1 Makkekkuwangngè passalenna anrèkanrè iya riyabbèrèyangngè selaku pakkasuwiyang lao ri barahalaè. Mèmeng tongeng pada-pada adanna tauwè, "Macca manenni. " Iyakiya amaccangngè mèbbui tauwè mancaji matempo, padahal pammasè napatokkongngi paribadinna tauwè. 2 Tau iya masengngèngngi maèga naisseng, sitongenna dè'pa naissengngi iya kaminang malamungngè. 3 Iyakiya tau iya tonget-tongengngè mamasèiwi Allataala, riissengngi ri Allataala. 4 Passalenna manrè anrèkanrè iya puraè riyakkasuwiyangeng ri barahalaè, riissenni makkedaè barahalaè maddapangengngi sèuwaè iya sitongennaè dè'gaga. Na riisseng towi makkedaè Allataala banna sèddi bawang; dè'gaga laingngè. 5 Mèmeng maègato aga iya riyasengngè dèwata iyarè'ga puwang; muwi iya engkaè ri langiè muwi iya engkaè ri yasè'na tanaè. 6 Iyakiya untu' idi, Allataala banna sèddi. Ambo'i iya mpinruèngngi sininna sèuwa-sèuwaè. Untu' Alèna ritu tatuwo. Na Puwangngè sèddi tommi bawang, iyanaritu Yèsus Kristus. Naolai Alèna nariwinru sininna sèuwa-sèuwaè, sibawa nasaba Alèna natatuwo. 7 Namuni makkuwaro, dè' naiya maneng tauwè naisseng gau'èro. Engka riyolo biyasana massompa barahala. Jaji, rimakkuwannanaro muwi lettu makkekkuwangngè naseng mupi mennang makkedaè anrèkanrè iya puraè riyakkasuwiyangeng lao ri barahalaè, iyanaritu anrèkanrènna barahalaè. Narèkko nanrèi iyaro anrèkanrè, marasa madosai mennang; nasaba dè'pa namatedde atepperenna. 8 Sitongenna iyaro anrèkanrè dè' naèbbui assisumpungetta sibawa Allataala mancaji lebbi madècèng. Rèkko riyanrèi iyaro anrèkanrè, dè' gaga asarong rilolongeng. Sibalè'na rèkko dè' tanrèi iyaro anrèkanrè, dè'to tarogi aga-aga. 9 Iyakiya, atike'ko! Aja' narapii kajajiyang makkedaè tau laingngè madosa -- nasaba dè'pa namatedde atepperenna -- nasaba laluwasai Saudara pogau'i agi-agi. 10 Akkattaku makkuwaiyè: Akkalarapanna Saudara, iya mappunnaiyè ateppereng iya matedde'ènna, mattengngang tudang manrè ri bola abbarahalangngè. Nainappa sèddiè tau mitai Saudara tudang manrè kuwaro. Rèkko atepperenna iyaro tauwè dè' namatedde, dè'ga na iyaro naèbbui matu iyaro tauwè barani manrèi anrèkanrè iya puraè riyabbèrèyang lao ri barahalaèro? 11 Narimakkuwannanaro, atepperenna Saudara mèbbui tau iya atepperennaè dè' namatedde'ro mancaji pusa. Padahal matèi Kristus untu' iyaro tauwè. 12 Narèkko pogau'i Saudara asalang pada-padaèro lao ri Saudara-saudara Kristèngngè -- iyanaritu nasolangiwi Saudara atepperenna mennang iya malemmaè -- tentu madosai Saudara lao ri Kristus. 13 Iyanaro saba'na, rèkko anrèkanrè nassabariwi Saudaraku madosa, tentu dè' sises-siseng umaèlo manrèi jukuènnaro. Saba' ajakkè madosai Saudaraku nasaba iyya.
