1 Kutaa wúntèe, bisaraaŋakpilib péé ki kpáfì, bi nì bikpilib nì bimaradakaliibi, bíǹ bibɔsoonliibee kɔkɔ, kí sòoǹ Yeesu bɔti, ní ki bɔ́ob́-u ŋŋmii ki cáā ŋúbiǹ gɔmina Piilati. 2 Ní Piilati bālfì-u yii: “Sii di sá Juuda yab bɔtiuaaa?” Ní Yeesu kíí-u yii: “A nín lī puee, míǹ dee.” 3 Bisaraaŋakpilibee dɔ́miń ki sòon̄ tibɔti tikpil ki túǹ u-pu. 4 Míǹ puee, ní Piilati fātìi gítī bālfì-u yii: “A ŋmí níiin? Aa gbìl̀ tin kɔkɔ bi sòoǹ ki tūntí a-pueeee?” 5 Yeesu kaa ti péēgātì tiba, ní Piilati bākatì sèeee. 6 Jiŋaal un Juuda yab jīǹ ki téetí Unimbɔti nín nìn nyántì bi-naanjab Eejipitee sá kamaayee, gɔmina Piilati nìn gīintí usarkadaan ubɔ, un samaa yaa mēē-uee ní kí líí. 7 Kijapaai kiba nìn bí, bi yíì-kì Baaraabasi. Bi nìn cúú u nì u-jutiibi biba ki tɔ́ sarkan, kun puee bi nìn kūū unil daliŋkin kunipaau kubɔ nìn yíì yii baa là kí pīlfiǹ gɔminee. 8 Ní kunipaau jɔ́m̀ ki bàlfī Piilati ń gíiǹ un bi lèe kí líí, kii u nín kpàāa ŋáań-bi puee. 9 Ní u bālfì-bi yii: “Ni là ḿ gíiǹ Juuda yab bɔtiu kí líí-naaan?” 10 Di sá yii u nìn béè yii kináŋ kin kin bisaraaŋakpilib nìn cáá Yeesu puee di yāntì bi cáań-u ki ŋúbiǹ-u. 11 Niinee, bisaraaŋakpilibee téé kunipaau ń lì yii bi là gɔmina ń gíiǹ Baaraabasi ní kí líí. 12 Ní Piilati fātìi bālfì-bi yii: “Kin, m dàá ŋá un ní ni yíì Juuda yab bɔtiuee mana?” 13 Ní bi fātìi kíí-u ki téeń mpɔn yii: “Bí kpáá-u ndɔpuntikaa pu!” 14 Ní gɔmina Piilati fātìi bālfì-bi yii: “Tikpitil tin u ŋée di sá tilati?” Niinee ní bi mɔ̄tìi kúuǹ mpɔn yii: “Bí kpáá-u ndɔpuntikaa pu!” 15 Piilati là kí sòŋkì bi-pɔbiliŋee, ní ki gíiǹ Baaraabasi ki líì-bi, ní ki yāntì bi gbáń Yeesu anaalab, ní ki dū-u ki tīī-bi bí cáá-u kí kpáá ndɔpuntikaa pu. 16 Niinee, soojab cáá Yeesu ki kɔ́ǹ gɔmina cindi poon ní ki yíiń disoojakitil din kíǹee kɔkɔ. 17 Ní bi dū dibɔkutimandi cínciŋ ki pēeǹ Yeesu, ní ki dū ikuŋkum ki lùn̄ kibeefuulii ki cíkiǹ-u, 18 Ní ki kíĺ ki jáaḿ-u yii: “Ti jáaḿ-si Juuda yab bɔtiu!” 19 Bi cáá ŋkpɔndɔ ki fátí u-yil ki tíiĺ timɔtan ki sìtī u-pu, ní ki dòoń ki gbàantí u-nimiin. 20 Bi bēel̀-u míǹ ki dɔ́òyee, ní ki cúú dibɔkutimandee ki pēetì-u ní ki gíiǹ úǹ u-ba wampeeŋkaati ki pēeǹ-u, ki nyántì-u kí cáá tin kpáá ndɔpuntikaa pu. 21 Bi cée, ki ká usanjitil ubɔ nyánní kusaau, bi yíì-u Siimɔn, u sá Siireeni tiŋki, Aleeksandi nì Rufusi baa dee. Ní bi páb́-u yii ú fɔ̃ɔ̃ Yeesu dɔpuntikaaŋu kí bùkun̄, 22 ní ki cáá Yeesu ki cūnnì laakin bi yíì Gɔlgɔtee (an taapu sá yii Kuyikpabiku laŋki). 23 Bi tīī-u ndamam min ni nnyɔkɔ ŋun bi yíì miiree ŋmàl̄ee ú nyò, ama u yíì, kaa nyùn̄. 24 Ní bi dū-u ki kpáá ndɔpuntikaa pu, ní ki yākatì u-wampeeŋkaati, ki tɔ́ kasi kí kpèè báà ŋma nín dàá jī kuŋyee. 25 An nìn sá ntaafaawìiń tikúti tiwa ní bi kpáá-u ndɔpuntikaa pu ki dūu cɔ́oǹ. 26 Bi nìn ŋmàn̄ tiŋmaŋmabti ki nákaǹ u-yil pu kí dàkà kun pu ní bi kūū-uee, yii: “Juuda yab bɔtiu sèé.” 27 Bi nìn kpáá digaŋgandambi bili mun idɔpuntikaa pu ki dūu cɔ́oǹ ki ŋàl̄-u, ubɔ u-ŋaŋgiil pú, un kíǹee u-ŋaŋgan pú. [ 28 An ŋá kii an nín nìn ŋmàn̄ puee dee yii: “Bi dū-u ki ŋàl̄ binikpitib.”] 29 Bisanjitiliibi nìn bèel̄-u ní ki gàatī ayil ki lì yii: “Iiin, sii un lī yii a dàá gbá Kunimbɔtidii kí wīī kí fàtīí mā-ku iwiin ita dalee, 30 fīī a-ba kí kpákatiń ndɔpuntikaa pu!” 31 Bisaraaŋakpilib nì bimaradakaliibi mun nìn bí ki bèel̄-u bi-kansikin, yii: “U fīī bin kíǹee ní kaa ŋūǹ kí fīī u-ba! 32 Israyeel yab bɔtiu Kriisitoo ń kpákatiń kɔŋkɔnnee, tí kpèè kí nín fɔ̃ɔ̃-u kí kíí!” Bin bi nìn kpáá idɔpuntikaa pu ki cɔ́oǹ ki ŋàl̄-uee mun nìn bí ki sìí-u. 33 Kuwiŋkuluu gbáńee dibɔmbɔndi jéetì kitiŋ kɔkɔ pu ki tin sāā tikúti tita. 34 Tikúti titee, Yeesu fáá mbiil mpɔn, yii: “Eelooi, Eelooi, lama sabakitanii?” (An taapu sá yii “M-Nimbɔtiu, m-Nimbɔtiu, ba ŋá ní a dū-mi ki fá?”) 35 Bin bí niinee biba nín gbìl̄ u fáá mbiil mimmee, ní bi bí yii: “Pīlfìmaan! U yíì Eelii dee!” 36 Ní bi-kansikin ubɔ sáǹ ki yɔ̃oǹ kuca ki múĺ ndaam min gàm̀ee ni, ní ki dūu túuń ŋkpɔndɔ pu ki tīī Yeesu ń nyò, ní ki lī yii: “Tí yàntīmaan kí kpèè Eelii yaa làá dāan̄ kí kpákatiń-u!” 37 Yeesu gítī fáá mbiil mpɔnee, ní ki kpíì. 38 Ní sata un nìn pītì Kunimbɔtidii poon ki gāntì laakin bi yíì circir páaa laŋkee nì laan kíǹee cúū cátì abuku ali ki kíliń yilpu ki dāa kátì taapu. 39 Room yab soojakpiliu un nìn sí ki bíitìń Yeesuee wál̀ u nín sīntì puee, ní ki lī yii: “Tiŋman kijapaai nee lafun sá Unimbɔti Jipɔɔn ní.” 40 Binimpoobi biba mun nìn sí kudandaŋu ki kpèé. Maarii un nyánní Magdala tiŋkinee, nì Saloomee nì Maarii un sá Jaakiwaai nì Joosee nee, mun nìn bí bi-kansikin. 41 Bíǹ di nìn táá Yeesu ki tútuǹ-u ŋyunti ŋun u nìn bí Gaaliileeyee. Biba mun tikpil nìn céeǹní-u ki jɔ́m̀ Jeerusaleem. 42 - 43 Bibɔsoonliibi kansikin ukpil ubɔ nìn bí, binib nìn tɔ́-u tiŋan pu, bi yíì-u Jooseefi u sá Arimatee tiŋkin, ú mun nìn bɔ́ntì u-ba ki cí Unimbɔti beel. Ŋwìiń nín tɔ́ob́ kí jēetí ŋwiŋŋuŋfikaa ń kíĺee, ní u ká dipɔbil ki cūtì Gɔmina Piilati cee ki mēē-u nsan kí yòon̄ Yeesu wunti. 44 gɔmina Piilati nín gbìl̄ yii Yeesu pūtì kpáàā kpíìyee, ní u bākatì, ní ki yíiń usoojakpil ki bālfì-u yii Yeesu nín kpíìyee an yúntàaa. 45 Usoojakpilee nín tùkū-u yii Yeesu lafun kpíì an yúntèe, ní Piilati pú Jooseefi kinyɔkɔ yii ú cùú yòon̄ Yeesu wunti. 46 Ní Jooseefi cūtì ki dá ŋŋaapiin ki dɔ́miń ki kpáatì Yeesu wunti, ki dūu tākaǹ ŋŋaapiinee ni, ní ki cáá-u ki bíl̀ dikaakul din bi nìn lùkū ditaŋkpalinee. U dū-u ki ŋá dikaakulee ni ki dɔ́òyee, ní ki bíntì ditaŋkpakpaandi diba ki dūu pīiǹ dikaakul nyɔkɔ. 47 Maarii Magdala yɔu nì Maarii Joosee na mun nìn sí ki kpèé laakin bi dū-u ki bíl̀ee.
