ROOM 11

1Mimmee, Unimbɔti fá Israyeel yab naaan? Aayee, kpataaa! Kun puee man m-ba sá Israyeel ní, ki sá Abraam naantiiu, ní ki sá Beenjamin maaliŋun. 2Unimbɔti kaa fá u-nikitil din pu u péēnyí dooooyee. Naa kalin nyí Unimbɔti takaldau nín sòoǹ min ní Eelii nìn bíī kɔ́kɔĺ Israyeel yab Unimbɔti nimiineeee? U bí yii: 3“Ti-Dindaan, bi kūū a-bɔnaatiliibi ki wīī a-saraafani, an péēkíǹ man baba ní, ní bi nyàab̀ kí kpò man mun!” 4Unimbɔti nìn kíí-u yii ba ní? U bí yii: “M kpáafì binib kutukub biluli, bi sá m-yab, bidambi tabiŋyiliŋ kaa gbāaǹ diwaal Baal nimiin.” 5Míǹ mbaantiim, ti-yuntiŋu nee, an kíǹ binib fiii bin Unimbɔti ŋá tiŋan ki lútì-bee. 6U ŋá bidambi tiŋan ní ki lútì-bi, an kaa sá bi-tunnyaaŋku pu. An yaan sá bi-tunnyaaŋku puee, mimmee Unimbɔti kaa ti ŋá-bi tiŋan dee. 7Tibɔti nee taapu sá yii ba dee? Israyeel yab nín nyàab̀ kuŋyee, baa ká kudɔŋu, see bin Unimbɔti lútèe baba di ká kudɔŋu, ní u yāntì bin kíǹee kaa ŋūǹ kí gbìl̄ taapu, 8kii an nín ŋmàn̄ puee, yii: “Unimbɔti tātì bi-lam, ki yāntì bi-nimiliŋ kaa wāĺ, bi-tafaliŋ kpáá, ali ki dāa sāā díǹ.” 9Dafiidi mun lī yii: “Bi-jinti ń kpántí-bi kutaliŋŋu, kí nīn sá-bi kulaaŋŋu, bí lítí ikpitin kí ká ditafadaaldi din máaǹee, 10bi-nimiliŋ ń jòb̄ kí taa nín̄ wāĺ! Yàntī bí nīn péēbɔ̃ɔ̃ baabadal.” 11Míǹ puee, Juuda yab nín gbéetèe, bi lítì kɔkɔɔɔ? Aayee, kpataaa! Ama bi-lítitamee di yāntì atimbun ŋin kɔkɔ kíǹee ká difiil, an nín dàá ŋá pu bi yaa ká bin béeyee, bí mun ń nyàab̀ee. 12Bi-yìntitam yaa cáań kitiŋ kɔkɔ nib tiwammɔntiilee, ní bi nín wáŋkì puee yaa cáań bin kaa sá Juuda yabee tiwammɔntiilee, kin Juuda yab kɔkɔ yaa fātìń Unimbɔti ceeyee, kun an dàá cáańee dàá nīn bí mana dee? 13Kɔŋkɔnnee, m sòoǹ nì nimbi bin kaa sá Juuda yabee ní. Man sá Yeesu kpambal din u tú bin kaa sá Juuda yabee ceeyee ní, ní an mɔ̄ǹ-mi ditundi din u tīī-mee pu, 14m-landɔkɔŋu sá yii ḿ téé m-nabiyaamu Juuda yab bí nyàab̀ kí ká kun bin béeyee cááyee, ḿ ŋmā kí fīī bi-kansikin biba. 15Unimbɔti nín yíì Juuda yab bí taa nín̄ gítī sá u-yabee di ŋáŋkì binib bin kɔkɔ kíǹee nì Unimbɔti kansikin. Mimmee, u yaa láā fātìi fɔ̃ɔ̃ Juuda yabee, an dàá nīn bí mana dee? An dāa sá bin nìn kpíìyee dimaŋfal ní. 16Bi yaa nìn cáań tijimpeepeekaal fiii ki tīī Unimbɔtee, tin kíǹee kɔkɔ, úǹ di yì tíǹ mun dee. Unimbɔti di yaa yì busubu nì bu-nyaaniee, úǹ di yì asupan mun. 17Bi yaa gāā ɔliifi bumɔŋkisubu paŋŋi aba ní ki gāań sii kumooun subu pandi ki cáań ki túkuǹ ŋin béeyee paani, ní a kíǹ ki fòol̄ busumɔntiibuee nyaani nyimee, 18sii ń taa nín̄ lámintí ki dàkà apan ŋin bi gāā ki fée. A yaa bíī lámintí, á béé yii an kaa sá sii di tú inyaan, inyaan di tú sii. 19A dàá tùkù-mi yii: “Bi gāā apanee ki fá ní ki cáań man ki túkuǹ.” 20Tiŋman bi lafun gāā-ŋi ki fá kun puee baa fɔ̃ɔ̃ Unimbɔti ki kíí ní sii nín fɔ̃ɔ̃ Unimbɔti ki kííyee pu ní a túkú niin. Míǹ puee, á fàŋkì kí taa nín̄ lámintí. 21Di sá yii Unimbɔti yaa kaa tāaǹ bumɔŋkisubu paŋŋee, á nīn nyí yii waa làá dāá tàan̄ si mun. 22Nín̄ nyí Unimbɔti ŋanti nì u-tafadaaldi pu! U dáaĺ bin bin lítèe tafaliŋ, ní ki ŋá sii tiŋan. Á nīn gbíntìi bí u-ŋanti gbantin, an yaa kaa sá míǹ, see ú dāá gāā-si kí fá. 23Bíǹ yaa kpántì bi-bimbim ki fɔ̃ɔ̃ Yeesu ki kííyee, u ŋūǹ kí fàtīí gíiǹní-bi kí túkuń laakin u nìn gāā-bee. Di sá yii Unimbɔti cáá mpɔn kí gíiǹ-bi kí túkuń mpɔm. 24Kpèè, sii kumooun supandi din bi gāāyee, bi cáań-si ki túkuǹ bumɔŋkisubu bun kaa sá a-suyilee pu; mimmee, an kaa pɔ̄ɔ̄ bí gíiǹní asupan ŋin bi gāāyee kí túkuń disuyil din pu ŋi nìn bí, bi gāā-ŋee. 25M-nabiyaamu, m là ní béé ibaamɔn iba i bí dibalin, an nín dàá ŋá pu ní taa nín̄ yíì ni-ba yii biciŋfitiibee. Di sá yii Israyeel yab dijandi kaa ŋūǹ kí gbìl̄ tibɔti nee taapu, kí dāá sāā ŋyunti ŋun ntimu mun kɔkɔ kíǹee yab ń dāá kɔ́ difiilinee. 26Min ní Israyeel yab kɔkɔ dàá ká difiileee dee, kii an nín péēŋmàn̄ puee, yii: “Ufiil dàá nyānní Siiyɔn ní kí lēēikpiti in bí Jaakɔb yab kansikinee kí fá. 27Man Unimbɔti yaa láā lēēbi-kpitii ki fée, an di dāa sá dipoondi din m pɔ̃oǹ-bee.” 28A yaa kpēēbi nín fá tibɔmɔntiil puee, bi kpántì Unimbɔti nannanliibi nimbi ń ká difiil. A yaa kpēēUnimbɔti nín lútì-bi puee, bi sá bin u néeńee bi-naanjab pu. 29Di sá yii Unimbɔti yaa pú ubɔ diyimɔɔl dibaaa, u yaa tí yíiń-uaaa, waa kpántí u-landɔkɔŋu. 30Dooooyee, naa nìn tɔ́ Unimbɔti, ama, Juuda yab nín nìn yíì, kaa fɔ̃ɔ̃ u-bɔti puee ní u súń ni-saai kɔŋkɔnnee ki fīī-ni. 31Míǹ mbaantiim, Juuda yab kaa tɔ́ Unimbɔti kɔŋkɔnnee ní Unimbɔti súń ni-saai, ama an sá bí mun ń ŋmā kí ká kɔŋkɔnnee Unimbɔti saasɔl ní. 32Mimmee, Unimbɔti yāntì binib kɔkɔ gbíntì bi-yìntitam poon, ú ŋmā kí dàkà bi-kɔkɔ u nín sūǹ binib saai puee dee. 33Ɔ́o, Unimbɔti ciini nì u-nyítam nì u-ŋanti wīikéeee, an kaa cáá bi lì! U nín ŋáań u-bɔti miŋyee, unil kaa ŋūǹ kí béé, ní min min u lēēki dàá ŋée, unil kaa ŋūǹ kí gbìl̄ taapu, 34kun puee, kii Unimbɔti takaldau poon nín lī puee yii: “Ŋma di ŋūǹ kí béé ti-Dindaan landɔkɔŋu. Ŋma di ŋūǹ kí sāŋkì-u mun? 35Ŋma di péé ki tīī-u tiba ní an sá yii ú fàtīí téeǹ udaan?” 36Úǹ di náań tikɔkɔ, úǹ di ŋúb́ tikɔkɔ, ní an kɔkɔ bí ki tīī-u. Unimbɔti gbanti ń ká tinyool kí nīn cá jaanjaan! Ameen.

will be added

X\