1 “Ŋmà takalda kí tīī m-nikitil din bí Saardee tūuŋŋu yii: Un cáá Unimbɔti Fām miluli nì iŋmalbijaa ilulee di bí-u yii: M nyí a-tuuŋŋi, ki nyí yii a-yindi yíkì yilpu, bi nyí a-pu yii a sá dinikitil din cáá dimaŋfalee, ama ní a kpíì. 2 Fìntī kí tíkiń a-fookiiu un bíī kúùyee ú ká mpɔn, kun puee maa ká a-tummɔntiŋ aba m-Nimbɔtiu cee. 3 Á téetí bi nín nìn dàkā-si Unimbɔti bɔti a fɔ̃ɔ̃-tì ki kíí puee, kí nīn gbíntì ki ŋúb́-tì míǹ gbīm gbim kí fá ikpiti. A yaa yíì, m dàá dāan̄ ŋyunti ŋun saa nyí yii m dàá dāan̄ee ní kí túuǹ-si kii unaayuu nín tūuntí unil puee. 4 Ama nì míǹ kɔkɔee, biba bí Saardi nikitil kansikin kaa ŋá ikpiti bi-bɔkutiŋ pīiǹ, binib gbanti dāa pēē abɔkutipiin káŋkaŋ ní man nì bi ń nīn táá ki còom̄, kun puee bi máaǹ míǹ. 5 Míǹ ní un yaa jáń ki jíńee dāa pèentí abɔkutipiin káŋkaŋ, maa làá dàá gítī kpìtī udaan yindi dimaŋfal takaldau poon, ama m dàá dāá lì m-Baa nì u-tūuni kɔkɔ nimiin yii man di yì-u. 6 “Un yaa cáá ditafalee ń pīlfì Unimbɔti Fām nín bí ki sòoǹ nì Kriisitoo nikitiŋ puee.” 7 “Ŋmà takalda kí tīī m-nikitil din bí Filadeelfiiyee tūuŋŋu yii: Un sá circir ki sá ubaamɔnee, un di ŋúb́ Dafiidi saafiiu ki yaa pīitì, ubɔ kpá kí dūú pìin̄, ki yaa tí dūu pīiǹ, ubɔ kpá kí pìitēe, 8 di bí-u yii: M nyí atuun ŋin kɔkɔ a ŋée. M pīitì kipunyɔkɔ ki wāaǹ a-nimiin, ubɔ kaa ŋūǹ kí dūú pìin̄. Kun puee m nyí a-pɔŋŋu kaa náaǹ, ama a ŋúń ki ŋúb́ m-bɔti, kaa dū-mi ki fá. 9 Á kpèè tin m dàá ŋá kí tīī-see: Binib bin kpáfì ki sá Sitaan yab ki mɔ́ntí yii bi sá Juuda yab kin kaa sée, m dàá dū-bi kí ŋá a-ŋaan, m dàá yàntī bí dāá gbàan̄ a-taaŋi taapu ní kí béé yii m néeń-si. 10 Kun puee a nín pɔ́ɔǹ ki ŋúb́ m-bɔtee, man mun dàá ŋúb́-si ŋyunti ŋun diniminaamandi dàá dāá jēetí duulnya nib kɔkɔ pu kí cɔ̄ŋkì-bee. 11 M dòoń kɔŋkɔnnee, á ŋúb́ tin a ŋúb́ee gbīm gbim ubɔ ń taa fɔ̃ɔ̃ a-cee tipaal tin bi tìì bin jáń ki jíńee. 12 Un yaa jáń ki jíńee, m dàá dū-u kí kpántí m-Nimbɔtiu diiku jaantalkuu ní ú báań kí nīn kíǹ ki bí niin kí taa ti nyā, ní ḿ dāá dū m-Nimbɔtiu yindi nì m-Nimbɔtiu tiŋki, Jeerusaleempɔɔn un nyánní yilpu m-Nimbɔtiu ceeyee yindi nì man yimpɔndi kí ŋmà udaan pu. 13 “Un yaa cáá ditafalee ń pīlfì Unimbɔti Fām nín bí ki sòoǹ nì Kriisitoo nikitiŋ puee.” 14 “Ŋmà takalda kí tīī m-nikitil din bí Lawoodiseeyee tūuŋŋu yii: Un bi yíì Ameen u sá un lèekī seera deedee nì ibaamɔn, ki sá Unimbɔti wannaaŋkaati kɔkɔ nyeelee, 15 di bí-u yii: M nyí atuun ŋin a ŋée kɔkɔ. Aa sòm̀aaan, kaa tùm̀ mun; a yaa là kí nīn sòm̀aaan, á nīn sòm̀; a yaa là kí nīn tí tùm̀aaan, á nīn tùm̀. 16 Kii a nín bí gbìmmm kaa sòm̀aaan kaa tùm̀ muee, m dàá wùliŋkì-si kí fá. 17 Di sá a lì yii sii sá ugaaja ní, a-gaajati tin a ká nee puee, aa ti là tiba nì tiba, kun pu a lì mimmee di sá aa nyí yii a sá ufalaadaan, ki sá unandaan, ki sá usoodaan, ki sá ujɔfu, ki sá ucancaŋgbeefu. 18 An puee m sáŋkí-si yii á dāan̄ m-cee kí dā sindaariya un bi dū ŋŋmi ki cɔ́ŋkì ki ká yii u sá umɔntee, ní kí nín ŋmā kí kpántí ugaaja; kí dā m-cee abɔkutipiin kí pèen̄ kí bìin̄ a-cooi pu, kí dā nnyɔkɔ m-cee kí jɔ̃ɔ̃ a-nimiliŋ kí wāl̀. 19 Man dátí bin m néeńee tafaliŋ ní ki sáŋkí-bi, an puee á ká kunyannyaau kí fá ikpiti. 20 Á pīlfì, m yú kipunyɔkɔ pu ki ŋáań gaafalaa; un yaa gbìl̄ m-nyɔkɔ pu ní ki pīitì-mee, m dàá kɔ́ udaan cee ní man nì u ń kpāfì kí jī. 21 Un yaa jáń ki jíńee, m dàá yàntī ú dāan̄ kí kàl̄ kí kɔ́ĺ-mi m-beelin, kii ma mun nín jáń ki jíń pu ki dɔ́miń ki kāl̀ m-Baa beelin ki kɔ́ĺ-u puee. 22 “Un yaa cáá ditafalee ń pīlfì Unimbɔti Fām nín bí ki sòoǹ nì Kriisitoo nikitiŋ puee.”
