1 Fariisab nì bimaradakaliibi biba nìn nyánní Jeerusaleem ki dɔ́miń ki kpáfì Yeesu cee. 2 Bi bí niinee, ní ki ká Yeesu boonnooliibi biba jīǹ, kaa fíntì bi-ŋalii kii bi-naanjab koobiliŋ nín sá puee. 3 Di sá yii Fariisab nì Juuda yab bin kíǹee kɔkɔ yaa kaa fíntì bi-ŋalii tiŋan, kii bi-naanjab nín nìn ŋáań puee, baa jīǹ. 4 Bi yaa tí nyánní kitiŋin ki bāańee, baa tí jīǹ asee bí fíntí bi-ba nì nnyim kí wàatī, ní kí nín jī. Bi cáá akoobil tikpil ki kútì ŋin bí nee pu: ŋiba sá bí fíntí kɔŋkɔmbi, kí fíntí aboon nì asambil. 5 Tíǹ pu ní Fariisab nì bimaradakaliibee nìn bālfì Yeesu yii: “Ba pu ní a-boonnooliibi kaa ŋúb̀ ti-naanjab koobiliŋ, kaa fíntí ki jīǹ?” 6 Ní Yeesu kíí-bi yii: “Mpoonnyoondambi, an pu ní Unimbɔti bɔnaatiliu Eesayi ŋmàn̄ u-takaldaun ki sòon̄ ni-pu yii Unimbɔti bí yii: 'Binib nee nyɔ́ŋkí-mi nì bi-nyɔmmun fam ní. Ama bi-pɔbiliŋ dátiǹ-mi. 7 Bi jáaḿ-mi fam ní, kun puee tin binib náańee ní bi dàkà, ní ki cáā yíì man marab.' ” 8 Ní Yeesu nìkī ki lī-bi yii: “Ni féeń Unimbɔti marab ki fòol̄ nnibiyaamu koobiliŋ.” 9 Ní u gítī kútì yii: “Ni féeń Unimbɔti marab tiŋan pu kí ŋmā kí ŋúb́ nimbi ni-ba koobiliŋ. 10 Mooisi nìn lī u-marabin yii: 'Á nīn tɔ́ a-baa nì a-na,' ní ki gítī lī yii: 'Un yaa sòon̄ ki bíil̀ u-baa kii u-nee, séé bí kpò-u.' 11 Ama nimbi lì yii, unil yaa cáá tiba ki bàà ŋūǹ kí tīī u-na kii u-baayee u ŋūǹ kí lì yii: 'An wanti sá kɔɔban', (an dàkà yii saraa ki tīī Unimbɔti). 12 U yaa lī mimmee, naa ti yàntī ú ŋá tiba kí tīī u-baa kii u-na. 13 Míǹ ní ni cáá nimbi ni-ba koobiliŋ ŋin ni-baabi dàkā-nee ki cáā kpìtī Unimbɔti bɔti. Tiwan tikpil bí ni ŋáań míǹ mbaantiim.” 14 Míǹ boonee, Yeesu gítī yíiń kunipaau u-cee, ní ki tùkū-bi yii: “Ni-kɔkɔ ń pīlfìmaan kí gbìl̄ m nín dàá lì puee taapu! 15 Tiba kaa nyēeń dipaal pu kí kɔ́ unilin kí kɔ́ǹ-u tijɔkɔndi Unimbɔti nimiin. An sá tin nyēeń unilinee di kɔ̄ntí-u tijɔkɔndi Unimbɔti nimiin. [ 16 Un yaa cáá ditafalee ń gbìl̄ taapu.”] 17 Ŋyunti ŋun u kɔ́ kudiin ki kíǹ u-babee, ní u-boonnooliibi bālfì-u dilaŋkpandi din u bàà gāāyee taapu. 18 Ní u kíí-bi yii: “Ni mun kaa cáá iciin níiin? Naa gbìl̀ yii tin kɔkɔ nyēeń dipaal pu ki kɔ́ò unilinee kaa ŋūǹ kí kɔ́ǹ-u tijɔkɔndi Unimbɔti nimiinaaan? 19 Di sá yii tijikaal kaa kɔ́ò unil pɔbilin, an kɔ́ò u-poon ní, ní ú cù pɔɔm.” (Yeesu lī míǹ ki dàkā yii tijikaal kɔkɔ ŋān̄ ki tīī unil ń jī.) 20 U gítī lī yii: “Tin nyēeń unilinee di sá tin kɔ̄ntí-u tijɔkɔndi Unimbɔti nimiinee. 21 Di sá yii binib pɔbiliŋin ní ilandɔkɔkpiti kɔkɔ nyēeń: binaacimpɔmbi nì bisapɔmbi jɔkɔnti, bunaayubu, nnikpaakoon, 22 binimpoobi nì bininjab laakpaati, ikummunti, digaŋgam, diŋmatindi, bimaramɔntiibi fátam, nnimidiki, tibɔfan, timɔn nì ŋyipɔn. 23 Tibɔkpitil gbanti kɔkɔwoooo nyēeń binib pɔbiliŋin ní ki kɔ̄ntí-bi tijɔkɔndi.” 24 Yeesu yíkì niinee, ki pɔ́otì Tiir nì Siidɔn jaaŋŋu pú. U bàn̄ ki kɔ́ kudii kubɔn, kaa bàà là yii báà ubɔ ń béé u-pu, nì míǹ kɔkɔee, waa ŋúń ki bál̀. 25 Unimpu ubɔ nìn bí, ki cáá kisapɔmbiki arasinii kā ki-pu. U nín gbìl̄ bi sòon̄ Yeesu puee, waa ti kāl̀, u yíkìń ní malaa, ki dɔ́miń ki lítì u-nimiin. 26 Unimpu gbanti kaa nìn sá Ujuudanimpu, u sá Feenisii, Siirii tiŋkin ní. U mēēYeesu ń jà arasiniiyee u-bisal pu. 27 Ní Yeesu kíí-u yii: “Yàntī mbiyaamu ń díkí kí wàatī. Kun puee an kaa máaǹ bí dū mbiyaamu jinti kí tīī mbɔbiyaamu!” 28 Ní unimpuee fātì ki kíí-u yii: “Tiŋman, an sá míǹ ní, m-Dindaan. Ama mbiyaamu yaa bíī jīǹ an gbátée, mbɔbiyaamu mun tòɔ́ igbasigbasi ní.” 29 Niinee, ní Yeesu bí-u yii: “A kíí tiŋan! Míǹ puee, nín̄ kùǹ. Arasiniiyee nyáń a-bisalin.” 30 Unimpuee fātìi gítìń u-dumpuee arasiniiyee nyáń u-bisalin u pɔ́ɔkì ki dɔ̄ u-dooŋu pu. 31 Yeesu yíkì Tiir tiŋkin ki fātìi dīń Siidɔn, ki jítìń ntimu saalaa pu ki nín dòoń Gaaliilee mɔɔl watil. 32 U bàn̄ niinee, bi cáań-u umɔɔmiin ubɔ ní ki mēē-u yii ú dū u-ŋalii kí páań u-pu. 33 Ní Yeesu yɔ̃oǹ-u ki cūnnì ŋkpaanceeti u nì u liitil, ki dū u-ŋambiyaamu ki bɔ́ umɔɔmiinee tafaliŋin, ní ki tíil̀ timɔtan ki dūu gbēēumɔɔmiinee limbil, 34 ki wáaǹ kutaa ki fáá diniindi, ní ki lī yii: “Eefata!” An taapu sá yii: “Cúú ŋátí!” 35 Niin niin ní umɔɔmiinee tafaliŋ cúū ŋátì, ní u-limbil mun bútì, ní u kíǹ ki sòoǹ tiŋan. 36 Ní Yeesu kpáafì-bi bí taa péēmāafì báà ubɔ tin jítèe. Ama Yeesu nín mɔ́tí yii bí taa lèe, míǹ ní bíǹ dàá nín mòtīí lì. 37 Bi nìn bākatì tikpil, ní ki lì yii: “Tin kɔkɔ u ŋáańee ŋān̄ ki lákatì, ali ki yàntī bitafakpaafub gbìl̀, bimɔɔmiimbi sòoǹ!”
