1 - 2 Timotius, ana'ku iya tongengngè ri laleng Puwangngè! Iyaè sure'è polèi ri iyya, Paulus, rasulna Kristus Yèsus situru parèntana Allataala, Pappassalama'ta sibawa ri laleng parèntana Kristus Yèsus, ammènasatta. Tennapodo Allataala Ambo'è sibawa Kristus Yèsus Puwatta mabbèrè barakka, pammasè asalèwangeng lao ri iko. 3 Macinnaka kuwammengngi tette'ko monro ri Efèsus pada-pada iya pura upakkolik-kolingengngèkko wettukku lao ri Makedonia. Saba' ri Efèsus engka siyagangngarè tau iya mappallebbangengngèngngi pappagguruwang iya dè'è natongeng. Na harusu'ko pappèsauwi mennang. 4 Powadangngi mennang kuwammengngi aja'na najampangiwi pau-pau rikadongngè sibawa curita-curita assalennaè iya dè'è pettunna. Iya manennaro banna paompo appangèwangeng bawang, sibawa dè' napamajuwi rancanana Allataala iya bannaè wedding riisseng naolai teppe'è lao ri Alèna. 5 Akkattana iyaro pangajaku iyanaritu kuwammengngi naullèi tauwè mappunnai ati iya tongengngè, sibawa ati marilaleng iya mapaccingngè enrengngè tonget-tongeng mateppe' ri Puwangngè, narimakkuwannanarro naullèi mennang mamasèi pada-padanna. 6 Engka sibagiyang tau iya dè'ènna natuwo iya pada-padaènnaro, pusai mennang ri laleng addebbakeng iya dè'è gaga gunana. 7 Macinnai mennang mancaji guru-guru agama, padahal alèna mennang dè' napahangngi ada-ada iya napakè mennang iyarè'ga gau'-gau' iya napangoloè mennang sibawa makkuwamani patepperinna. 8 Taissenni makkedaè hukkunna agamaè iyanaritu makessingngi, rèkko riyakkègunangngi pèkkugi mestinna. 9 Tentunna harusu'i riyèngngerang makkedaè riyèbbui hukkungngè tenniya lao ri tau iya makessingngè, sangadinna lao risining majjalèkkaiyèngngi hukkungngè, sining tau majaè, sining tau maja ampè, lao ri tau madosaè, tau dè'è naggama, tau linoèwè, lao risining tau mpunoèngngi ambo'na iyarè'ga indo'na, sining tau maègangngèngngi mabbuno, 10 lao ri tau pappangaddiè, sionrongngè pada-padanna worowanè, pacculi'è, pabbellèngngè, sabbi-sabbi bellè, sibawa nigi-nigi pogau' gau'-gau' iya sièwaè sibawa pappagguruwang iya tongengngè. 11 Iyaro pappagguruwangngè engkai ri laleng Karèba Madècèng iya appallebbangennaè riyappaddettangengngi lao ri iyya, iyanaritu Karèba Madècèng polè ri Allataala iya marajaè sibawa sipato'è ripoji. 12 Mattarima kasi'ka lao ri Kristus Yèsus Puwatta, purani nawèrèkka awatangeng untu' tumaningiwi, sibawa nangga'ka sitinaja untu' iyaro jamangngè, 13 namuni riyolo mappètenna'ka, sibawa maccalla enrengngè pakatunai Alèna. Iyakiya Allataala mamasèika, nasaba iyaro wettuè dè'pa umateppe, jaji dè' uwissengngi aga iya upogau'è. 14 Mala ribolloika sibawa pammasèna Puwatta. Nawèrèkka amampungeng untu' mateppe' ri Alèna sibawa mamasèiwi pada-padatta rupa tau. Iyaro amampungengngè nawèrèkki idi maneng iya massèddiè sibawa Kristus Yèsus. 15 Tongeng senna' iyaè ada-adaè -- rimakkuwannanaro sitinajai ritarima sibawa riyatepperi maneng --: "Polèi Kristus Yèsus ri linoèwè untu' passalama'i tau madosaè. " Na iyya'na tau madosa iya kaminang majaè. 16 Iyakiya mala nasaba iyaro nanamasèika Allataala, kuwammengngi weddingngi nappaitang asabbarakenna Kristus Yèsus lao ri iyya, tau iya kaminang madosaèwè. Na iyaè mancaji sèuwai conto untu' sininna tau iya mateppe'è matu matti lao ri Alèna sibawa lolongeng atuwong tongengngè sibawa mannennungengngè. 17 Allataala, Arunna sininna wettuè, sitinajai ripakalebbi sibawa tuli ripoji, saba' Alèna mannennungeng, iya dè'è napaita sibawa iya sèuwaè! Aming. 18 Timotius, ana'ku! Iyaè jamangngè upaddettangiko, rèkko riyèngngerangngi pasenna Allataala iya napalettu'è nabi-nabiè ri laleng jema'è passalenna alèmu. Sitinajai iyaro pasengngè mancaji bokong ri alèmu ri laleng angèwangeng iya makessingngè. 19 Ewano sibawa makkatenning ri laleng ateppereng iya tongengngè sibawa ati iya mapaccingngè. Engka tau dè' napaduliwi sadda ati marilalenna, angkanna ancuru'i atepperenna mennang. 20 Ri yelle'na iyanaritu Himènèus sibawa Alèksander. Iya duwa tauwèro purani uhukkung ri laleng mabbèrèyangngi lao ri Ibillisi', kuwammengngi nagguru mennang untu' mappèsau curupiyangiwi Allataala.
