1 Mula-mulanna uwèllauwi sibawa masero kuwammengngi parèllaungngè, sempajangngè, sibawa paddowangengngè enrengngè parèllau tarima kasi'è ripalettu'i ri Allataala untu' sininna tauwè; 2 untu' sining arungngè sibawa untu' sininna tauwè iya makkatenningngè akuwasang. Ellauwi kuwammengngi weddikki tuwo sibawa tennang enrengngè amang untu' Allataala sibawa kèdo-kèdo iya sipato'è. 3 Iyanaro makessing sibawa sennangiwi atinna Allataala, Pappassalama'ta. 4 Maèloi kuwammengngi sininna tauwè ripassalama'i sibawa naissengngi iya tongengngè. 5 Saba', banna engka sèddi Allataala, na pappallalang ri yelle'na Allataala sibawa tolinoè iyanaritu Kristus tolinoèro. 6 Purai nabbèrèyang Alèna untu' paleppe'i sininna tauwè polè ri dosa-dosana. Nanallalengiro nappaitangngi Allataala ri wettu iya teppa'è, makkedaè macinnai kuwammengngi sininna tauwè ripassalama'i. 7 Na iyanaro saba'na narisuroka lao risining tau iya tenniyaè Yahudi untu' mappallebbangengngi lao ri mennang biritta passalenna ateppereng iya tongengngè. Iya upangoloèwè iyanaritu tongengngi, dè' uwabbellè. 8 Uwèllauwi kuwammengngi muwi kègi massempajangngi worowanè sibawa ati iya mapaccingngè, dè namacai iyarè'ga massasa. 9 Sitinajai sining makkunraiè bèlo-bèloiwi alèna sibawa sitinajaè enrengngè pakè pakèyang iya sitinajaè. Aja' napakè modèlè gemme' iya makalallaingngè iyarè'ga parèwa-parèwa ulaweng iyarè'ga mutiyara, iyarè'ga pakèyang iya masuliè. 10 Sibalè'na, sitinajai makkunraiè bèlo-bèloiwi alèna sibawa pangkaukeng-pangkaukeng iya makessingngè pèkkugi iya sipato'è lao ri makkunrai iya massompaè ri Allataala. 11 Harusu'i magguru makkunraiè sibawa mammekko enrengngè mapato. 12 Dè' upattongengngi makkunraiè mappagguru iyarè'ga parèntai worowanè; harusu'i mammekko mennang. 13 Saba' iya bunge'-bunge'è ripancaji iyanaritu Adam sibawa rimunri mani nappa Hawa. 14 Na tenniya Adam, sangadinna makkunraiè ritu ribellè, angkanna najjalèkkai parèntana Allataala. 15 Namuni makkuwaro, salama'i matu makkunraiè ri laleng jajiyanna ana', assaleng alèna nasibawang ati mariyawa tette'i mateppe' lao ri Kristus sibawa tette' mamasèiwi tau laingngè enrengngè tuwo banna untu' Allataala.
