1 Rimakkuwannanaro purani upettui untu' dè' ulaona ri iko sibawa apolèng iya mèbbuèkko messè. 2 Saba' rèkko upamessèiko, nigatona wedding polè salèworika, rèkko tenniya sining tau iya puraè upamessèi atinna? 3 Iyanaro saba'na uwokii iyaro sure'è lao ri iko. Dè' umaèlo cèllèngiko, nainappa mupamessèika. Padahal iko sitongenna harusu' pèrennuika. Saba' mateppe'ka makkedaè rèkko marennuka, Saudara tentu marennu maneng towi. 4 Uwokii lao ri iko sibawa ati iya messèwè enrengngè matane'è kuwaèttopa maèga paddunui uwai mataè. Akkattaku tenniya kuwammengngi mumessè, iyakiya kuwammengngi mumaingekiwi makkedaè uwamasèi senna'ko. 5 Rèkko engka tau iya puraè nassabari amessèngngèwè, tentu napogau'i iyaro gau'è tenniya lao ri iyya, sangadinna lao ri Saudara maneng iyarè'ga kaminang dè'na sibagiyang polè ri Saudara. Dè' umaèlo matedde senna' lao ri alèna. 6 Lao ri tau makkuwaèro, pahukkungeng iya ripateppaiyèngngi polè ri maègangngèngngi ri yelle'na Saudara, genne'ni. 7 Makkekkuwangngè harusu'ko maddampengengngi sibawa mpèrèngngi sumange'si ri alèna kuwammengngi aja' namessè ati senna' angkanna pettu paddennuwang. 8 Rimakkuwannanaro uwèllauwi, kuwammengngi muwappaitangngi paimeng lao ri alèna makkedaè tonget-tongekko mamasèiwi. 9 Uwokii iyaro sure'è lao ri iko sibawa akkatta untu' mojiko, aga tuli maèlokoga turusiwi pappaita-pappaita polè ri iyya. 10 Rèkko muwaddampengengngi tau iya puraè pogau' asalang lao ri iko, na iyya uwaddampengeng towi iyaro tauwè. Saba' aga iya puraè uwaddampengeng -- rèkko mèmeng engka parellu riyaddampengeng -- iyaro uwaddampengengngi ri yolona Kristus untu' adècèngemmu. 11 Upogau'i iyaro kuwammengngi Ibillisi' aja' nala kasempatang untu' makuwasaiki; saba' taissengngi rancana-rancananna. 12 Wettukku lettu ri Troas sibawa akkatta untu' mabbirittangngi Karèba Madècèngngè passalenna Kristus, purani natimpakekka laleng Puwangngè untu' majjama ri onrongngèro. 13 Iyakiya dè' utennang saba' dè' usiruntu' saudarata Titus kuwaro. Nauwassimanna risining tauwè ri onrongngèro nainappa lao ri Makedonia. 14 Iyakiya sukkuru'ka lao ri Allataala! Tuli napimpikka untu' maccowè ri laleng pèsta apakalangenna Kristus nasaba massèddiki sibawa Alèna. Napakèki Allataala kuwammengngi biritta passalenna Kristus mallebbangngi pada-pada bau mabauè iya lellangngè kègi-kègi. 15 - 16 Saba' idi'è iyanaritu pada-padaki bau kamennyang iya mabauè, iya natunuè Kristus untu' Allataala. Lao risining tau iya mattengngangngè mattuju lao ri ancurukengngè, idi'è pada-padaki bau amatèng iya paunoè; iyakiya lao risining tau iya mattengngangngè ripassalama', pada-padaki bau mabauè iya tiwiè atuwong. Na nigana mullèi paddupai iyaè jamangngè? 17 Dè' tapada-pada maèga tau iya pogau'èngngi biritta polè ri Allataala pada-pada barang dangkangengngè bawang. Sining akkattataè iyanaritu tonget-tongengngi, saba' risuroki ri Allataala. Na Allataala muto mitai makkedaè idi palettu'i iyaro birittaè selaku ata-atanna Kristus.
