na banna sining tau iya mattengngangngè mattuju ri ancurukengngè bawang iya dè'è napahangngi. 4 Dèwata maja iya makuwasaèngngi linoèwè tongkoi pikkiranna sining tau iya dè'è namateppe'ro. Iyanaritu lawa-lawaiwi mennang kuwammengngi mennang dè' naitai tajang polè ri Karèba Madècèngngèro passalenna arajanna Kristus, iya maddapangengngèngngi gambara'na Allataala. 5 Biritta iya ripalettu'èro tenniya biritta passalenna alèta. Iyaro birittaè iyanaritu biritta passalenna Yèsus Kristus; makkedaè Alèna iyanaritu Puwang; na idi iyanaritu ata-atannako nasaba Alèna. 6 Allataala iya makkedaè, "Sitinajai polè ri laleng pettangngè mompoi tajangngè, " Allataala èttoro iya paompoèngngi tajangngèro ri laleng atitta, kuwammengngi namancaji matajang pakkitatta untu' pahangngi acakkarenna Allataala iya mattappaè ri rupanna Kristus. 7 Iyakiya waramparang rohani iya magelloèro ritiwii ri alèta iya dè'è angke'naè iya riyèbbuè polè ri tanaè. Rimakkuwannanaro manessani makkedaè arajanna iyaro akuwasangngè monroi ri Allataala natenniya ri idi. 8 Riluruiki polè tulili, iyakiya dè' tatassipi. Malippuki, iyakiya dè' narapii pettu paddennuwakki. 9 Maèga musuki, iyakiya dè' naengka taonro alè-alè. Namuni biyasaki riyunru gangkatta menrung, iyakiya dè' tamatè. 10 Tuli ripèneddingiwi amatènna Yèsus ri tubutta, kuwammengngi atuwon-Na nancaji manessa ri tubutta. 11 Sipongetta tuwo, tuli riancakki sibawa amatèng nasaba Yèsus, kuwammengngi ri laleng atuwongngè wedding towi Yèsus riyappaitang ri tubutta iya dè'è namannennungeng. 12 Iyaè bettuwanna makkedaè ri laleng alèta mapatoi amatèngngè pajoppai perananna, iyakiya marennuki makkedaè atuwongngè ritu mattengngang mapato ri laleng alèmu. 13 Ri laleng Kitta'è engka iyaè adaè, "Mateppe'ka, iyanaro saba'na uwabbicara. " Nasibawang sumange' teppe' iya pada-padaèttoro, mabbicaraki nasaba mateppe'ki. 14 Mateppe'ki ri Allataala iya puraè patuwoi paimeng Puwang Yèsus, maèlo towi patuwoki silaong Yèsus, enrengngè tiwiko sibawa idi ri yolo-Na. 15 Iya manennaro iyanaritu untu' apentingemmu. Saba' pèdè' maègai tau pèneddingiwi pammasèna Allataala, pèdè' maèga towi sempajang sukkuru' iya ripalettu'è ri Allataala; nanallalengiwi naripakalebbi Allataala. 16 Iyanaro saba'na dè' napettu paddennuwang. Namuni secara mallahèrekki pèdè' tattamba masolakki, iyakiya secara batèng esso-essoki ripancaji baru. 17 Na asussang iya dè'è nasiyagaè, iya ripèneddingiyè untu' cinampe', powassèlèkekki matu sèuwa asennangeng iya dè'è padanna sibawa mannennungeng. Iyaro asennangengngè mabèlai lebbi battowana rèkko ripasibandingngi sibawa iyaro asussangngè. 18 Saba' dè' tajampangiwi gau'-gau' iya paitaè, sangadinna iya dè'è napaita. Iya paitaè banna tahang cinampe', iyakiya iya dè'è napaitaro mannennungengngi.
