1 Tongeng senna' ada-adaèwè, "Tau iya macinnaè mancaji pamimpinna jema'è, nacinnaiwi sèuwa jama-jamang iya makessing senna'è. " 2 Sèddiè pamimping jema' harusu'i sèddi tau iya dè'è cellana, banna sèddi bainèna, naisseng kuwasaiwi alèna, mapanrè, enrengngè taratoro'; napoji tarimai tauwè ri bolana, sibawa naullè paggurui tauwè; 3 aja' na tau iya pammabokengngè, iyarè'ga iya pojiyèngngi mallaga. Sibalè'na, harusu'i malemma kininnawa sibawa napoji adamèngengngè. Dè' nawedding mammata dowiè. 4 Harusu'i naisseng matoro'i ruma tanggana sibawa makessing, enrengngè didi'i ana'-ana'na untu' tunru' sibawa mappakalebbi ri alèna. 5 Saba' rèkko tauwè dè' naissengngi matoro'i ruma tanggana, pèkkugiwi naullèi matoro'i jema'na Allataala? 6 Sèddiè pamimping jema' dè' nawedding tau iya nappaè mancaji Kristèng, saba' matempoi matti angkanna tattanroi pada-pada Ibillisi'è riyolo. 7 Harusu'i tau iya mappunnaiyè aseng makessing ri laleng masaraka'è; saba' rèkko dè' nakkuwaro, ripakatunai matu ri tauwè, angkanna sempè' ri laleng jebba'na Ibillisi'è. 8 Pabbantu jema'è harusu'i makessing sibawa matinulu; dè' namammata dowi sibawa dè' napojiwi mènung maèga senna' anggoro. 9 Harusu'i mennang makkatenning masse sibawa ati marilalengngè iya mapaccingngè ri pappagguruwang Kristèngngè iya puraè nappaitang Allataala. 10 Sitinajai mennang riyoji riyolo', narèkko manessani mennang dè' gaga cellana, nappai wedding mennang mabbantu ri laleng jema'è. 11 Bainèna mennang harusu towi tau iya makessingngè, tenniya tau iya pojiyèngngi pallebbangngi karèba dè'è natongeng. Harusu'i mennang naisseng makuwasaiwi alèna sibawa malempu ri laleng sininna passalengngè. 12 Pabbantu jema'è harusu'i mappunnai banna sèddi bainè. Harusu'i naisseng matoro'i ana'-ana'na enrengngè ruma tanggana sibawa makessing. 13 Sining tau iya mabbantuè sibawa makessing ri laleng jema'è, ripakalebbii matu sibawa pèdè' baraniwi mabbicara passalenna atepperenna mennang ri Kristus. 14 Mammènasaka dè'na namaitta naucèllèngiko. Namuni makkuwaro, uwokii mutowi iyaè sure'è lao ri iko, 15 kuwammengngi rèkko matengnge'ka, muwissenni pèkkugi harusu tuwo selaku kaluwargana Allataala, iyanaritu jema'na Allataala iya tuwoè. Iyaè jema'è sinrupai alliri pappatettongngè sibawa rèngèèngngi pappagguruwang tongengngè iya polè ri Allataala. 16 Muwi sèddi tau dè'to mullèi massakkarengngi, temmaka loppona rahasiyana agamata: Nappaitangngi alèna ri laleng rupa tolinoè, sibawa ripannessa tongeng ri Rohna Allataala, enrengngè naita sining malaèka'è. Karèbanna ripamengngoi ri yelle'na bangsa-bangsaè, sibawa riyatepperi ri sininna linoè sibawa riyakka mènrè ri surugaè.
