1 Paccappurenna saudara-saudara, purani mpèrèkko conto passalenna pèkkugi harusu'ko tuwo untu' pèsennangiwi atinna Allataala. Mèmeng tuwono pada-padaèro. Iyakiya makkekkuwangngè nasaba akuwasanna Puwang Yèsus, riyèllauwi sibawa masero ri iko enrengngè maddessa kuwammengngi nalebbi makkuragasiko ri laleng gau'èro! 2 Saba' muwissenni panunju'-panunju' iya puraè riwèrèkko ri laleng akuwasanna Puwang Yèsus. 3 Iyanaè èlona Allataala: Kuwammengngi mutuwo untu' Alèna bawang, mabèlaiwi sininna pangkaukeng mappangaddiè. 4 Tungke' worowanè ri yelle'mu naharusu'i naisseng pèkkugi tuwo sibawa bainèna sibawa cara-cara iya sennangiyèngngi atinna Allataala sibawa rupa tauwè. 5 Aja' mutuwo maccowèriwi hawa napessummu lao ri bainèmu, pada-pada iya napogau'è tau iya dè'è naissengngi Allataala. 6 Ri laleng gau' pada-padaèwè, aja' namuwi sèddi tau pogau' asalang lao ri saudarana, iyarè'ga bengnguwangngi. Riyolo puraki' mabbirittangngi papparèngngerang iya matedde'è lao ri iko, makkedaè nahukkungngi matu Puwangngè sining tau iya pogau'èngngi sining asalang pada-padaèro. 7 Allataala mobbiki, tenniya kuwammengngi tatuwo mappangaddi, sangadinna kuwammengngi tatuwo iya pèsennangiyèngngi atin-Na. 8 Rimakkuwannanaro, tau iya dè'è natarimai pappagguruwangngèwè, tenniya bawang dè' natarimai rupa tauwè, sangadinna nasampèyangngi Allataala iya mabbèrèyangngèngngi Roh-Na iya mapaccingngè lao ri iko. 9 Dè'na naparelluki mokii lao ri iko passalenna pèkkugiko harusu mamasèiwi Saudara-saudara iya siyatepperengngè. Alèmuna pura ripagguru ri Allataala untu' siyamasèi. 10 Na iyaro gau'è purani muwappaitang maneng lao ri sininna saudara siyatepperengngè ri sininna Makedonia. Iyakiya Saudara-saudara, riyèllauwi sibawa masero, kuwammengngi nalebbi makessing pasi atuwommu. 11 Akkuragako tuwo sibawa tennang sibawa aja' mucampuru'i persoalanna tau laingngè. Sitinajako majjama sappai dallè', pada-pada riyolo pura riparèntangngèkko riyolo. 12 Rèkko tuwoko makkuwaro, dè'na nataggattukko muwi lao ri niga, sibawa sining tau iya dè'è namateppe' ri Kristus, napakarajako matu. 13 Saudara-saudara, macinnaki kuwammengngi muwissengngi iya sitongennaè passalenna sining tau iya matèènna; kuwammengngi dè' mumessè ati pada-pada sining tau laingngè iya dè'è nappunnai paddennuwang. 14 Mateppe'ki makkedaè purai matè Yèsus sibawa tuwoi paimeng. Iyanaro saba'na tamateppe'to makkedaè Allataala patuwoi matu paimeng sininna tau iya mateppe'è ri Yèsus iya matèènna, kuwammengngi natuwo mennang sibawa Alèna. 15 Passalenna gau'èro, iyanaritu pappagguruwanna Puwangngè iya puraè ripalettu ri iko: Wettunna Puwang Yèsus polè, idi iya tuwoè mupa dè' naripoddiyoloi matu sining tau iya matèènna lebbi riyolo. 16 Gorai matu mangobbi malaèka' marajaè sibawa sadda battowa enrengngè ripaoniwi tarompè'na Allataala selaku tanrang. Nainappa Puwang Yèsus nonno polè ri surugaè, sibawa sining tau Kristèng iya matèènna ripatuwoi matu lebbi riyolo. 17 Purairo, idi iya tuwoè mupa iyaro wettuè riyakkaki matu silaong mennang ri laleng ellungngè untu' siruntu Puwangngè ri langiè. Nainappaki monro matu silaong Puwangngè lettu mannennungeng. 18 Rimakkuwannanaro, sitinajako sisullè sipèwatangi ateppereng sibawa ada-adaèwè.
