1 Tenniyaka'ga tau maradèka'? Tenniyaka'ga rasul? Dè'paga naengka uwitai Yèsus, Puwatta? Dè'ga na iko wassèlè jama-jamakku untu' Puwangngè? 2 Namuni sining tau laingngè dè' namaèlo mangakuika selaku rasul, kaminang cèddè'na muwakuiwi iyaro! Saba' atuwommu selaku tau Kristèng iyanaritu butti makkedaè iyya sèddika rasul. 3 Rèkko nacellaka tauwè, maèloka baliwi makkuwaèwè: 4 Dè'ga gaga ha'ku tarimai anrèkanrè sibawa ènungeng nasaba jama-jamakku? 5 Dè'ga gaga ha'ku tiwi sèddi bainè Kristèng sibawakka ri laleng allalengekku, pada-pada iya napogau'è saudara-saudarana Puwang Yèsus sibawa rasul-rasul laing-laingngè, muttama' toni Pètrus? 6 Iyarè'ga banna Barnabas sibawa iyya bawang iya riharusu'kangngè sappai nanrèna muto? 7 Dè'gaga anggota tentara iya harusu'è mongkosokiwi alèna ri laleng atentarangngè! Dè'gaga patani iya mattaneng anggoro'è ri dare'na nainappa dè' nanrèi wassèlè anggoro polè ri dare'èro! Dè'gaga pakkampi iya piyaraè bimbala', nainappa dè' naènung susu polè ri bimbala'-bimbala'naro! 8 Upangoloi iyaro tenniya bawang situru iya biyasaè ri laleng pangalamang esso-essoè, iyakiya nasaba Kitta'è napangolo towi gau'èro. 9 Ri laleng Kitta'na Musa tarokii, "Rèkko mattengngangngi sapingngè rèse'i gandongngè untu' malleppessangngi gandongngè polè ri olina, aja' na ringong pannyoro'na. " Sapingngègga najampangi Allataala? 10 Iyarè'ga iyaro akkattana untu' idi? Mèmeng tarokii iyaro untu' idi. Saba' tau iya jamaèngngi dare'è sibawa tau iya pancajiyèngngi gandonna mèmeng sitinajai majjama nasibawang ammènasang untu' tarimai sibagiyang polè ri wassèlè jama-jamanna. 11 Purani' mampo binè rohani ri laleng atuwo-tuwonna saudara-saudara. Narèkko mèngngalaki barakka-barakka maddupa barab-barangngè polè ri iko, aga iyaro bettuwanna maèga senna' rituntu' polè ri iko? 12 Rèkko sining tau laingngè mappunnai ha' mammènasaiwi iyaè polè ri iko, dè'ga talebbi mappunnai ha' naiya mennang? Iyakiya iyya dè' uwakkègunangngi iyaro ha'è. Sibalè'na lebbi upojiwi tanggungngi sining-sininnaè naiya paompoè sèddi gau' iya halangiyèngngi appallebbangenna Karèba Madècèngngè passalenna Kristus. 13 Tentu naisseng Saudara makkedaè tau iya majjamaè ri laleng Bolana Allataala natarimai inanrèna mennang polè ri Bolana Allataala. Sibawa sining tau iya murusu'èngngi onrong akkasuwiyangeng akkarobangengngè, lolongengngi sibagiyang polè ri akkarobangeng iya nakkasuwiyangengngè kuwaro. 14 Makkuwatoro Puwangngè pura pattentui makkedaè tau iya mabbirittangngèngngi iyaro Karèba Madècèngngè harusu'i lolongeng inanrè polè ri appallebbangennaro. 15 Iyakiya dè'pa naengka upakèi muwi sèddi ha'ku polè ri ha'-ha'èro. Nauwokii iyaè sure'èwè tenniyato akkattana kuwammengngi gau'-gau'èro rigaukekka makkekkuwangngè. Lebbi kessing muwi matèka naiya ateddèngekka gau' iya uwammingkikengngèro. 16 Nasaba, rèkko iyaro banna persoalang mabbirittangngi Karèba Madècèng polè ri Allataala, tentu iyya dè' gaga ha'ku mingkiingki, saba' Allataala pura parèntakka untu' pogau'i. Cilakana iyya, rèkko dè' uwabbirittangngi iyaro Karèba Madècèngngè! 17 Akkalarapanna upajoppai jama-jamakkuro nasaba èloku, tentu weddikka mammènasa untu' lolongeng saro. Iyakiya uwabbirittangngi Karèba Madècèngngèro mala nasaba riwaji'kangnga. Risuroka ri Allataala untu' pogau'i iyaro. 18 Rèkko makkuwaitu, aga saroku? Iyanaè saroku: makkedaè weddikka mabbirittangngi Karèba Madècèngngèro sibawa dè' utanekiwi muwi sèddiè tau untu' mongkosokika, nasaba dè' utuntu'i ha'-ha'ku selaku pabbiritta Karèba Madècèngngèro. 19 Iyya'è tenniyaka atanna muwi niga; maradèkaka. Namuni makkuwaro, upancajiwi iyaè alèku ata lao ri sininna tauwè. Upogau'i iyaro kuwammengngi uwullèi malangngi tau singngèga-ègana untu' Kristus. 20 Lao ri tau Yahudi, kèdoka selaku tau Yahudiè kuwammengngi weddikka tiwii ri Kristus tau Yahudiè. Lao risining tau iya tuwoè situru hukkunna Musa, kèdoka samanna tassiyoka ri hukkungngèro, namuni sitongenna dè' utassiyo ri hukkungngèro. Upogau'i iyaro, kuwammengngi weddikka tiwii ri Kristus iyaro sining tauwè. 21 Lao ri tau tenniyaè Yahudi, kèdoka pada-pada sèddiè tau tenniya Yahudi, iyaè tauwè ri saliwennai hukkunna Musa. Upogau'i iyaro kuwammengngi weddikka tiwii ri Kristus iyaro sining tauwè. Iyakiya tenniya bettuwanna iyaro makkedaè dè' umatinulu lao ri parènta-parèntana Allataala; mala rikuwasaika ri parènta-parèntana Kristus. 22 Ri tengnga-tengngana sining tau iya malèrè teppe'na, kèdo tokka pada-pada tau iya malèrè teppe'na kuwammengngi weddikka gettengngi mancaji ana' gurunna Kristus. Rippe'na, mancajika sini-sininnaè untu' sininna tauwè kuwammengngi nallalengi muwi pèkkugi weddikka passalama'i sibagiyang polè ri mennang. 23 Iya manennaro upogau'i untu' iyaro Karèba Madècèng polè ri Allataala, kuwammengngi maccowè tokka ribarakkaki. 24 Tentu naisseng Saudara makkedaè ri laleng akkalaringngè sininna tomaccowèè lari manengngi, iyakiya banna sèddi tau bawang tarima hadiya. Rimakkuwannanaro larino pèkkugi carana angkanna Saudara tarimai hadiyana. 25 Tungke' tau iya mattengngangngè ri laleng latihangngè, tahangngi alèna ri laleng sininna passalengngè. Napogau'i iyaro nasaba macinnai ripaggènoi bunga apakalang, iyanaritu bunga iya dè'è namaitta namakelle. Iyakiya idi'è ritahangngi alè ri laleng sininna gau'è nasaba macinnaki ripaggènoi sibawa bunga apakalang iya dè'è namakelle matu. 26 Iyanaro saba'na ulari sibawa akkatta iya mattentuè. Pada-pada ri laleng attandingeng sijagguru'è, dè' uwajjagguru sembarangeng. 27 Uleppessangngi watakkalèku riwinru sibawa matedde narapi weddikka kuwasaiwi. Upogau'i makkuwaèro, saba' dè' umaèlo narapi kajajiyang makkedaè purani uwèra tau laingngè maccowè ri laleng akkalaringngèro, na alèku risampèyang.
