1 Uwèllauwi napuriyati sining pamimpinna jema'mu. Uwokii iyaè selaku sellao pamimping enrengngè selaku tau iya alènaè pura sabbingngi anrasa-rasanna Kristus, sibawa iya turu'ètto matu ripakaraja, rèkko arajanna Kristus riyappaitangngi lao ri rupa tauwè. Uwèllauwi sibawa masero 2 na kuwammengngi muwampii mampii bimbala' iya nabbèrèyangngè Allataala lao ri iko. Ampii mennang sibawa masennang ati pada-pada iya nacinnaiyè Allataala, sibawa aja' nasibawangngi ati matane'è. Aja'to mupogau'i jama-jamammu untu' lolongeng asarong, sangadinna nasaba tonget-tongekko macinna mattumani. 3 Aja' mutinda' selaku panguwasa lao ri mennang iya riyappaddettangengngè lao ri iko, sangadinna ancajino conto untu' mennang. 4 Na ri wettunna polè matti iyaro Pakkampi Marajaè, tarimako matu passigera' iya lala'-lala'è, iya dè'è matu nabellang lala'-lala'na. 5 Makkuwatoro Saudara, sining tau maloloè. Tunru'no lao ri sining tau iya macowaè. Harusu manekko pakariyawai alèmu sibawa sisullè situmaningi sibawa mariyawa ati. Saba' ri laleng Kitta'è tarokii makkuwaè, "Naèwai Allataala tau iya matempoè, iyakiya namasèiwi tau iya pakariyawaèngngi atinna. " 6 Rimakkuwannanaro, pakariyawai alèmu ri yawa limanna Allataala iya mawatangngè, kuwammengngi napakatanrèko rèkko wettunna. 7 Abbèrèyangngi sininna abata-batammu lao ri Allataala, saba' alèna jampangiko. 8 Sitinajako matike' sibawa sadiya-sadiya! Saba' Ibillisi' iyanaritu balimmu. Pada-padai singaè iya joppaè lao tulili nangngautto sappai nanrèna. 9 Ewai sibawa teppe' iya masse'è, saba' muwissengngi makkedaè tau Kristèng laingngè ri sininna linoè manrasa-rasa towi pada-pada iko. 10 Iyakiya puramuna manrasa-rasa cinampe', alèna Allataala mèbbuko matu mancaji sukku. Napatettokko matu sibawa napèwatangiko enrengngè napakkasse'ko. Saba' Alèna iyanaritu Allataala iya makessing ati senna'è, iya puraè mobbiko untu' turu' pèrasaiwi arajan-Na iya mannennungengngè naolai Kristus. 11 Alèna ritu makuwasa lettu mannennungeng! Aming. 12 Sure'ku iya maponco'èwè uwokii lao ri iko sibawa pattulunna Silas, iya uwangga'è sèddi saudara Kristèng iya matinuluè. Macinnaka mpèrèngngi sumange' lao ri iko sibawa patepperiko makkedaè aga iya uwokièwè iyanaritu biritta passalenna pammasèna Allataala iya tongengngè. Sitinajako makkatenning masse ri pammasèro. 13 Sellao-sellao si jema'ta ri Babilonia, iya ripilèètto ri Allataala, masselleng lao ri iko, makkuwatoro ana'ku Markus iya upojiyè. 14 Siyasselles-sellengekko sèddiè lao ri laingngè sibawa penno pammasè selaku saudara Kristèng. Tennapodo Puwangngè mabbèrè asalèwangeng lao ri Saudara iya maneng iya mancajiyè appunnangenna Kristus. Salama, Pètrus
