ATUUN 6

1Iwiin gbanti poonee Yeesu boonnooliibi wíiŋŋu nìn gbéeǹ, ní Juuda yab bin gbìl̀ greeki sooniee bíī gbùkum̄ nì Juuda yab bin péēbí bi-dumpu dooooyee, yii baa tìì bíǹ kpiipoobi tiwan tin bi yàkatī kutaa sá kamaayee kii bi nín tìì bin béeyee puee. 2Ní Yeesu kpambaliŋ saalaa nì alee yíiń biboonnooliibi kɔkɔ, ní ki bí-bi yii: “An kaa máaǹ tí yàntī Unimbɔti bɔti disoondi kí nīn kpèé tijin laŋki. 3Míǹ puee, nnabiyaamu, lēēmaan ni-kansikin bininjab biluli bin pu báà ŋma nyí yii bi sá binimɔntiibee nì bin ni Unimbɔti Fām gbí tiŋanee, binib bin cáá iciinee, tí dū ditundi gbanti kí ŋúbiǹ-bi. 4Mimmee, timbi kāntí mpaan kí dū ti-yuntiŋu kɔkɔ kí mèè ŋwimmeem kí sòoǹ Unimbɔti bɔti tin sá ti-tundee.” 5Tibɔti gbanti mɔ́ɔkiǹ samaa kɔkɔ, ní bi lēē Eetiyeen, un nìn fɔ̃ɔ̃ ki kíí tikpil Unimbɔti Fām bí u-ni tiŋan puee, nì Fiiliipi nì Prookɔɔr nì Niikanɔɔr nì Tiimɔn nì Paameenasi nì Niikoolaa un sá Antiyɔsi ki fɔ̃ɔ̃ Juuda yab marabee. 6Bi cáań-bi ki dàkā Yeesu kpambaliŋ, ní akpambalee mēēUnimbɔti ki tīī-bi, ní ki dū bi-ŋalii ki páaǹ bi-pu. 7Unimbɔti nyɔɔbundi mòtīi gbìtī ajan kɔkɔ, ní Yeesu boonnooliibi mòtīi wīintí tikpil Jeerusaleem tiŋkin, ki kpáaǹ bisaraaŋaliibi tikpil nìn fòol̄ Yeesu bɔti ki kíikí. 8Unimbɔti nìn pūǹ Eetiyeen diyimɔɔl nì mpɔn tikpil, ní u nìn ŋáań maamaacikpaambi nì tidaandi samaa kansikin. 9Dikitil din bi nìn yíì iyumbu in bi líìyee kitilee nib nìn yíkì ki bíī kpākantí Eetiyeen. Bi nìn sá Juuda yab bin nyánní Siireen nì Aleeksandrii nì Siiliisii nì Asiiyee ní. 10Ama baa nìn ŋūǹ kí sòoǹ kí líí-u, iciin in Unimbɔti Fām nìn yàntī u sòoǹee pu. 11Míǹ puee bi tīī njapaamu mubɔ tiba dibalin bi lī yii: “Ti gbìl̄ u sòoǹ tibɔti ki bíiĺ Mooisi nì Unimbɔti yindi.” 12Ní an cúú kunipaauee poon ki kūtì ki kpáaǹ bikpilib nì bimaradakaliibi, ní bi cūtìi cúuń-u mpɔn ki cáań bibɔsooŋkpaambi nimiin. 13Ní bi yāntì binib biba mɔ́ntì nnyimɔn u-pu yii: “Uninja nee péēsòoǹ kaa gbèentí ki bíiĺ Kunimbɔtidii nee nì Mooisi marab, 14kun puee timbi gbìl̄ u bí yii Yeesu Naasaareeti yɔu nee dàá kpìtī Kunimbɔtidii nee kí kpántí akoobil ŋin Mooisi nìn tīī ti-naanjabee.” 15Bibɔsooŋkpaambi bin nìn kēe kɔkɔ dū bi-nimikpeeŋu ki báaǹ Eetiyeen pu, ní ki ká yii u-nimiin kpántì kii Unimbɔti tūuŋŋu nimiinee.

will be added

X\