ROM 16

1Huondoskon ma bani nasiam botouta si Poibe, siparugas i kuria Kenkerea, 2ase ijalo nasiam ia ibagas Tuhan in, songon na patut bani halak na mapansing, anjaha iurupi nasiam ia bani sagala horja, anggo porlu urupan. Ai na dob gabe sipangurupi do ia bani buei halak, age bakku pe. 3Padas nasiam ma tabingku bani si Priska ampa bani si Akila, hasomanku pangkorja ibagas Kristus Jesus, 4na ra mamberehon borgokni laho mangkophop ahu, gabe seng pitah ahu martarima kasih bani sidea, tapi haganup kuria na humbani sipajuh begu-begu. 5Tabingku homa bani kuria na martumpu i rumahni. Tabingku bani si Epenetus, haholongankin, bunga tubuh bani Kristus i Asia. 6Tabingku bani si Maria, na buei mangkalojahon nasiam. 7Tabingku bani si Andronikus ampa si Junias, hasomanku samarga anjaha hasomanku tartutup, sidear barita bani apostel-apostel in, anjaha na parlobei ibagas Kristus ase ahu. 8Tabingku bani si Ampliatus, na huhaholongi ibagas Tuhan in. 9Tabingku bani si Urbanus, hasomanta sahorja ibagas Kristus, sonai bani si Stakis, haholongankin. 10Tabingku bani si Apelles, na tahan ibagas Kristus. Tabingku bani hasoman sarumah ni si Aristobulus. 11Tabingku bani si Herodion, hasomanku samarga. Tabingku bani hasoman sarumah ni si Narkissus, na adong ibagas Tuhan in. 12Tabingku bani si Tripena ampa si Triposa, na ra loja halani Tuhan in. Tabingku bani si Persis, haholongan in, na ra loja tumang halani Tuhan in. 13Tabingku bani si Rupus, na pinilih ni Tuhan in, sonai bani inangni, na songon inang homa bakku. 14Tabingku bani si Asinkritus, si Plegon, si Hermes, si Patrobas, si Hermas, age bani sanina na rap pakon sidea. 15Tabingku bani si Pilologus, si Julia, si Nereus ampa botouni ai, bani si Olimpas ampa bani haganup hasoman ni sidea na pansing in. 16Marsitabian ma nasiam marhitei summah na mapansing. Padas tabi do bani nasiam ganup kuria ni Tuhan in. 17Hupaingat ma nasiam, saninangku, jaga ma nasiam bani halak, na mambahen parsalisihan ampa parsangsian marhitei na manlawan podah, na dob jinalo nasiam. Padaoh nasiam ma dirinasiam humbani sidea. 18Ai halak na sonai, sedo Tuhanta Kristus in na binalosanni ai, tapi boltokni do, anjaha marhitei sahap na lampot-lampot ampa na mantin-mantin ipaoto-oto sidea do halak paruhur na saluju. 19Na tarbarita do age ija pambalosionnasiam, anjaha malas do uhurhu pasal ai. Tapi huparsinta do ase pentar ma nasiam pasal na madear, anjaha pitah dompak na masambor. 20Tapi Naibata Pardamei in podas do ropukanni sibolis hu toruh ni naheinasiam. Idop ni uhur ni Tuhanta Jesus Kristus ma mangkasomani nasiam! 21Manongos tabi do bani nasiam si Timoteus, hasomanku sahorja, sonai si Lusius, si Jason ampa si Sosipater, hasomanku samarga. 22Mangkatahon tabi bani nasiam ibagas Tuhan in, ahu si Tertius, sisurat surat on. 23Mangkatahon tabi bani nasiam si Gayus, na manamuei ahu ampa haganup kuria in, sonai homa si Erastus, bendahara kota in, ampa si Kuartas, sanina in. 24Idop ni uhur ni Tuhanta Jesus Kristus ma mangkasomani nasiam ganup! Amen. 25Tapi Bani ma, na boi margogohi nasiam, domu hubani Ambilan Namadear na huambilankon ampa barita pasal Jesus Kristus, domu hubani pangungkabon ni rusia in, na pinonophon humbani na basaia, 26tapi domma ipatalar anggo nuan, anjaha marhitei surat ni nabi-nabi ipabotohkon bani sagala bangsa, domu hubani tonah ni Naibata na manongtong in, laho mamboan sidea hu haporsayaon ampa pambalosion: 27Bani Naibata parhapentaran na sasada in ma hasangapon ronsi sadokah ni dokahni marhitei Jesus Kristus! Amen.

will be added

X\