1 Saudara-saudara jema'è ri Tèsalonika, iya mancajiyè umma'na Allataala Ambo'è sibawa Puwang Yèsus Kristus. Idi, iyanaritu Paulus, Silas sibawa Timotius mammènasa tennapodo Allataala mabbèrè barakka sibawa asalèwangeng lao ri iko. 2 - 3 Tuli sukkuru'ki lao ri Allataala nasaba Saudara maneng. Tungke' massempajakki lao ri Allataala sibawa Ambo'ta tuli riyèngngerakko. Tuli riyassempayangekko. Marèngngerakki pekkugiko mappaitangngi ri laleng pangkaukeng makkedaè mateppe'ko lao ri Kristus, pèkkugiko mamasèiwi tau laingngè angkanna tumaningiwi mennang, sibawa pèkkugiko maddennuwang masse lao ri Puwatta Yèsus Kristus. 4 Riisseng idi Saudara-saudara, makkedaè Allataala mamasèiko, sibawa pura pilèko mancaji appunnangen-Na iya mallaingngè. 5 Saba' idi palettu'i Karèba Madècèngngè lao ri iko tenniya sibawa ada-ada bawang, iyakiya nasibawatto akuwasang, nasibawang Rohna Allataala. Nasibawang ateppereng makkedaè iyaro Karèba Madècèngngè tongengngi. Muwisseng pèkkugiki tuwo untu' apentingemmu wettutta engka ri tengnga-tengngamu. 6 Muwaccowèriwi kèdo-kèdota sibawa kèdo-kèdona Puwangngè. Namuni manrasa-rasa senna'ko, mutarimai sibawa marennu karèba iya riyabbirittangngè lao ri iko. Iyaro arennungngè nabbèrèyangngi Rohna Allataala. 7 Nallalengiro mancaji contoko untu' sininna tau Kristèngngè iya engkaè ri Makedonia sibawa Akhaya. 8 Saba' mappammulai polè ri iko, biritta passalenna Puwangngè mallebbanni lettu ri Makedonia sibawa Akhaya. Na tenniya iyaro bawang, mala biritta passalenna pèkkugiko mateppe' lao ri Allataala lettu'ni kègi-kègi, angkanna dè'na taparelluna powadai agi-agi. 9 Sininna iyaro tauwè mabbicarai passalenna pèkkugiko tarimaki wettutta riyolo lao ri iko. Mabbicarai mennang passalenna pèkkugiko salaiwi barahala-barahalaè, sibawa lao ri sèddi-sèddinna Allataala iya tuwoè untu' mattumani ri Alèna. 10 Mabbicara towi mennang passalenna pèkkugiko mammènasaiwi apolènna Ana'na Allataala polè ri surugaè, iyanaritu Yèsus, iya puraè napatuwo Allataala polè ri amatèngngè. Yèsus èttonaro iya passalamaèkki polè ri caina Allataala iya mangoloè.
