1 Sitinajako makkuraga untu' mamasèiwi tau laingè. Sibawa makkuragato tarimai sining pabbèrè iya nabbèrèyangngè Rohna Allataala, lebbi-lebbipi amampungengngè untu' palettu'i rancana-rancanana Allataala lao ri tolinoè. 2 Tau iya mabbicaraè ri laleng basa iya makalallaingngè, iyaro tauwè dè' nabbicara lao ri tolinoè; mabbicarai lao ri Allataala. Dè'gaga tau iya pahangngèngngi aga napowadaè, saba' Rohna Allataala nassabariwi nanapowadai-adai gau'-gau' iya bannaè Allataala missengngi. 3 Sibalè'na tau iya palettu'èngngi biritta polè ri Allataala, napalettu'i lao ri rupa tauwè; untu' pèwatangiwi mennang, untu' mpèrèngngi sumange' mennang sibawa untu' salèworiwi mennang. 4 Tau iya mabbicaraè ri laleng basa iya makalallaingngè banna napèwatangiwi alèna bawang, na tau iya palettu'èngngi biritta polè ri Allataala natulungngi jema'è mancaji maju. 5 Temmaka kessinna rèkko naullè manengngi Saudara mabbicara sibawa maddupa-rupang basa iya makalallaingngè. Iyakiya iya kaminang makessingngè iyanaritu rèkko naullèi Saudara mabbirittangngi rancana-rancanana Allataala. Saba' tau iya palettu'èngngi biritta polè ri Allataala, lebbi battowai naiya tau iya mabbicaraè sibawa maddupa-rupang basa iya makalallaingngè; silaingengngi rèkko tau iya mabbicaraè ri laleng maddupa-rupang basa iya makalallaingngèro naullèi pakatajangngi aga iya napowadaèro, kuwammengngi nasininna jema'è lolongengngi appalanna. 6 Rèkko èbara'na laoka ri iko sibawa mabbicara ri laleng maddupa-rupang basa iya makalallaingngè, aga appalanna iyaro lao ri iko? Dè'gaga appalanna muwi cèddè! Silaingengngi rèkko upannessai sèuwa pappakatajang polè ri Allataala, iyarè'ga upakatajangngi sèuwaè passalenna Allataala, iyarè'ga palettu'i biritta polè ri Allataala, iyarè'ga mappagguruka. 7 Parèwa oni-oni iya dè'è nannyawa muwi cèddè, padaènna èbara'na sulingngè sibawa kacapiè, rèkko lagu-lagunna dè' nariyacculèyang sibawa manessa, pèkkugi tauwè naissengngi lagu aga iya riyacculèyangngè? 8 Sèuwa conto iya laingngèssi: Rèkko sembarangngi ripaoni tarompè'è, nigana maèlo sadiya untu' mammusu? 9 Makkuwatoniro sibawa amampungemmu untu' mabbicara sibawa maddupa-rupang basa iya makalallaingngè. Rèkko Saudara sibawa iyaro amampungengngè powadai ada-ada iya dè'è namanessa, dè'gaga sèddi tau iya weddingngè pahangngi aga iya napowadaè Saudara. Iyaro ada-adammu lennye'i matu temmattentu. 10 Ri linoèwè engka siyagangngarè ègana basa, iyakiya dè' muwi sèddi polè ri basa-basaèro iya dè'è nappunnai bettuwang. 11 Iyakiya rèkko dè' upahangngi basa iya napakè sèddiè tau, tentu tau iya pakèyèngngi iyaro basaè sinrupai tau polè-polè lao ri iyya; makkuwatoro iyya lao ri alèna. 12 Passalenna alèmu, uwisseng macinna senna'ko lolongeng sining wèrè polè ri Rohna Allataala. Iyakiya iya poko' senna'è, harusu'ko makkuraga untu' pakèi amampungeng iya tulungngèngngi jema'è mancaji maju. 13 Iyanaro saba'na tau iya mabbicaraè ri laleng basa iya makalallaingngè, harusu'i naèllau ri Allataala kuwammengngi nariwèrèng towi amampungeng untu' pakatajangngi aga iya napowadaèro. 14 Saba' rèkko massempajakka sibawa basa iya makalallaingngè, mèmeng massempajangngi rohku, iyakiya pikkirakku dè' najjama. 15 Jaji, aga harusu' upogau'? Iyaè harusu' upogau': Maèloka massempajang sibawa rohku, iyakiya maèlo tokka massempajang sibawa pikkirakku. Maèloka makkèlong sibawa rohku, iyakiya maèlo tokka makkèlong sibawa pikkirakku. 16 Saba' rèkko mattarima kasi'i Saudara lao ri Allataala sibawa rohna bawang, na engka tau laing iya dè'è napahangngi iyaro basa makalallaing polè ri Rohna Allataala, tentu iyaro tauwè dè' naullèi makkeda, "Usitujuiwi" iyaro sempajang sukkuru'mu; nasaba dè' naissengngi aga napowada Saudara. 17 Namuni iyaro sempajang tarima kasi'mu lao ri Puwangngè makessing senna', iyakiya iyaro sempajangngè dè' sises-siseng gaga akkègunana lao ri tau laingngè. 18 Mattarima kasi'ka lao ri Allataala saba' uwullèi mabbicara ri laleng maddupa-rupang basa iya makalallaingngè lebbi na iko maneng. 19 Iyakiya ri laleng addeppu-deppungengngè untu' sompai Puwangngè, lebbi upojiwi pakèi lima ada-ada iya naullè pahangngi tauwè naiya pakèi massebbu-sebbu ada-ada ri laleng basa iya makalallaingngè. Lebbi upojiwi makkuwaro kuwammengngi uwullèi paggurui tauwè. 20 Saudara-saudara! Aja' muwappikkiri pada-pada ana'-ana'è. Ri laleng gau' majaè, sitinajako tette' pada-pada anana' baiccu'è. Iyakiya ri laleng pikkirang, sitinajako mancaji tau iya battowaènna. 21 Ri laleng Kitta'è tarokii makkuwaè, "Makkedai Puwangngè, 'Naolai sining tauwè iya mabbicaraè sibawa basa iya makalallaingngè, maèlo-Ka mabbicara lao ri umma'èwè. Mala naolai sining tau polè-polè, maèlo-Ka mabbicara lao ri umma'-Ku; namuni makkuwaro, dè' namaèlo mennang mèngkalingai ada-adak-Ku. ' " 22 Jaji wèrè untu' mabbicara sibawa maddupa-rupang basa iya makalallaingngè iyanaritu selaku tanrang untu' sining tau iya dè'è namateppe', tenniya untu' sining tau iya mateppe'è. Sibawa wèrè untu' mappaddissengengngi rancanana Allataala lao ri tolinoè iyanaritu tanrang untu' sining tau iya mateppe'è, tenniya untu' sining tau iya dè'è namateppe'. 23 Rimakkuwannanaro, rèkko èbara'na ri laleng addeppungenna jema'è, sininna jema'è mabbicarai ri laleng basa iya makalallaingngè, nainappa polèi siyagangngarè tau saliweng, iyarè'ga sining tau tenniyaè Kristèng, tentu iyaro sining tauwè nasekko matu jangeng manenni! 24 Iyakiya rèkko Saudara maneng palettu'i biritta polè ri Allataala, napolè sèddiè tau tenniyaè Kristèng iyarè'ga sèddi tau saliweng, tentu gau'-gau' iya nabbirittangngè Saudara iya maneng nappaitangngi matu dosa-dosana iyaro tauwè sibawa mèbbui mainge' lao ri dosa-dosana. 25 Gau'-gau' iya tassubbuè ri laleng atinna ripannessai matu, angkanna napakariyawai matu alèna nainappa nasompa Allataala. Mangakui matu makkedaè tonget-tongengngi Allataala engka ri tengnga-tengngamu. 26 Jaji, Saudara-saudara, aga bettuwanna iya manennaro? Rèkko maddeppungekko untu' sompai Puwangngè, engka makkèlong, engka mappagguru, engka iya mappaissengengngi agi-agi polè ri Allataala, engka mabbicara ri laleng basa iya makalallaingngè, sibawa engka iya pakatajangngèngngi aga iya ripowadaèro. Iyakiya iya manennaro harusu'i ripogau' untu' mappagguru sibawa untu' adècèngenna maneng. 27 Rèkko engka maèlo mabbicara ri laleng basa iya makalallaingngè, harusu'i duwa iyarè'ga kaminang ègana tellu tau bawang sisullè. Sibawa harusu' engka tau pakatajangngi aga iya napowadaè iyaro tau mabbicaraè. 28 Rèkko dè'gaga mullèi pakatajangngi, iyaro sining tau mabbicaraè ri laleng basa iya makalallaingngè harusu'i mammekko ri laleng addeppungengngèro. Leppessanni siya mabbicara ri laleng ati lao ri Allataala. 29 Duwa iyarè'ga tellu tau iya mappunnaiyè biritta polè ri Allataala harusu' palettu'i iyaro birittaè ri wettunna iya laingngè timbangngi aga iya napowadaèro. 30 Iyakiya rèkko èbara'na biritta iya polè ri Allataala polèi risèddiè tau laing iya tudangngè ri laleng addeppungengngèro, tau iya mattengngangngè mabbicara, harusu'i mappèsau. 31 Nasibawang cara makkuwaèro, Saudara-saudara iya maneng, tassèddi-sèddi, mullèi palettu'i biritta polè ri Allataala; kuwammengngi naiya maneng naullèi tarima pappagguruwang sibawa pèdè' mateppe'i. 32 Pangissengeng polè ri Roh-è untu' palettu'i biritta polè ri Allataala wedding ripattuju ri tau iya palettu'èngngi iyaro birittaè. 33 Allataala iyanaritu Allataala iya pojiyèngngi ataratorokengngè; tenniya Allataala iya pojiyèngngi akacaungengngè. Pada-pada ripakajajiyangngè ri laleng sininna jema'na Allataala, 34 makkunraiè harusu'i mammekko ri laleng addeppungenna jema'è. Dè' naripalalo mennang mabbicara. Dè' nawedding mennang mancaji pamimping; iyaro siturui hukkung agamaè. 35 Rèkko engka maèlo naisseng mennang, harusu'i mennang nakkutanang iyaro ri lakkainna ri bolaè. Dè' namakessing sèddiè makkunrai mabbicara ri laleng addeppungenna jema'è. 36 Polèiga ri iko ada-adanna Allataala? Iyarè'ga banna lao ri iko bawang iyaro ada-adaè ripalettu'? 37 Rèkko engka tau marasa mappunnai pangissengeng untu' palettu'i biritta polè ri Allataala, iyarè'ga mappunnai pangissengeng laingngè polè ri Rohna Allataala, iyaro tauwè harusu'i napahang makkedaè aga iya uwokièwè iyanaritu parènta polè ri Puwangngè. 38 Iyakiya rèkko engka iya dè'è natarimai iyaè, aja' mujampangiwi. 39 Rimakkuwannanaro, Saudara-saudara, akkuragano untu' palettu'i biritta polè ri Allataala, iyakiya aja' muwattèyangngi tauwè iya maèloè mabbicara ri laleng maddupa-rupangngè basa iya makalallaingngè. 40 Iyakiya iya manenna harusu'i ripogau' sibawa makessing enrengngè taratoro'.
