1 Makkuwatoro iko, sining bainè, harusu'i tunru' lao ri lakkaiè kuwammengngi rèkko ri yelle'na mennang engka iya dè'è namateppe' lao ri biritta polè ri Allataala, ampè-ampèmu naullè mèbbui mennang mancaji mateppe'. Nadè' naparelluko powadai aga-aga lao ri mennang, 2 saba' naitai mennang ampè-ampèmu iya mapaccingngè sibawa makessing. 3 Aja'na agelloremmu banna agelloreng ri saliweng, pada-pada èbara'na bèlo-bèloiwi gemme'è iyarè'ga pakè parèwa ulaweng, iyarè'ga mappakè iya masuliè. 4 Sibalè'na, sitinajai agelloremmu mompoi polè ri laleng batèngngè, ampè-ampè iya malemma kininnawaè sibawa tennangngè; iyanaritu agelloreng mannennungengngè iya mangke' senna'è situru pakkitanna Allataala. 5 Nasibawang caraènnaè na ri wettu riyolo sining makkunrai maggamaè iya mammènasaè ri Allataala pagelloriwi alèna sibawa tunru'i lao ri lakkainna. 6 Makkuwatoro Sara, mapatoi lao ri Abraham sibawa nateppui puwanna. Saudara makkekkuwangngè iyanaritu ana'-ana'na Sara, rèkko mupogau'i gau'-gau' iya makessingngè sibawa dè' mumètau lao ri muwi aga. 7 Na ikoto, sining lakkaiè, sitinajano tuwo sibawa penno pappahang lao ri bainèmu, enrengngè nasibawang amaingekeng makkedaè mennang iyanaritu abbatireng iya malemmaè. Gaukengngi mennang sibawa malebbi, saba' silaokko mennang, tarimai matu pammasè atuwong mannennungeng polè ri Allataala. Pogau'i iyaè, kuwammengngi nadè' gaga lawa-lawaiwi sempajammu. 8 Rippe'na iyanaritu: sitinajai Saudara-saudara massèddi ada. Sitinajako sisullè siyamasè-masèi pada-pada tau massilessurengngè. Sibawa sitinajako sisullè siessèyang babuwa sibawa kèdo pakariyawai alè. 9 Aja' muwale'i jaè sibawa ja, iyarè'ga pakkaroddaè sibawa pakkarodda; sibalè'na wale'i sibawa parèllaung barakka polè ri Allataala. Saba' Allataala mobbiko mala kuwammengngi mutarima barakka polè ri alèna. 10 Ri laleng Kitta'è tarokii makkuwaè, "Tau iya maèloè pèneddingiwi atuwongngè sibawa maèlo pèneddingiwi esso-esso iya makessingngè, harusu'i najagai tèmunna kuwammengngi aja' nabbicara gau'-gau' majaè sibawa dè' napowadai gau'-gau' iya bellè. 11 Harusu'i mabèlaiwi iya majaè sibawa pogau'i makessingngè; sitinajai tonget-tongeng mèwa untu' lolongeng adamèngeng. 12 Saba' Puwangngè tuli jampangiwi sining tau iya turusiyèngngi èlo-Na, sibawa Puwangngè tuli mèngkalingai sining sempajanna mennang; iyakiya Puwangngè mèwai sining tau iya pogau'èngngi majaè. " 13 Nigana maèlo pogau'i majaè lao ri iko, rèkko masennakko pogau'i makessingngè? 14 Iyakiya namuni harusu'ko manrasa-rasa nasaba pogau'i gau'-gau' iya makessingngè, untu'ko! Aja' mumètau muwi lao ri niga, sibawa aja' mubata-bata. 15 Iyakiya ri laleng atimmu, sitinajako mabbèrèyangngi lao ri Kristus pappakalebbi iya dè'è padanna iya situruè sibawa tettongenna selaku Puwang. Sibawa sitinajako tuli sadiya untu' mappèbali lao ri tungke' tau iya makkutanaè passalenna ammènasang iya muwappunnangiyè. 16 Iyakiya pogau'i iyaro sibawa malemma kininnawa sibawa mappakaraja. Sibawa sitinajai ati marilalemmu mapaccing, kuwammengngi rèkko ripètenna'ko nasaba tuwoko sibawa makessing selaku Ana' gurunna Kristus, maka tau iya mappètenna'èro mancajiwi matu alèna muto masiri. 17 Lebbi kessing muwi manrasa-rasaè nasaba pogau'i makessingngè -- rèkko iyaro iyanaritu èlonai Allataala -- naiya manrasa-rasaè nasaba pogau'i majaè. 18 Saba' alèna Kristus sisemmi bawang matè lettu mannennungeng nasaba dosana tolinoè -- sèddiè tau iya dè'è napasala, matèi untu' tau iya pasalaè. Napogau'i Kristus iyaro kuwammengngi naullèi pimpikko lao ri Allataala. Riyunoi secara tubu, iyakiya ripatuwoi paimeng secara rohani. 19 Ri laleng keadaang roh laowi mabbirittangngi karèba polè ri Allataala lao ri roh-roh iya ritarungkuè; 20 iyanaritu rohna sining tau iya dè'è namateppe' ri Allataala ri wettunna Nuh. Iyaro wettuè mattajengngi Allataala sibawa sabbara ri wettu naèbbuna mupa Nuh kappala'na. Banna sining tau iya engkaè ri kappala'è bawang -- iya manenna aruwa tau -- iya ripassalama'è naolai lèmpe loppoèro. 21 Nah, iyaro kajajiyangngè sinrupai èbara'na acemmèngngè iya makkekkuwangngèwè passalama'ko. Iyaè acemmèngngè tenniya sèuwa upacara mappèpaccing alè polè ri sininna iya macarèpaè, sangadinna sinrupai jancimmu lao ri Allataala polè ri ati marilaleng iya makessingngè. Iyaro acemmèngngè napassalama'ko nasaba Yèsus Kristus tuwoni paimeng polè ri amatèngngè, 22 sibawa mènrè'ni ri surugaè. Makkekkuwangngè makuwasai silaong Allataala sibawa parèntai sininna malaèka'è, sininna panguwasaè enrengngè sininna awatangengngè.
