TIIMOOTEE 2 4

1Unimbɔti nì Yeesu Kriisitoo un dàá sòoǹ bin wāĺee nì bitaŋkpiibi bɔtee, nì u-dāantam nì u-beel puee, 2á sòoǹ Unimbɔti bɔti, báà ŋyunti yaa pɔ̄ɔ̄yaaa ŋu yaa pòfàaa, á nīn péēcɔ́ tibɔti gbanti pu, kí dàkà binib bi-yìntitam kí wòoǹ-bi bi-kpitii pu; kí tīī-bi kunyannyaau. Á nīn cáá kimɔtii tikpil a-dàkatam poon. 3Kun puee iyunti iba dòoń binib kaa dāa gítī là kí pīlfì ibaamɔn dàkatam, ama ní ki dāa nɔ̃otí bíǹ bi-ba nín fáatì miŋyee ní ki dāa kpáfí bidakaliibi kupaau bi-cee, ní bíǹ dàkà-bi tin bi là kí nīn pílfée. 4Baa dāa gítī là kí pīlfì ibaamɔn, see bitiŋkpikib nín nìn ŋáań tiŋyee ní bi dāa néeń ki pílfí. 5Ama sii ń ŋúb́ a-ba an kɔkɔ ní kí ŋmèè falaa kí tɔ̄ a-tundi din sá tibɔmɔntiil sòontamee; ŋá ditundi din sá Unimbɔti tɔntɔnliu tundee. 6Ama an yaa kíǹ mamee, ŋyunti bāań ḿ dū m-ba kí ŋá saraa, man kúm yuntiŋu bāań. 7M jáń kujamɔntiiu, m sáǹ ki bàn̄ ditaatandi kúntilaŋki ki gbíntì ki ŋúb́ m-fookiiu. 8Kɔŋkɔnnee dijajil paati tin bi tìì deedeedambee dɔ̄ ki cí-mi. Ti-Dindaan un sá ibaamɔn bɔsoonliuee di dàá dāá tīī-mi-tì ŋwiin dal, an kaa dāa sá man baba ní u dàá tīī, ama bin bin kɔkɔ néeń ki cí u-gítintamee. 9Á pɔ́ɔǹ kí dāan̄ m-cee malaa, 10di sá yii Deemasi dū-mi ki fá ki búntì Teesaalooniiki kun puee u néeń duulnya un poon ti bí nee tikpil. Kriiseensi búntì Gaalaati, ní Tiiti mun búntì Dalmasii. 11Luuki baba di péēkíǹ m-cee. A yaa dòońee, á kpáaǹní-mi Maarki kí cáań-mi, kun puee u ŋūǹ kí dāá tūtuǹ-mi m-tundi poon. 12M dū Tiisiiki ki tú Eefeesi. 13A yaa dòońee, á taa súntí kí kpáaǹní-mi m-bɔkutifɔkɔl din m nìn yāntìń Troowasi tiŋkin Karpusi ceeyee, kí kpáaǹní-mi m-takaldab, cilinjee takaldab bin sá tigbanee. 14Ucaa Aleeksandi ŋá-mi inikpiti tikpil, ti-Dindaan dàá dāá pà-u atuun ŋin u ŋée paati. 15A mun ń nīn nyíǹ-u, kun puee u nìn yíì kpataaa kaa là tibɔti tin ti sòoǹee. 16Bi nín péé péé ki cúú-mi ki cáá ibɔsoonee, báà ubɔ kaa yúl̀ m-boon, bi-kɔkɔ dū-mi ki fá ní. Unimbɔti ń taa dū kí ŋá-bi tibɔti. 17Ama ti-Dindaan yúl̀ m-boon ki tīī-mi mpɔn m ŋúń ki sòon̄ Unimbɔti bɔti mmɔntiimin ki yāntì bin kaa sá Juuda yabee kɔkɔ gbìl̄ tibɔti gbanti, ní m nyáń gbikinti nyɔkɔn. 18Ti-Dindaan dàá nīn péēnyāntí-mi tibɔkpitil kamaa poon míǹ ní kí dāá cáá-mi kí kɔ́ǹ yilpu beelin nì alaafiya. Úǹ di sá tinyooldaan kí nīn péē cá jaanjaan! Ameen. 19Á jāam̀ Prisiil nì Akilaasi nì Ɔneesiifɔɔr dicaŋku. 20Eerasti gbíntì Kɔranti ní Troofiim būǹ m yāntì u gbíntì Miilee. 21Á pɔ́ɔǹ a-ba kí bàń-mi kí wàatī tiwool yuntiŋu ń nín bàń. Eebulusi nì Pudansi nì Liinusi nì Kloodia nì nnabiyaamu kɔkɔ jáaḿ-si. 22Ti-Dindaan ń nīn bí a-cee. Unimbɔti ŋanti ń nīn bí ni-pu.

will be added

X\