ROOM 7

1Nnabiyaamu, m pàkā yii m bíī sòoǹ nì binib bin nyí marabee ní. Ni nyí yii mara cáá mpɔn unil pu ŋyunti ŋun u dáá bí dimaŋfalinee ŋmaniŋma ní. 2Míǹ ní, unimpu yaa mɔ́ǹ ticatee, mara bɔ́ob́-u ki nákaǹ u-cal ŋyunti ŋun u dáá bí dimaŋfalinee. U-cal yaa kpíìyee, mara bútì-u ki nákatiǹ u-cal un u nìn nákée dee. 3Mimmee, unimpu cal yaa dáá bí, kaa kpíì, u yaa yíkìi mɔ́ǹ ubɔee, bi ŋūǹ kí yíiń-u kinimpulaakpaai. U-cal yaa kpíìyee, mara un bɔ́ob́-u ki nákaǹ u-calee cúū bútì dee, u ŋūǹ kí mɔ̄ǹ uninjapɔɔn ubɔ. Niinee, baa ti yíì-u kilaakpaai. 4M-nabiyaamu, míǹ mbaantiim, ni nín kpáfì ki kpíì nì Kriisitoo puee, ni-kúmee yākatì ni nì marab kansikin. Kɔŋkɔnnee, ni kíǹ ki sá Kriisitoo un fīkitì ditaŋkpiilinee yab ní; tí lòoǹ abimɔnti kí tīī Unimbɔti. 5Dooooyee, ti nín nìn dáá bí ki ŋáań ti-ba lammee, marab nìn tútuǹ ti-landɔkɔkpitii in téekí-ti, ti ŋáań atuun ŋin cáǹ-ti ŋkúminee. 6Dooooyee, marab nìn cúú-ti kuyuŋu, ama kɔŋkɔnnee ti yākatì tɔbin, baa ti cáá ti-pu mpɔn, ti tɔ́ ti-ba. Míǹ puee, ti ŋūǹ kí tɔ̄ ditundi min ní Unimbɔti Fām kpòotī-tee, an kaa ti sá min min takalda poon marab nìn kpòotī-ti dooooyee. 7Mimmee, tí lì yii ba? Marab sá ikpiti deeyaaa? Aayee kpataaa! An yaa kaa sá marab pu maa bàà nyí kun di sá ikpitee. Di sá yii marab yaa kaan lī yii: “Á taa nín̄ cáá nnimitaataam”, maa bàà nyí kun bi yíì nnimitaataamee. 8Marab lī mimmee, ní tikpitil ká nsan kí kɔ́ǹ-mi tiwan kɔkɔ nnimitaataam. Di sá yii, marab yaa kpée, ikpiti kaa cáá mpɔn. 9Doooo min marab nìn kpée, m nìn bí dimaŋfalin, ní marab nín bāańee, ikpiti dɔ́miń ki fɔ̃ɔ̃ mpaan, 10ní man kpíì. Mimmee, marab bin bàà sá ukpootil kí cáá-mi dimaŋfalinee fātìi téé-mi ki tɔ́ ŋkúmin. 11Ní ikpiti dī marab pu ki ká nsan ki kíil̀-mi ki kūū-mi marab gbanti pu. 12Marab bi-ba bí circir, ní isaŋki in bi sáŋkí-tee mun bí circir ki bí deedee ki ŋān̄. 13Mimmee, tin sá tiwammɔntiilee di cáań-mi ŋkúmaaan? Aayee, kpataaa. An sá ikpiti di cáań míǹ, ki dūu dīń tiwammɔntiil pu ki kūū-mi, ki dàkā i nín sá ikpiti iŋyee mbaamɔmin. Marab puee, ti béè yii ikpiti kaa lafun sàafì. 14Ti nyí yii marab lafun sá Unimbɔti wanti. Ama ní man sá nniwuŋgban, ikpiti dá-mi, m sá i-yumbuu. 15Maa nyí tin m ŋáańee, kun puee maa ŋáań tin m bàà là kí ŋée, ní ki ŋáań tin tin m ná, kaa bàà là kí ŋée. 16M yaa bíī ŋáań tin tin maa là kí ŋée, mimmee m béè yii marab ŋān̄ dee. 17Mimmee, an dàkà yii an kaa sá man m-ba di bíī ŋáań tikpitil, an sá ikpiti in bí m-nee di ŋáań. 18M nyí tiŋman yii tiŋan kaa bí m-ni, an dàkà yii m-wuntin. Nì min kɔkɔ m bàà cáá nlandɔkɔmɔnti kí ŋá tiŋanee, mpɔn kpá ḿ ŋmā kí ŋá. 19Tiŋan tin m bàà là kí ŋée, maa ŋáań tíǹ, tikpitil tin maa bàà là kí ŋée, tíǹ ní m ŋáań. 20Mimmee, m yaa bíī ŋáań tin tin maa bàà là kí ŋée, an kaa ti sá mama m-ba di bíī ŋáań, an sá ikpiti in bí m-nee di bíī ŋáań. 21M dáań ki ká yii m yaa làá ŋá tiŋanee, maa ŋūǹ, see ikpiti ní m ŋūǹ kí ŋá. 22M-pɔbilinee, Unimbɔti marab di fáatì-mi, 23ama m ká yii mpɔn ŋubɔ bí m-wunti nì ti-jaŋŋin ki jáaǹ kun kun m-landɔkɔŋu fáatèe, ki dū-mi ki nyáfiǹ ikpiti pɔŋŋu ŋun bí m-wuntinee. 24Man niminaamandi neeee! Tiwun nee dátí-mi ki cáǹ ŋkúmin, ŋma di dàá fīī-mi kí líí? 25Tí jāam̀maan Unimbɔti ti-Dindaan Yeesu Kriisitoo un fìil̄-tee pu! Mimmee, m-landɔkɔŋu poonee m bàà là kí nɔ́ɔ́ Unimbɔti marab, ama iwɔfi in bí m-wuntinee là kí nɔ́ɔ́ ikpiti.

will be added

X\