TITUS 2

1Tapi anggo ho, hatahon ma, na domu hubani pangajaran na pintor in: 2Ojur ma dalahi na matua maruhur na torang, daulat, porman, sintong ibagas haporsayaon, ibagas holong pakon ibagas hasabaron. 3Sonai homa naboru na matua, marparlahou ma sidea songon halak na mapansing, ulang sipanukas, ulang homa hatagihan bani anggur, tapi sipodahkon na madear ma, 4ase tartogu-togu sidea naboru na poso ope mangkaholongi paramangonni ampa dakdanakni, 5porman, sopan, na bujur mamorluhon horja i rumah, unduk dompak paramangonni bei, ase ulang hona risa hata ni Naibata. 6Podahi homa dalahi na maposo, ase marhahormaton. 7Ia ho, ibagas haganup, maningon sitiruan ma ibagas horja namadear, pitah anjaha ringgas bani pangajarion; 8sihatahon podah na sintong, na seng dong sihataon, ase maila sipanlawan ai, halani seng dong na bajan sihatahononni dompak hita. 9Jabolon pe maningon balosanni do tuanni, pamalasonni uhurni ibagas haganup, ulang manlawan-lawan, 10ulang manangko, tapi ipatuduhkon ma haganup habujuron, ase marsangap pangajaran na humbani Naibata, Sipaluah hita, ibagas haganup. 11Ai domma mulgap idop ni uhur ni Naibata bahen haluahon ni haganup jolma. 12Iajari do hita marhiteihon idop ni uhurNi marnalangkon uhur na so daulat ampa hisap-hisap dunia on, ase iparlahouhon hita hapormanon, hapintoran, ampa hadaulaton i dunia on, 13sanggah na paima-imahon hita bani hatuahon na niaraphonta in pakon partalar ni hamuliaon ni Naibata na banggal in ampa Kristus Jesus, Sipaluah hita, 14na mamberehon diriNi manghophop hita, laho manobus hita humbani haganup hajahaton, anjaha urasonNi bani diriNi sada bangsa, ase Ia simadaSi, na mangkaringgashon sagala horja namadear. 15In ma hatahon, podahkon anjaha akimhon hubani halak humbani gok ni uhurmu. Ulang ma dong na mapas bam.

will be added

X\