1 Man Pɔɔl un sá Unimbɔti tɔntɔnliu ki sá Yeesu Kriisitoo kpambalee di ŋmàń takalda nee kí tīī sii Tiiti. Úǹ di túnní-mi ḿ yàntī bin Unimbɔti lútì bí nīn sá u-yabee ń fɔ̃ɔ̃-u kí kíí, kí béé nnimbɔtisan baamɔni, 2 ní bí ŋmā kí nīn kíǹ ki máká mmaŋfafɔkɔn ŋun kaa cáá dikuntilee pu. Doooo jaanjaan ní Unimbɔti un kaa mɔ́ntée pɔ̃oǹ yii u dàá tīī-ti dimaŋfal gbanti. 3 Ŋyunti bāańee, ní ti-Fiiliu Unimbɔti dī u-nyɔɔbundi pu ki nyántì tin u nìn pɔ̃oǹee ki dàkā-ti. Dinyɔɔbundee di sá din u ŋúbiǹ-mi ki bí yii ḿ nīn sòoǹee. 4 Sii Tiiti un kpántì m-ba bindi pu jipɔɔn ti-kɔkɔ nín fɔ̃ɔ̃ Yeesu ki kííyee puee ní m ŋmàń takalda nee kí tīī. Ti-Baa Unimbɔti nì Yeesu Kriisitoo ti-Fiiliu ń ŋá-si tiŋan, kí tīī-si ŋgbansɔŋfi. 5 M yāntì-si Kreeti tiŋkin yii á púntí kí bɔ́ntí ditundi din kíǹ niinee, kí kàan̄ bikpilib Kriisitoo nikitiŋ kansikin kitiŋ sá kamaa poon, kii m nín nìn péē tùkū-si puee. 6 Kriisitoo nikitil kpiliu máaǹ bí taa ká u-pu ibɔkpiti iba, kí nīn cáá unimpubaanti, u-biyaamu ń nīn sá bin fɔ̃ɔ̃ Yeesu ki kíí ki sá mun pu binib kaa sòoǹ yii mu-bimbim kaa ŋān̄, muaa tɔ́ binibee. 7 Di sá yii un kpòotī Kriisitoo nikitilee tundi di sá ú nīn kpèé Unimbɔti tundi ń còom̀, an puee waa máaǹ bí ká u-pu ikpiti iba, ú taa nín̄ sá ulambidaan nì uŋuudaan nì udanyɔgbil, kí taa nín̄ sá kìlkil niliu nì un dì isaŋkpiti pu ki kāntí animilee. 8 Ama ú nīn fòol̄ binicambi tiŋan, kí nīn néeń tin ŋān̄ee, kí nīn cáá iciin, kí nīn bí deedee ki sá circir, kí nīn ŋūǹ ki ŋúb̀ u-ba. 9 U máaǹ kí nīn kpáafí tibɔŋmanee án píkí kii bi nín dàkā-tì puee, an nín dàá ŋá pu ú ŋmā kí nīn cáá tibɔŋman gbantee ki tìì binib kunyannyaauee, kí kpáàā dàkà bin mun kaa là tibɔti gbantee bi-yìntitamee. 10 Di sá yii binib tikpil bí ki gáatì ki cáá tibɔfan ki kíiĺ binib, bin péēyì diyilee di sá Juuda yab kansikin biba. 11 Á pìin̄-bi nsan bí taa ti sòoǹ, kun puee bi dàkà tin kaa máaǹ bí dàkèe, ki bíiĺ adicammɔn, ki dì icoo sani míǹ kí ŋmā kí ká animil. 12 Bi-bɔnaatiliu ubɔ, u sá ukreetija di nìn lī yii: “Kreeti tiŋki yab péēsá binyimɔndambi ní, ki cáá ntoom kii ipeecuncutee, ki sá biwutijoodambi, ki sá bipoofub.” 13 Kijapaayee nín lī puee, waa mɔ́ntì. An puee, á kpìin̄-bi tiŋan an nín dàá ŋá pu bi-fookiiu ń nīn sá ibaamɔn yɔuee, 14 bí yàntī titiŋkpikibɔti tin Juuda yab cáá ki máafée, nì binib bin fá ibaamɔn saŋŋu ki yɔ̃oǹ bíǹ bi-ba marabee bɔti. 15 Binib bin bí circiree, tikɔkɔ sá circir ní ki tīī-bi, ama bin kaa fɔ̃ɔ̃ Yeesu ki kíí ki kɔ́ tijɔkɔndee, tiba kpá ki bí bíǹ cee circir, kun puee bi-landɔkɔi nì bi-ciini kɔ́ tijɔkɔndi. 16 Bi gà bi-biŋŋi yii bi nyí Unimbɔti, ní bi-tuuŋŋi ŋin bi ŋáańee dàkà yii baa nyí-u. Bi sá bikpitib ní ki gáatì, kaa ŋūǹ kí ŋá ditummɔntiil báà diba.
