1 Lise'na iyaè sure'è iyanaritu passalenna Sadda iya mabbèrè atuwong, iyanaritu Sadda iya engkaènna sipongenna pammulanna mupa. Purani riyèngkalinga enrengngè purani riita sibawa mata alèta. Purani riita, enrengngè purani riyakkatenning sibawa limatta. 2 Wettunna iyaro atuwongngè ripannessa, alèta mitai. Iyanaro saba'na tamabbèrè asabbing passalenna alèna. Idi mabbirittangngi lao ri iko passalenna atuwong tongengngè sibawa mannennungengngè, iya engkaè silaong Ambo'è, enrengngè iya puraè ripannessa lao ri idi. 3 Aga iya puraè riita sibawa riyèngkalinga, iyanaro riyabbirittang lao ri iko, kuwammengngi musibawakki maccowè mattemmeriwi atuwongngè, massèddi sibawa Ambo'è kuwaèttopa Ana'na Yèsus Kristus. 4 Riyokii iyaè kuwammengngi natonget-tongeng masennang atitta. 5 Iyanaè biritta iya puraè riyèngkalinga polè ri Ana'-Na sibawa iya tapalettu'è lao ri iko! Iyaro Allataala tajangngi, sibawa ri Alèna dè' siseng gaga apettangeng. 6 Rèkko makkedai makkedaè tuwoki massèddi sibawa Alèna, padahal tuwoki ri laleng apettangengngè, tentu mabbellèki muwi nasibawang ada-ada iyarè'ga pangkaukeng. 7 Iyakiya rèkko tuwoki ri laleng tajangngè pada-pada Allataala engka ri laleng tajangngè, tentu tuwoki mareppè enrengngè sipammasè-masè sèddiè lao ri laingngè, sibawa darana Yèsus, Ana'-Na, pèpaccingiki polè ri sininna dosaè. 8 Rèkko makkedaki makkedaè dè' tamadosa, ribellèi alèta muto; sibawa Allataala dè' naengka ri laleng atitta. 9 Iyakiya rèkko tangakuiwi dosa-dosata lao ri Allataala, narupaiwi matu jancin-Na sibawa napogau'i aga iya adèlè'è. Naddampengengngi dosa-dosata sibawa napèpaccingiki polè ri sininna pangkauketta iya salaè. 10 Iyakiya rèkko makkedaki makkedaè dè' tamadosa, mappallolongekki samanna Allataala pabbellèng; bettuwanna dè' tataroi ada-adanna Allataala ri atitta.
