EEBRU 7

1Ŋyunti ŋun ní Abraam nìn cūtì ki jáń ki jíń bibɔtiibi ki fàtīi kùnnée, Meelkiseedeeki di nìn túŋkì-u nsanni ki bīiǹ u-puee. Meelkiseedeeki gbanti di sá Saleem yab bɔtiu, ní ki gítī sá Unimbɔti un bí kutaa fɔ́ŋŋŋee saraaŋaliu. 2Úǹ ní Abraam nìn lēēu-wanti tin u cááyee saalaa kamaa puee kubɔ kubɔ ki tīī. Meelkiseedeeki taapu sá yii: Ubɔtikpaan un bí deedeeyee; ní boonee u gítī sá Saleem yab bɔtikpaanu, an taapu sá yii ŋgbansɔŋfi bɔtikpaanu. 3Meelkiseedeeki gbantee kaa cáá baa, kaa cáá na, kaa cáá nnyéen, an kaa cáá yii bi màl̄-u, kaa cáá yii u kúù ali kii Unimbɔti Biki ní, u dàá nīn péēsá usaraaŋal ní kí nīn cá jaanjaan. 4Ní kpèè u nín sá ukpaan miŋyee. Ti-naanja Abraam u-ba nìn tīī-u tiwan tin u nìn jáń ki fɔ̃ɔ̃ kujaaunee saalaa kamaa puee kubɔ kubɔ ní. 5Mara poonee, Leefii naakookun yab bin sá bisaraaŋaliibee di cáá nsan kí fɔ̃ɔ̃ bi-nabiyaamu mun sá Abraam maaliŋunee cee bi-wanti saalaa kamaa poonee kubɔ kubɔ. 6Ama Meelkiseedeeki gbanti kaa sá Leefii naakookun yab ubɔ ní ki fɔ̃ɔ̃ Abraam wanti saalaa kamaa puee kubɔ kubɔ, boonee ní ki bīiǹ Abraam un Unimbɔti nìn líì dipoondee pu. 7Ti-kɔkɔ péēnyí yii un jítiǹ-see di bìintí a-boon. 8Juuda yab saraaŋaliibi bin fòol̄ bi-wanti saalaa kamaa pu kubɔ kubɔee sá binib ní, ki kúù, ama ti ká yii Meelkiseedeeki úǹ péēbí ní kí nīn cá jaanjaan. 9Ti ŋūǹ kí lì yii Juuda yab saraaŋaliibi bin bi-jutiibi nìn tìì bi-wanti saalaa kamaa pu kubɔ kubɔee naanja Leefii u-ba dī Abraam pu ki tīī Meelkiseedeeki u-wanti saalaa kamaa puee kubɔ kubɔ. 10Ŋyuntee, baa nìn dáá màl̄ Leefii, ama u nìn kā u-naanja Abraam poon ŋyunti ŋun Meelkiseedeeki nìn túŋkìń-u nsanni, u dāa pàn̄ tin tin u fɔ̃ońee saalaa kamaa puee kubɔ kubɔ ki tīī-uee. 11Bi yaa ŋúń ki dī Leefii yab saraaŋatam pu ki ŋá atummɔnti ŋin ŋūǹ kí fīī binib kun puee an di sá mara un bi tīī Israyeel yab bi tɔ́kɔ́ an puee, ba pu ní Unimbɔti bàà gítī tūǹní usaraaŋal ubɔ Meelkiseedeeki yam kaa sá Aarɔn yam? 12Mimmee, bi yaa kpántì bisaraaŋaliibee, see bí kpántí marab mun. 13Ama ti-Dindaan un pu ní tibɔti nee sòon̄ ki dàkèe sá kunaakoou kun yab kaa péēŋá disaraatundi nsaraafan cee ki ká jaanjaanee ní. 14Báà ŋma nyí u-pu yii u sá Juuda naakookun ní, Mooisi kaa nìn tīī kunaakoou gbanti disaraatundi báà fiii. 15Tin bí nee gítī dàkà ki cántí tibɔti taapu, di sá usaraaŋal ubɔ gítī nyáń ki náań nì Meelkiseedeeki. 16Úǹ saraaŋatam nyáń u-ba, kun puee an kaa sá marab bin binib ŋmàn̄ ki yɔ́oǹee pu ní u dī ki kpántì usaraaŋal, ama u nín cáá mpɔn kí nīn bí jaanjaanee pu ní u kpántì usaraaŋakpil. 17Di sá Unimbɔti takaldau sòon̄ u-pu yii: “Sii di dàá nīn péēsá usaraaŋal kí nīn cáā cá jaanjaan, Meelkiseedeeki yam.” 18Mpeepeekaamee, bimarakpikib kpītì, kun puee baa pɔ̄ɔ̄ kaa tútuǹ binib. 19Nliliitiimee marabee kaa ŋúń ki kítì-ti tí kpántí biniŋmambi bimɔntiibi bin pu baa kāntí ikpiti ibee, ama Kriisitoo sá-ti dimákabaamɔndi din pu ti ŋūǹ kí dī kí sútí kí kɔ́ĺ Unimbɔtee. 20Kí wàatēe, Unimbɔti baasii pūtì ní ki bí yii Kriisitoo ń nīn sá usaraaŋal, 21ama bisaraaŋaliibi bin kíǹee waa pūtì ki lēēubɔ míǹ, see Yeesu pu ní u pūtì ki lī yii: “Man Unimbɔti di pūtì yii sii di dàá nīn sá usaraaŋal kí nīn péēcáā cá jaanjaan, m kpá kí kɔ́ntí m-nyɔkɔ.” 22An puee Yeesu di sá dipoommɔntiilee daaŋku kun dàkà yii an dàá lafun ŋá mimmee. 23Tin gítī nyáń u-ba nì Kriisitoo saraaŋatam nì bin kíǹee yamee di sá binib tikpil nìn túń disaraatundi kun puee bi nìn púl̀ ní ki kúù ní biba fòol̄. 24Ama Kriisitoo úǹ péēbí ní jaanjaan, an puee ubɔ kaa fòol̄ u-saraatundi. 25An pu ní u ŋūǹ kí fīī bin dì u-pu ki nyàab̀ Unimbɔtee an kɔkɔ pu, kun puee u péēbí ní, waa sá un kúùyee, ní ki mèé Unimbɔti bi-pu. 26Usaraaŋakpil un ti máaǹee dee, u bí circir, waa ŋá ikpiti iba, ikpiti iba kaa bí u-pu, Unimbɔti cúú-u ki lēē bikpitib kansikin ki jɔ́m̀ yilpu fɔ́ŋŋŋ. 27Waa bí kii bisaraaŋakpilib bin kíǹee nín bí puee, ki ŋáań bi-yil pu kpitii saraau baabadal kí wàatī kí nín ŋá samaa yɔuee. Ŋyunti ŋun u dū u-ba ki ŋá saraayee ní u kúntì saraabi ŋátam kɔkɔ. 28Mooisi marab nín yɔ́oǹ bin bí nīn sá bisaraaŋakpilibee nìn sá binib ní, baa cáá mpɔn bi-ba, ama ní boonee ní Unimbɔti sòon̄ ki pūtì ki lēē u-Jipɔɔn ki kāaǹ ú nīn sá usaraaŋakpil un sá uniŋman umɔnti un pu ikpiti iba kpée, kí nīn péē cáā cá jaanjaan.

will be added

X\