1 - 3 Saudara-saudara jema'na Allataala ri Korintus! Purani Saudara riyobbi ri Allataala untu' mancaji umma'-Na nasaba Saudara appunnangennai Kristus Yèsus, silaong sining tauwè muwi kègi-kègi iya sompaèngngi Puwatta Yèsus Kristus, iyanaritu Puwanna mennang sibawa Puwattato. Iyya, Paulus, sibawa saudarata Sostènès, mammènasai tennapodo Allataala Ambo'ta sibawa Puwang Yèsus Kristus mabbèrè barakka enrengngè asalèwangeng lao ri iko. Uwokii iyaè sure'è selaku rasulna Kristus Yèsus, iya nakkaè Allataala sibawa èlo-Na muto. 4 Tuli mattarima kasi'ka lao ri Allataala passalenna iko, saba' mutarimai pammasè polè ri Allataala naolai Kristus Yèsus. 5 Nasaba mancajiko appunnangenna Kristus, nasugi atuwommu ri laleng sininna gau'è. Pangissengemmu passalenna sininna sèuwaè malamung senna', namaccako mappagguruwangngi iyaro pangissengengngè. 6 Iyaro mappaitangngi makkedaè karèba passalenna Kristus makkuwamani mattemme'na ri laleng atimmu, 7 angkanna dè' muakurangeng muwi sèddi barakka, ri wettu mutajenna Puwatta Yèsus Kristus sibawa naitana sininna tauwè. 8 Alèna matu Kristus tanggukko lettu ri accappurenna; kuwammengngi ri wettunna polè paimeng, ripolèiko matu temmakkècella. 9 Weddingngi Allataala riyatepperi tonget-tongeng. Alèna ritu Allataala iya puraè mobbiko untu' mancaji sèddi sibawa Ana'-Na, iyanaritu Yèsus Kristus, Puwatta. 10 Saudara-saudara! Ri laleng asenna Puwatta Yèsus Kristus uwèllauwi kuwammengngi mumassèddi ada maneng; kuwammengngi aja' naengka assisalang ri yelle'mu. Sitinajako massèddi, siati sibawa sinawa-nawa. 11 Saba', sining tau polè ri kaluwarga Kloè laporo'i ri iyya engka assasang ri yelle'mu. 12 Iya uwasengngè iyanaritu makkedaè ri yelle'mu engka makkeda, "Iyya maccowèka ri Paulus, " engkato makkeda, "Iyya maccowèka ri Apolos, " iya laingngè makkedai, "Iyya maccowèka ri Pètrus, " na laingngè makkeda tosi, "Iyya maccowèka ri Kristus. " 13 Masa' Kristus tabbagè-bagè! Paulus dè' namatè risalli untu'mu! Dè'to muricemmè untu' mancaji ana'-ana' gurunna Paulus? 14 Sukkuru'ka dè' ucemmèi muwi sèddi tau polè ri yelle'mu, ri lainnaè Krispus sibawa Gayus. 15 Aja' narapii sèddiè tau makkeda makkedaè puraka cemmèi untu' mancaji ana' gurukku. ( 16 Stèfanus sibawa kaluwargana, mèmeng iyya cemmèi mennang. Iyakiya ri lainnaèro iya uwèngngerangngè dè'na gaga tau lainna iya ucemmè. ) 17 Nasuroka Kristus tenniya untu' cemmèi tauwè, sangadinna untu' mappallebbangengngi Karèba Madècèng polè ri Allataala; na iyaro harusu'i upogau' tekkupakè amaccang mabbicaraè secara tolino, kuwammengngi akuwasanna amatènna Kristus risalliè dè' namancaji siya-siya. 18 Saba' lao risining tau iya mattujuè ri abinasangngè, karèba passalenna amatènna Kristus ri salliè pada-padai omong kosongngè. Iyakiya lao ri idi iya ripassalama'è ri Allataala, iyaro karèbaè pada-padai carana Allataala mappaitangngi akuwasan-Na. 19 Saba' ri laleng Kitta'è, makkedai Allataala, "Apanrènna tau maccaè maèlo Upakacau, pappahanna tau makkèpangissengengngè maèlo Upallennye. " 20 Aga akkègunananna sining tau makkèpangissengengngèro? Aga akkègunanna mennang iya maccaè? Aga akkègunanna ahli-ahli pannawa-nawa linoèwè? Pura nappaitanni Allataala makkedaè apanrènna linoèwè iyanaritu omong kosongngi simata! 21 Nasaba muwi pèkkugi accana rupa tauwè, dè' naullèi missengngi Allataala naolai acca ri alèna. Iyakiya mala nasaba mapanrèi Allataala, nanasitujuiwi passalama'i sining tau iya mateppe'è ri Alèna naolai biritta iya riyappallebbangengngè iya nangga'è sèuwa omong kosong linoè. 22 Natuntu'i tau Yahudiè anu makalallaingngè selaku butti, sibawa tau Yunaniè napentingkangngi apanrènna linoèwè. 23 Iyakiya idi'è banna mabbirittangngi Kristus iya matè ri salliè. Iyaro birittaè nasinggungngi pappèneddinna sining tau Yahudiè sibawa nangga'i omong kosong sining tau tenniyaè Yahudi. Sibawa tau tenniyaè Yahudi naangga'i iyaro sèuwa adonggong. 24 Iyakiya lao risining tau iya puraènna riyobbi ri Allataala -- muwi tau Yahudi iyarè'ga tenniya tau Yahudi -- iyaro birittaè sinrupai carana Allataala mappaitangngi akuwasan-Na sibawa apanrèn-Na. 25 Saba' iya paitaè madonggo ri Allataala, iyanaritu lebbi mapanrèi na iya apanrènna tolinoè; sibawa iya paitaè malemma ri Allataala, iyanaritu lebbi watangngi na iya awatangenna rupa tauwè. 26 Saudara-saudara! Cobai mèngngerangngi pèkkugi keadaammu wettunna Allataala mobbiko. Cèddè bawang polè ri yelle'mu iya mapanrè, iyarè'ga makuwasaè, iyarè'ga matanrè tudangenna manuru' pakkitanna rupa tauwè. 27 Saba' mèmeng nattungka Allataala pilèi iya nangga madonggoè linoèwè, kuwammengngi nasining tau maccaè namasiri. Sibawa Allataala pilè towi iya nangga malemmaè linoèwè, kuwammengngi nasining tau iya baraniè naporè nancaji masiri. 28 Allataala pilèi iya riyangga mariyawaè, matuna, sibawa mala iya riyangga dè'è nakkèbettuwang ri linoèwè, kuwammengngi na Allataala mancuru'i iya nangga pentingngè linoè. 29 Rimakkuwannanaro dè' muwi sèddi tau mullèi mattempowangngi alèna ri yolona Allataala. 30 Allataala muto mèbbui angkanna Saudara massèddi sibawa Kristus Yèsus. Naolai Kristus naripancajiki mapanrè. Sibawa naolai Alènato, naèbbuki Allataala simadècèngeng paimeng sibawa Alèna enrengngè pancajiki umma'-Na iya mapaccingngè, kuwaèttopa paleppe'ki. 31 Jaji, pada-pada iya tarokiè ri laleng Kitta'è, "Tau iya maèloè mammingki-mingki, harusu'i mammingki-mingki ri aga iya napogau'è Puwangngè. "
