MAARKI 16

1Ŋwiŋŋuŋfikaa jítèe, Maarii Magdala yɔu, nì Saloomee nì Maarii Jaaki na, cūtì ki dáń talaalub bin bi cáā ŋáŋkí bitaŋkpiibi wuntee, kí cáá ŋmìtī Yeesu wunti. 2Ku wúntì ŋwimpeekaa dal kutaafaau pòlpɔlee ní bi búntì dikaakul laŋki. 3Bi cée ní ki bàlfī tɔb yii: “Ŋma di dàá tin bìkitī-ti ditaŋkpal kí wàatī dikaakul nyɔkɔ dee?” 4Bi wáaǹ ki kpēēyee, ki ká ditaŋkpakpaandee bíntì ki wāatì dikaakul nyɔkɔ. 5Binimpoobee bāań ki kɔ́ dikaakulinee, ní ki wál̀ unaacimpɔɔn ubɔ kā bi-ŋaŋgiil pú ki pēējibapiin, ní tifaandi kɔ́-bi. 6Ama ní unaacimpɔɔnee bí-bi yii: “Taa fàŋkìmaan! M nyí ni nín nyàab̀ Yeesu Naasaareeti yɔu un bi kpáá ndɔpuntikaa puee. U fīkitì, waa bí doo. Kpèèmaan, laakin bi nìn bíl̀-uee sèé, 7kí nín̄ cámaan kí tùkù u-boonnooliibi nì Piyeer yii u dàá lìntī, ni tin kāntí-u Gaaliilee. Niin ní ni tin kāntí-u kii u nín nìn péētùkū-ni puee.” 8Bi nyáń dikaakulinee bi-pɔbiliŋ bíil̀ ní bi sáń bi-wunti gbáà. Bi nín fàŋkée puee, baa péēmáafì báà ubɔ tiba. [ 9Yeesu nín fīkitì kinyɔŋ wimpeepeekaaŋuee, Maarii Magdala yɔu un ni u nìn jìn̄ arasiniibi bilulee ní u yāntì u péé ki ká-u. 10Unimpuee cūtì ki máafì bin nì Yeesu nìn tāatée, u bàn̄ee bíǹ kā nì diniminaamandi ki sūǹ. 11Ŋyunti ŋun bi gbìl̄ unimpuee cee yii Yeesu bí dimaŋfalin u ká-u muee, baa fɔ̃ɔ̃ ki kíí. 12Míǹ boonee, Yeesu gítī tí nyántì u-ba mbamin nsanni ki dàkā bi-kansikin bili bin nìn yíkì ki cá kitimbilii kibanee. 13Bi nìn fātìi gítìń ki máafì bin kíǹee, ní baa tí fɔ̃ɔ̃ bí mun bɔti ki kíí. 14Boonee ní u nyántì u-ba ki dàkā u-kpambaliŋ saalaa nì dibee ŋyunti ŋun bi kā ki jīǹ tijinee. Yeesu wòon̄-bi bi-pɔbiliŋ nín gbìfì baa fɔ̃ɔ̃-u ki kííyee pu, kun puee baa nìn fɔ̃ɔ̃ bin ká u nín fīkitèe bɔti ki kíí. 15Ní u tùkū-bi yii: “Cùmaan kitiŋ jaŋŋi kɔkɔwoooo kí sòoǹ tibɔmɔntiil nee kí tīī kunibuluu kamaa! 16Un yaa fɔ̃ɔ̃ ki kíí ní bi fùl̄-u Unimbɔti nyimee kāntí difiil. Ama un yaa kaa fɔ̃ɔ̃ ki kííyee dāa kɔ́ò ditafadaaldin ní. 17Maamaaci tuuŋŋi ŋin bin yaa fɔ̃ɔ̃-mi ki kííyee dàá nīn ŋáańee sèé: m-yindi puee bi dàá jà arasiniibi, ki dàá sòoǹ isooncaan. 18Bi dàá cūtì ikoobu, kí nyò ndabiim, tiba kaa làá ŋá-bi. Bi dāa pāantí bi-ŋalii bibunliibi pu ní bí ká dicaandi.” 19Ti-Dindaan Yeesu sòon̄ nì bi míǹ ki dɔ́òyee, ní ki yíkìi nín jɔ́ḿ yilpu ki tin kāl̀ Unimbɔti ŋaŋgiil pú. 20Ní u-boonnooliibi búntì ki sòoǹ tibɔmɔntiilee ajan kɔkɔ, ní ti-Dindaan bí bi-cee ki ŋáań maamaaci tuuŋŋi ki dàkà yii tibɔti tin bi sòoǹee sá ibaamɔn.]

will be added

X\