MAARKI 2

1Iwiin iba boonee, Yeesu nìn gítì Kapeenaayum, ní an gbītì yii u bí kudiin 2ní kunipaau dɔ́miń ki kpáfì ki gbí kudiiyee, ní mpaan kaa ti kpáàā bí kipunyɔkɔpu gba. U nìn bíī sòoǹ nì bi Unimbɔti bɔti ní. 3Ní bininjab binaa túǹní ufaliŋfaan ubɔ ki cáań u-cee. 4Nniwíin puee, baa ŋúń kí pìl̄ Yeesu. Míǹ puee, bi nìn jɔ́m̀ ki cíl̀ kudii yilpu ki bíitì laakin Yeesu bée, ní ki dū ufaliŋfaan nì nlún ki dīń dibundee ni ki sīntìń ki bíl̀. 5Yeesu nín ká binib gbanti fɔ̃ɔ̃ ki kíí yii u ŋūǹ kí cáaǹ ubunlee, ní u tùkū ufaliŋfaanee yii: “M-biki, m dū a-kpitii ki pú-si.” 6Bimaradakaliibi biba nìn kā niin ki dàkafī bi-pɔbiliŋin yii: 7“Ba pu ní uninja nee lì míǹ? U ŋèeǹ nì Unimbɔti ní. Ubɔ kaa ŋūǹ kí dū ikpiti kí pɔ̄ asee Unimbɔti baba.” 8Niinee Yeesu béè bi-landɔkɔŋu ní ki bālfì-bi yii: “Ba pu ní ni dàkafī míǹ ni-pɔbiliŋin? 9Ba di kaa pɔ̄ɔ̄ bí lì ufaliŋfaan ní: 'A ká a-kpitii pɔ̄tam' di kaa pɔ̄ɔ̄ dilil naaan? 'Yòon̄ a-lúŋŋu kí nīn còom̄' di kaa pɔ̄ɔ̄ ní? 10Ama ní béé yii man Kinibiki cáá mpɔn kitiŋ pu kí dū unil kpitii kí pɔ̄-u.” Niinee ní u tùkū ufaliŋfaanee yii: 11“Sii yīkìm̄ kí yòon̄ a-lúŋŋu kí nīn kùǹ a-dumpu!” 12Ní u nyīī ki yíkì dicilpu niin ki yɔ̃oǹ u-lúŋŋu ki nyáń báà ŋma nimiin, ní an bākatiǹ-bi sèeee, ní bi bíī pàkà Unimbɔti ki lì yii: “Taa láá péēká míǹ dalba dalba!” 13Yeesu tí fātìi nyáń Gaaliilee mɔɔl caŋin, kunipaau tí kíĺ ki dòoń u-cee u dàkà-bi Unimbɔti bɔti. 14U jītée, ki ká Leefii Alfee jipɔɔn kā fɔtiku diikun. Ní u bí-u yii: “Dāan̄ kí nīn nɔ́ɔ́-mi!” Ní Leefii lafun yíkì ki táá-u. 15Yeesu nìn kɔ́ Leefii dumpu ki bíī jīǹ tijinee, bifɔtiliibi tikpil nì binikpitib bin kɔ kíǹee dɔ́miń ki kútì u nì u-boonnooliibi pu: di sá yii an nikpitibee nìn nɔ́ɔ́-u ki wīikí. 16Bimaradakaliibi bin sá Fariisab kitilinee nín ká u nì binikpitib kpáfí ki jīǹee, ní bi bālfì u-boonnooliibi yii: “Ba pu ní u nì binib nee kpáfí ki jīǹ: míǹ?” 17Yeesu gbìl̄ bi nín lī puee, ní ki gāā-bi dilaŋkpandi yii: “Bin cáá laafiyee kaa nyàab̀ unyɔɔdaan, see bin būǹee di nyàab̀ unyɔɔdaan. Di sá yii maa dɔ́miń kí yíiń deedeedambi, m dɔ́miń kí yíiń binikpitib ní.” 18Jaan boonnooliibi nì Fariisab nìn bɔ̃ob̀ kinyɔkɔ. Dalbee ní biba dɔ́miń ki bālfì Yeesu yii: “Ba pu ní Jaan boonnooliibi nì Fariisab boonnooliibi bɔ̃ob̀ nnyɔmu ní sii yab kaa bɔ̃ob̀ ní?” 19Ní Yeesu fātìi bālfì-bi yii: “Ubɔ yaa cáá unimpucaan ki yaa yíiń u-bɔɔbee, bi jīǹ ki nyù naaan, nnyɔmu ní bi bɔ̃ob̀ ní? Unimpucaan cal yaa bí bi-kansikinee, baa kàal̀ ŋkùm. 20Ama ŋwiin ŋubɔ bí ki dòoń bi dàá dāa yòon̄ unimpucaan cal bi-kansikin, an yuntiŋu ní u-bɔɔbi dāa bɔ̃ob̀ nnyɔmu. 21“Bi yaa dū ŋŋaapɔɔn ki dūu lìb̄ satakpiki bundi, ki yaa fíntèe ŋŋaapɔɔn kɔ̃ontí ní kí kpáaǹ satakpiki kí cátí, ní dibundee ń mòtīí wàan̄. 22Míǹ mbaantiim ní baa tí dù ndapɔm kí fúuń tilɔkpikilin. Bi yaa dūu fúuń míǹ, tilɔkpikil pòol̄ ní ndaam ń fá, ní tilɔti mun ń bīil̀. Bi dù ndapɔm kí fúuń tilɔpɔn ni ní.” 23Ŋwiŋŋuŋfikaa ŋubɔ dalee, Yeesu nì u-boonnooliibi bíī jītí blee kpaaŋŋin ní u-boonnooliibi bíī gífí blee fini ki ŋmèem̄ abil ki ŋmɔ́ò. 24Fariisab ká mimmee, ní ki bí-u yii: “Ba pu ní a-boonnooliibi ŋáań min kòɔ́ ŋwiŋŋuŋfikaa dalee?” 25Ní u fātìi kíí-bi yii: “Naa láá péē kàan̄ takalda poon ki ká tijin takaasiu nín nìn cúú ubɔti Dafiidi nì u-naacimbi bi ŋá pueeee? Ŋyunti ŋun Abiyata nìn sá usaraaŋakpilee, 26Dafiidi nìn kɔ́ Kunimbɔtidiin ki ŋmɔ́ saraa kpɔnɔb ki kíǹ ki tīī u-yab. Ti-koobiliŋ poonee, usaraaŋal baba di cáá nsan kí ŋmɔ́ an kpɔnɔb gbanti, ama Dafiidi nìn ŋmɔ́ ki kíǹ ki tīī u-naacimbi gba.” 27Yeesu gítī lī-bi yii: “Unimbɔti náań ŋwiŋŋuŋfikaa binib pu ní waa náań binib ŋwiŋŋuŋfikaa pu. 28Man Kinibiki di sá ŋwiŋŋuŋfikaadaan.”

will be added

X\