1 Rimakkuwannanaro, buwanni polè ri alèmu sininna iya majaè; aja'na muwabbellè, sibawa aja' muwabbonga-bonga. Aja' muwangèmpuru, sibawa aja' mupakatunai tau laingngè. 2 Sitinajako mancaji pada-pada ana'loloè iya silalonaè jaji, tuli madekka lao ri susu rohaniè iya mapaccingngè. Nanallalengiro nawekke'ko sibawa ripassalama'. 3 Ri laleng Kitta'è tarokii makkuwaè, "Alèmuna pura pèrasaiwi pèkkugi kessinna Puwangngè. " 4 Rimakkuwannanaro, laono ri Puwangngè. Sinrupai batu iya tuwoè, batu iya nabuwangngè tauwè nasaba nangga'i dè' nakkèguna; iyakiya iya napilè Allataala selaku batu iya mangke'è. 5 Iko pada-padako batu-batu iya tuwoè. Rimakkuwannanaro sitinajako maèlo ripakè untu' patettongngi Bolana Allataala iya rohaniè. Nanallalengiro mancajiko imang-ngimang iya tuwoè banna untu' Allataala, sibawa iya naolaèngngi Yèsus Kristus makkasuwiyangengngi lao ri Allataala, akkarobangeng rohani iya naèloriyè atinna Allataala. 6 Nasaba ri laleng Kitta'è tarokii makkuwaè, "Purani upilè sèddi batu iya mangke'è, iya Utaroè ri Sion selaku batu iya pentingngè; na tau iya mateppe'è ri Alèna dè' naripakacèlè matu. " 7 Iyaro batuè mangke' senna' untu' iko iya mateppe'è. Iyakiya untu' sining tau iya dè'è namateppe', nakennai aya'-aya'na Kitta'èwè, "Batu iya dè'è napakèi sining tukang bangunangngè mancajiwi batu iya pentingngè. " 8 sibawa "Iyanaro batu iya mèbbuèngngi tauwè tabbuttu, batu iya mèbbuèngngi mennang menrung. " Tabbuttui mennang nasaba dè' namateppe' mennang lao ri ada-adanna Allataala. Makkuwatoniro pura napattentu Allataala passalenna mennang. 9 Iyakiya iko iyanaritu bangsa iya ripilè, imang-ngimang iya tumaningiyèngngi Arungngè, bangsa iya mapaccingngè, banna untu' Allataala, umma'na muto Allataala. Allataala pilèko sibawa mobbiko massu polè ri pettangngè untu' muttama ri laleng tajanna iya mattappaè, sibawa akkatta kuwammengngi muwappallebbangengngi biritta passalenna sining pangkaukenna iya dè'è padanna. 10 Riyolo tenniyako umma'na Allataala, iyakiya makkekkuwangngè iko iyanaritu umma'na Allataala. Riyolo dè' nariyamasèiko ri Allataala, iyakiya makkekkuwangngè tarimako paressè babuwa. 11 Saudara-saudara iya ripojiyè! Iko iyanaritu tau polè-polè sibawa passollè ri linoèwè. Rimakkuwannanaro uwèllauwi sibawa masero kuwammengngi aja' muwaccowèriwi hawa napessu tolinomu iya tuli mammusuè mèwai nyawaè. 12 Ampè-ampèmu ri yelle'na tau iya dè'è naissengngi Puwangngè harusu'i makessing senna', angkanna rèkko napètenna'ko selaku tau maja, harusu'i mennang nangakui pangkaukemmu iya makessingngè, angkanna napojiwi matu mennang Allataala ri Esso apolèn-Na. 13 Nasabbing Puwangngè, sitinajako tunru' lao ri tungke' iya makuwasaiyèngngi rupa tauwè: muwi lao ri Kaisar iya mancaji panguwasa iya poko'è, 14 iyarè'ga lao ri gubernur-è iya najello'è Kaisar untu' hukkungngi tau iya pogau'èngngi majaè sibawa untu' pakalebbii tau iya pogau'èngngi makessingngè. 15 Saba' maèloi Allataala kuwammengngi nasibawangngi pangkaukemmu iya makessingngè mututu'i tèmunna tau iya mabbicara madonggoè. 16 Sitinajako tuwo selaku tau maradèka', iyakiya aja' mupakèi amaradèkammuro untu' tongkoi majaè, sangadinna tuwono selaku atanna Allataala. 17 Angke'i sininna tauwè, amasèiwi saudara-saudaramu pada-padammu Kristèng. Etauno lao ri Allataala, sibawa pakalebbii Kaisar. 18 Saudara-saudara iya mancaji pattumaniè, tunru'no ri ponggawamu sibawa mappakalebbi, tenniya bawang lao ri mennang iya makessing atiè sibawa mabessaè, iyakiya laoto ri iya mapèddaraè. 19 Allataala barakkakiko matu, rèkko nasaba mainge'ko ri èlona Allataala, sabbara'ko manrasa-rasa rigaukeng ri tau iya dè'è naadèlè'. 20 Saba' aga alebbimmu rèkko sabbara'i manrasa-rasa pahukkungeng iya harusu'è mutanggung nasaba pasalako? Iyakiya rèkko sabbara'ko tarimai anrasa-rasang iya kennaèkko nasaba pogau'ko iya tongengngè, Allataala barakkakiko matu. 21 Untu' iyanaro Allataala naobbiko. Saba' alèna Kristus pura manrasa-rasa untu'mu, nanallalengiro nabbèrèyangngi lao ri iko sèuwa conto, kuwammengngi muwaccowèriwi batè-Na. 22 Dè' naengka napogau' dosa, sibawa dè' naengka muwi sèddi tau mèngkalingai mabbellè. 23 Iyaro wettuè rirodda-roddaiwi, dè' nappèbali sibawa makkarodda-karodda. Wettunna manrasa-rasa, dè' nangancang; banna nabbèrèyangngi parakara-Na lao ri Allataala, Haking iya adèlè'èro. 24 Kristus muto mèssangngi dosa-dosata ri Alèna ri yasè'na aju salliè, kuwammengngi bèbasa'i polè ri akuwasanna dosaè, sibawa tuwo manuru' èlona Allataala. Lolona Kristus pajjappako. 25 Riyolo pada-padako bimbala' iya pusaè, iyakiya makkekkuwangngè ritiwiko lisu untu' maccowèriwi Pakkampi sibawa Pappiyara nyawamu.
