MAATIU 14

1Ŋyunti gbantee, Eeroodi un nìn sá ubɔti Gaaliileeyee gbìl̄ bi nín sòoǹ Yeesu pu miŋyee 2ní ki bí u-tɔntɔnliibi yii: “Unee di sá Jaan un fùul̀ binib Unimbɔti nyimee, u fātìi fīkitì ní, an pu ní u cáá mpɔn ki ŋáań maamaacib míǹ.” 3- 4Kun pu ní Eeroodi nìn lī mimmee di sá u nìn cáá u-maan Fiiliipi nimpuu, un bi yíì Eeroodiyee. Ní Jaan nìn tùkū Eeroodi yii: “An kaa máaǹ á cáá unimpu gbanti.” An puee Eeroodi yāntì bi cúú Jaan ki bɔ́ob́ ki cáā tɔ́ sarkan kun puee an kaa nìn mɔ́ɔkiǹ Eeroodiya. 5Niinee ní u kíǹ ki nyàab̀ kí kpò Jaan, ama ní ki fàŋkí Juuda yab, kun puee báà ŋma nyí Jaan pu yii u sá Unimbɔti bɔnaatiliu. 6Ní dalin kin bi bíī jīǹ Eeroodi maalwiiŋŋu jiŋaaliuee, Eeroodiya bisal ŋɔ́ń bin bi yíiń jiŋaalee nimiin, ní an mɔ́ɔkiǹ Eeroodi, 7ní u pūtì ki bí yii: “Kun kamaa ní a yaa lèe, á bàlfì-mi, m dàá tīī-si kudɔŋu.” 8Ní usapɔɔnee na yāntì u lī yii: “Á tùkutī Jaan un fùul̀ binib Unimbɔti nyimee yil kí tàkan̄-mi kpaatan kɔŋkɔnnee.” 9Niinee, an kɔ́ ubɔti kunimbaau, u nín gítī dáá pūtì kunipaau nimiinee puee ní u kíí yii u dàá tīī-u, 10ní ki tú ubɔ ń cù kusarkadiin kí tìlīń Jaan un fùul̀ binib Unimbɔti nyimee yil kí cáań. 11Ní bi tīl̀ Jaan yil ki ŋá kpaatan, ki cáań ki tīī usapɔɔnee, ní ú mun cáā tīī u-na. 12Ní Jaan boonnooliibi dɔ́miń ki yɔ̃oǹ-u ki cáā síb́, ní ki cūtì ki tùkū Yeesu tin jítèe. 13Yeesu nín gbìl̄ mimmee, ní u yíkì niin u nì u-boonnooliibi kɔ́ buŋalimbu ki búntì laakin binib kpée, ama ní kunipaau nyánní ntimun ki còom̄ ataa ki nín jì u-boon. 14Yeesu nì u-boonnooliibi nyáń buŋalimbunee, ní ki ká kunipaau nín tíibińee, binibee nìn cúú-u falaa ní u kíĺ ki bíī cāantí bibunliibi. 15Kujoou bíī jɔ́otée, ní u-boonnooliibi sútìń ki pìl̄-u, ní ki bí-u yii: “Binib kaa kɔ́ò laakin ti bí nee, kunyeeu mun bíī mɔ́otí. Míǹ puee, yàntī binib ń nīn cá ntimbilimun kí dā tijin kí jī.” 16Ní Yeesu kíí-bi yii: “An kaa bàlfī bí cù, nimbi ni-ba tīīmaan-bi tijin bí jī.” 17Ní bi bí-u yii: “Kpɔnɔb biŋmoo nì ijɔm ili ja di bí.” 18Ní u bí yii: “Yòon̄ kí cáaḿmaan-mi!” 19Niinee, ní u bí yii samaa kɔkɔ ń kàl̄ kumɔsɔŋu pu, ní u fɔ̃ɔ̃ kpɔnɔb biŋmoo nì ijɔm ilee ní ki wáaǹ kutaa, ki jáam̀ Unimbɔti, ní ki gífì gífì kpɔnɔbee ki dūu tīī u-boonnooliibi, ní bíǹ dūu yākatì binib kɔkɔ. 20Ní bi-kɔkɔ jíń ki díkí, an kíǹ, ní bi kɔ́oǹ akpɔnɔkati nì ajɔŋgin ŋin kíǹee ki gbéeǹ tikabiti saalaa nì tili. 21Bininjab bin nìn jíń tijin gbantee nìn bàn̄ kii binib kutukub biŋmoo, baa kàan̄ binimpoobi nì mbiyaamu. 22Niinee Yeesu yāntì u-boonnooliibi kɔ́ buŋalimbu malaa ki līntì ki dūtì lapu buŋgbandi, ní Yeesu úǹ dáá bí niin ki tùkù binib yii bí nīn kùǹ. 23U yāntì bi nín kùn̄ee, ní u búntì ŋkpaanceeti dijool pu kí mèè. Kunyeeu mɔ́ee u dáá gbíntìi bí niin u-baba. 24Buŋalimbuee mun nìn bàn̄ dimɔɔl kansikin kaa ti cá, kun puee kubuŋu nìn túŋkiń-bu ní tinyiŋgbàn nìn yāŋkí-bu. 25Ki cá kutaawuntuŋuee, ní Yeesu tɔ́kɔǹ nnyim pu ki còom̄ ki cá u-boonnooliibi cee. 26Bi nín ká u páaǹní ki còom̄iń nnyim puee, ní bi-pɔbiliŋ máĺ, ní bi bí yii: “Ufaŋfanti dee!” ní ki bíī gbáà ibiil nì tifaandi. 27Kpalaayee ní Yeesu bí-bi yii: “Cúúmaan ni-pɔbiliŋ, an sá man! Taa fàŋkìmaan!” 28Niinee ní Piyeer bí-u yii: “M-Dindaan, an yaa lafun sá sii, á yàntī ḿ tɔ́kɔń nnyim pu kí còom̀ kí dāan̄ a-cee.” 29Ní Yeesu bí-u yii: “Nín̄ dòoń!” Ní Piyeer nyáń buŋalimbun ki tɔ́kɔǹ nnyim pu ki còom̀ ki nín cá Yeesu cee. 30U nín bíī còom̄ ki cá ki ká kubuŋu nín jītí pu mpɔnee, ní u fāŋkì, ki kíĺ ki bíī múl̀ nnyimin, ní u fáá mbiil yii: “M-Dindaan, fīī-mi.” 31Kpalaayee ní Yeesu tāntì u-ŋal ki cúú-u ní ki bí-u yii: “A-fookiiu pátì, ba pu ní a fāŋkì?” 32Ní bi-liitil kɔ́ buŋalimbun, ní kubuŋu ŋmíl̀. 33Ní bin nìn kā buŋalimbunee gbāaǹ Yeesu nimiin ki bí-u yii: “Ibaamɔn, a lafun sá Unimbɔti Jipɔɔn.” 34Bi dūtì dimɔɔl ki bàn̄ Geeneesareeti tiŋki jandi dibee ní ki kpákatì. 35Niin yab kpáàā béè Yeesu, ní ki nākaǹ bi tùkū ajan kɔkɔ nib, ní bi yɔ̃oǹní bibunliibi kɔkɔ ki cáań u-cee 36ki mèé-u yii ú yàntī bí gbēēu-bɔkutil kpaanceetiŋu kpaŋkpan, ní bin kɔkɔ lafun gbēēyee pɔ́ɔkì.

will be added

X\