1 Akpambal nì nnabiyaamu mun nìn bí Juudeeyee gbìl̄ yii bin kaa sá Juuda yabee mun fɔ̃ɔ̃ Unimbɔti nyɔɔbundi. 2 Piyeer nìn fātìi bāań Jeerusaleemee, bin gífée nìn bíī wòon̄-u, 3 yii u kɔ́ bin kaa gífée cee, u nì bi jíń tijin. 4 Ní Piyeer bíī máafí-bi tin jítèe, an nín kíliń pu ki tin kúntì puee, yii: 5 “M nìn bí Jɔpa tiŋki poon ki bíī mèéyee, Unimbɔti ŋúbitì m-nimiliŋ m wál̀ tiwan tiba, ti bí kii satakpaanee ki bɔ́ob́ ajannaatil pu ki nyánní yilpu ki sīntìń m-cee. 6 Ní m bíī kpèé sata poon dímmmee, ní ki ká tiwaŋkuti tin còom̄ ataa anaayee nì ipeel, nì tin fùee nì nnɔmbiyaamu, 7 ní m gbìl̄ nneen ŋubɔ bí-mi yii: 'Piyeer, yīkìí kpò kí ŋmɔ́!' 8 Ní m bí yii: 'Aayee, m-Dindaan! Doooo nee tiwan tin ti kòɔ́yee kaa láá péēkɔ́ m-nyɔkɔn.' 9 Nliliitiimin ní nneenee gítī lī yii: 'Tin Unimbɔti ŋáŋkèe, sii taa lì yii taa ŋān̄!' 10 Ali míǹ diba dibee mita, ní an wanti kɔkɔ fātìi nín jɔ́ḿ yilpu. 11 Dicilpu niinee, bininjab bita bin bi nìn túnní Seesaaree m-ceeyee bāań kudii kun ni m nìn kɔ́òyee nyɔkɔpu. 12 Ní Unimbɔti Fām bí yii man nì bi ń nīn cá, ḿ taa gùgufì. Man nì nnabiyaamu muluu nee di nìn nɔ́ɔ́ ki cūtì Kɔɔrneel dumpu. 13 Ní ú mun máafì-ti u nín nìn kā u-dumpu Unimbɔti tūuŋŋu ŋubɔ bāań ki tùkū-u yii: 'Tɔ̄ Jɔpa, bí yíiń-si Siimɔn un bi páaǹ diyindi yii Piyeeree. 14 U dàá tùkù-si tibɔti tin pu sii nì a-samaau kɔkɔ dàá dī kí ká difiilee.' 15 M kíĺ ki bíī sòoǹ nì bee, ní Circir Fām kpákatìń bi-pu kii mi nín nìn kpákatìń ti mun pu mpeepeekaam puee. 16 Niinee, m téetì ti-Dindaan nyɔɔbundi nee pu, yii: 'Jaan nìn fùul̀ binib Unimbɔti nyim, ama Unimbɔti dàá dāá fàl̀ nimbi nì Circir Fām ní.' 17 Unimbɔti pú bí mun u-Fām mbaantiim kii u nín nìn pú ti mun puee ní, kun puee ti-kɔkɔ fɔ̃ɔ̃ ti-Dindaan Yeesu Kriisitoo ki kíí. Kin man mun ŋma ní ḿ kpákaǹ Unimbɔti?” 18 Bi gbìl̄ mimmee, kaa ti bíī kpākantí-u, ki kíǹ ki bíī nyɔ́ŋkí Unimbɔti ki bí yii: “Mimmee, Unimbɔti yāntì bin kaa sá Juuda yabee mun fá bi-kpitii kí ŋmā kí ká dimaŋfal dee.” 19 Bin bin bi nìn páb́ bi yàl̄ Eetiyeen kúm boonee bàn̄ ali Feenisii nì Siipil nì Antiyɔsi, ki sòoǹ Unimbɔti bɔti Juuda yab ŋmaniŋma cee. 20 Ama bi-kansikin biba bin nyánní Siipil nì Siireenee bāań Antiyɔsi ki mun bíī tùkù bin kaa sá Juuda yabee dinyɔɔbummɔɔndi din sòoǹ ti-Dindaan Yeesu puee. 21 Ti-Dindaan pɔŋŋu nìn bí bi-cee, ní kunipaau nìn fɔ̃ɔ̃ ki kíí ki nɔ́ɔ́ ti-Dindaan. 22 Kriisitoo nikitil din bí Jeerusaleemee nín gbìl̄ an bɔtee ní bi dū Baarnaabasi ki tú Antiyɔsi. 23 U bàn̄ee ní ki ká Unimbɔti nín bīiǹ bi-pu miŋyee ní an mɔ́ɔkiǹ-u, ní u bíī tìì-bi kunyannyaau, yii bi-kɔkɔ ń nīn yú nì dipɔbil diba kí nīn nákaǹ ti-Dindaan. 24 Di sá yii u nìn sá unimɔnti, ki gbí Circir Fām nì fookii. Míǹ pu ní binib tikpil dɔ́miń ki nɔ́ɔ́ ti-Dindaan. 25 Míǹ boonee ní Baarnaabasi búntì Taarsi kí nyàab̀ Sɔɔl. 26 U bàn̄ ki ká-uee, ní ki cáań-u Antiyɔsi. Dibimmɔndi kɔkɔee, bi nìn dūu kāl̀ Kriisitoo nikitil kansikin ki dàkà binib tikpil Unimbɔti bɔti. Antiyɔsi tiŋkin ní bi péé péé ki yíiń Yeesu boonnooliibi yii Kriisitoo yab. 27 Ŋyunti gbantee, Unimbɔti bɔnaatiliibi biba nyánní Jeerusaleem ki sīntì Antiyɔsi. 28 Bi-kansikin ubɔ ní bi nìn yíì Agaabusi. Unimbɔti Fām yāntì kijapaayee yíkìi lī yii, ŋkùm miba dàá nyā kitiŋ kɔkɔ pu kí nīn pɔ̄ɔ̄. (Ní mi lafun bāań Kloodi beel yuntiŋu). 29 Ní Yeesu boonnooliibi bíī màkà báà ŋma ń tīī u nín ŋūǹ puee bí dūú tūtuǹ bi-nabiyaamu mun kɔ́ò Juudeeyee. 30 Bi tīīyee, ní ki yāntì Baarnaabasi nì Sɔɔl yɔ̃oǹ ki cáā cūnnì Jeerusaleem Kriisitoo nikitil kpilib cee.
