1 - 2 Saudara-saudara umma' napilèna Allataala, iya tassiyaè ri laona ri daèra Pontus, Galatia, Kapodokia, Asia sibawa Bitinia! Iyya, Pètrus, rasulna Yèsus Kristus, mammènasa tennapodo Allataala mabbèrè barakka sibawa asalèwangeng ri iko sibawa tabbollompollong. Ripilèko mancaji umma'na Allataala situru sibawa rancanana Allataala Ambo'è. Sibawa Rohna Allataala pura pancajiko umma' iya mapaccingngè, banna untu' Allataala, kuwammengngi mumatinulu lao ri Yèsus Kristus sibawa ripaccingi ri dara-Na. 3 Laono mai tasukkuru ri Allataala, Ambo'na Puwatta Yèsus Kristus! Namasèi senna'ki, iyanaro saba'na nawèrèkki atuwong mabaru, ri laleng napatuwona paimeng Yèsus Kristus polè ri amatèngngè. Iyaè nawèrèkki ammènasang iya mannennungengngè. 4 Mammènasaki untu' mappunnaiwi barakka-barakka iya napassadiyaè Allataala untu' umma'-Na, iyanaritu barakka-barakka iya Nataroè ri surugaè, angkanna dè' naullèi masolang, iyarè'ga mancaji makebbong iyarè'ga lengngè. 5 Iya manenna iyanaritu untu'mu, nasaba mateppe'ko ri Allataala. Narijagaiko sibawa akuwasanna Allataala kuwammengngi mutarimai asalamakeng iya sadiyaènna ripannessa ri ahèra' matti. 6 Rimakkuwannanaro sitinajako masennang ati, namuni makkekkuwangngè untu' cinampe' harusu'ko mancaji tassinnau nasaba mupèneddingiwi maddupa-rupang paccobang. 7 Akkattana iyanaritu pabuttiwi tonget-tongekkoga mateppe' ri Puwangngè iyarè'ga dè'. Muwi ulaweng iya weddingngè masolang, riojiwi sibawa api. Nah, teppe'mu lebbi mangke'i naiya ulawengngè, jaji harusu towi rioji kuwammengngi nancaji mattinetto. Nanallalengiro murioji matu enrengngè ripakalebbi kuwaèttopa ripakatanrè ri Essona Yèsus Kristus polè paimeng. 8 Muwamasèiwi Alèna, namuni riyolo dè' muwitai. Sibawa mateppe'ko ri Alèna namuni makkekkuwangngè dè' muwitai. Iyanaro saba'na namarennuko, sibawa pèrasaiwi ariyo-riyong iya battowaè sibawa iya dè'è naripowada. 9 Saba' akkattana teppe'mu maddupai, iyanaritu asalamakenna nyawamu. 10 Iyanaè asalamakengngè iya riparèssaè madècèd-dècèng sibawa risalidiki risining nabiè, nanabotoi mennang passalenna barakka iya nabbèrèyangngè Allataala lao ri iko. 11 Nasalidikiwi mennang pèkkugi sibawa uppanna iyaro gau'è kajajiyang matu, iya nakkattaiyè Rohna Kristus iya engkaè ri laleng alèna. Iyaro wettuè nabotoi Roh-Na lao ri mennang passalenna anrasa-rasang iya harusu'è napèneddingi Kristus sibawa passalenna arajan-Na iya maccinrolaè matu rèkko purairo. 12 Lao ri nabi-nabièro nappaddissengengngi Allataala makkedaè aga iya napogau'è mennang tenniya untu' apentingenna mennang, sangadinna untu'mu; iyanaritu gau'-gau' makkekkuwangngèwè muwèngkalinga sibawa manessa polè risining pabbiritta Karèba Madecèngngè passalenna Yèsus Kristus. Napalettu'i mennang gau'-gau'èro lao ri iko sibawa akuwasanna Rohna Allataala iya Nakiringngè polè ri surugaè. Mala muwi sining malaèka'è macinna towi missengngi karèba iya nabbirittangngèro mennang. 13 Rimakkuwannanaro, sitinajako sadiya-sadiya. Atike'ko sibawa ammènasa manenno ri barakka iya maèloè riwèrèngngèkko ri wettunna polè Yèsus Kristus matti. 14 Atinuluno ri Allataala, sibawa aja'na mutuwo situru pangèloremmu riyolo, ri wettummu dè'pa muwissengngi Allataala. 15 Sibalè'na, sitinajako mapaccing ri laleng sininna gau'è iya mupogau'è, pada-pada Allataala iya mobbièkko mapaccingngi. 16 Ri laleng Kitta'è tarokii, "Sitinajako mapaccing, saba' mapaccik-Ka. " 17 Muteppui iyaro Allataala Ambo' ri wettummu massempajang ri Alèna. Nah, Allataalaènnaro madèlèkiwi tolinoè sicoco' sibawa pangkaukenna tungke'-tungke' temmappasilaingeng. Rimakkuwannanaro, ri wettu engkamu mupa ri linoèwè, sitinajako pakarajai Allataala ri laleng atuwommu. 18 Muwisseng aga iya puraè nakkamajareng untu' paleppe'ko polè ri atuwong iya siya-siyaè iya nappammanarengngè nènè-nènèmu. Pakkamajana tenniya sèuwa iya weddingngè masolang pada-pada pèra'è iyarè'ga ulawengngè, 19 sangadinna sèuwai iya mangke'è; iyanaritu alèna muto Kristus, iya mancajiyè selaku bimbala' iya nakkarobangengngè lao ri Allataala iya dè'è ricèccèiyangngi iyarè'ga cellana. 20 Purani ripilè Kristus ri Allataala riwettu dè'napa naripancaji linoè. Na ri esso-esso macawè'nana paccappurenna linoèwè, polèi ri linoè kuwammengngi naripassalama'ko. 21 Naolai Alèna ritu namateppe'ko ri Allataala iya puraè patuwoi paimeng polè ri amatèngngè sibawa arajan-Na. Jaji, Allataala ritu iya muwatepperiyè sibawa lao ri Allataalato ritu mammènasako. 22 Nasaba mapatoko ri pappagguruwang polè ri Allataala, namupèpaccingiwi alèmu sibawa mamasèiwi sining tau siatepperengngè sibawa macenning. Rimakkuwannanaro, sitinajako mamasèiwi sèddiè lao ri laingngè sibawa sukku atinna. 23 Saba' naolai saddanna Allataala iya tuwoè sibawa mannennungengngèro, purano ripancaji rupa tau mabaru iya dè'è najaji polè ri tolinoè, sangadinna polè ri Ambo' iya mannennungengngè. 24 Ri laleng Kitta'è tarokii makkuwaè, "Sininna rupa tauwè sinrupai wellaè, sibawa sininna arajanna pada-padai unga wellaè. Makelle'i wellaè, maddunu towi unganna; 25 iyakiya saddanna Puwangngè tette'i lettu mannennungeng. " Saddaènna ritu Karèba Madècèng iya puraè riyabbirittang lao ri iko.
