1 Saudara-saudara jema'na Allataala ri Korintus sibawa sininna umma'na Allataala ri Akhaya. Iyya, Paulus, rasulna Kristus Yèsus, iya riyakkaè nasaba èlona Allataala silaong saudarata Timotius, 2 maddennuwang tennapodo Allataala, Ambo'ta sibawa Puwang Yèsus Kristus mabbèrè barakka enrengngè asalèwangeng lao ri iko. 3 Ripojiwi Allataala, Ambo'na Puwatta Yèsus Kristus. Ambo' iya makessing senna'è atinna, sibawa Allataala iya mabbèrè awatangeng batèng lao ri tolinoè. 4 Napèwatangiwi batètta ri laleng tungke'-tungke' asukkarakeng iya ripèneddingiyè, kuwammengngi nasibawang awatangeng iya ritarimaè polè ri Allataalaro, riyullè toni pèwatangiwi batènna tauwè iya engkaè ri laleng asussangngè. 5 Anrasa-rasang iya napèneddingiyè Kristus maèga toni ripèneddingi idi. Sibawa naola towi Kristus, ripèwatangi senna'i batètta. 6 Rèkko pèneddingiki asukkarakeng, iyaro untu' pèwatangiwi batèmmu, untu' asalamakemmu. Rèkko ripèwatangiwi batètta, tentu maccowè tokko ripèwatangi angkammu mancaji sabbara' ri laleng sining asukkarakengngè pada-padato iya riyanrasa-rasaiyè. 7 Dè' naengka tabata-bata, sibawa tuli mateppe'ki passalenna Saudara, saba' riissengngi makkedaè maccowè tokko manrasa-rasa sibawa idi. Narimakkuwannanaro maccowè tokko ripèwatangi silaong idi. 8 Saudara-saudara! Maèloki kuwammengngi muwissengngi passalenna asukkarakeng iya ripèneddingiyè ri daèra Asia. Anrasa-rasang iya ritanggungngèro matane' senna'i tenre'ki, angkanna dè'na tammènasana maèlo tuwo; 9 samanna pada-pada pura ripateppaiyè pahukkungeng matè bawang. Iyakiya kajajiyangngi iyaro gau'è kuwammengngi aja' tasanrè ri awatangeng ri alèta bawang, sangadinna ri Allataala iya patuwoèngngi tau matè. 10 Iyanaritu iya puraè passalama'ki polè ri abala amatèng iya battowaèro. Sibawa Alèna ritu matu passalama'ki matti ri esso-esso rimunri, saba' ri Alènaki mammènasa. 11 Mateppe'ki makkedaè nasibawang sining sempajammu untu' idi, Allataala passalama'siki matu polè ri abalaè. Nainappa Allataala situjuiwi barakkakiki selaku pappèbalinna lao ri maèga sempajang untu' idi. Nassabariro namaèga tau mattarima kasi matu lao ri Allataala. 12 Masenna'ki, saba' ati marilaletta pannessai makkedaè atuwotta ri linoèwè -- utamana assisumpungetta sibawa Saudara -- ripogau'i sibawa matinulu enrengngè mattonget-tongeng. Ripogau'i iyaro tenniya nasaba apanrèng tolino, iyakiya nasaba amampungeng iya nabbèrèyangngè Allataala. 13 - 14 Iya riyokiè lao ri iko iyanaritu banna passalenna gau'-gau' iya weddingngè mubaca sibawa mupahang. Makkekkuwangngè dè' mupahang manekki, iyakiya mammènasaka matti tonget-tongengngi matu mupahakki. Rimakkuwannanaro ri wettunna Puwang Yèsus polè matti, masennangngi matu lao ri idi, pèkkugi towi idi masennang lao ri iko. 15 Nasaba atepperengngèro, mula-mulanna urancanai untu' cèllèngiko kuwammengngi mulolongeng barakka leppe' wèkkaduwa. 16 Akkattaku cèllèngiko ri laleng allalengekku lao ri Makedonia sibawa lèppang paimeng ri iko ri laleng allalengekku lisu, kuwammengngi muwullèi bantuka patterui allalengekku lao ri Yudèa. 17 Iyakiya upinrani iyaro niya'ku; nah, aga iyaro mappaitangngi makkedaè dè' namasse attangekku? Ri wettu mèbbuna rancana, mèbbuka'ga rancana situru èlo ri alèku, cinampe' makkeda "Iyyè", sibawa cinampe' makkeda "Dè'"? 18 Nasibawang Allataala iya weddingngè riyatepperi, jancikku lao ri Saudara tenniya "Iyyè" sibawa "Dè'". 19 Saba' Yèsus Kristus, Ana'na Allataala, iya riyabbirittangngè lao ri iko polè ri Silas, Timotius, sibawa iyya paimeng tenniya tau "Iyyè" sibawa "Dè'". Sibalè'na sinrupai pappèbali "Iyyè" polè ri Allataala. 20 nasaba naolai Alèna pura napowadai Allataala "Iyyè" lao ri sininna jancinna. Nallalengiro natapowadai "Aming" lao ri Allataala nasaba Yèsus Kristus. Ripogau'i makkuwaèro kuwammengngi naripakalebbi Allataala. 21 Alèna muto Allataala mèbbuki sibawa Saudara masse massèddi sibawa Kristus; Iyanaritu pilèki banna untu' Alèna. 22 Untu' iyanaro napurani napaessaki mancaji appunnangen-Na sibawa mabbèrèyangngi Roh-Na ri laleng atitta selaku boro'-Na makkedaè nabbèrèyangngi matu Allataala sininna iya Najjanciyangngè. 23 Allataala sabbikku -- saba' naissengngi lise atikku -- makkedaè dè' ujaji lao ri Korintus, nasaba dè' umaèlo mèbbui atimmu messè. 24 Dè' upassako passalenna aga iya harusu'è muwatepperi; saba' mateppe' senna'no lao ri Kristus. Banna majjamaka sibawa iko kuwammengngi napèdè' masennang.
