ROM 14

1Anju nasiam ma na galek marhaporsayaon, ulang ma marsalisih pasal pingkiran. 2Porsaya do na sada boi panganonni haganup, tapi na galek ai sayur-sayuran do hansa ipangan. 3Na mangankon ulang ma mapas uhurni bani na so mangankon; anjaha na mangorom pe ulang ma iuhum-uhumi na mangankon, ai na dob ijalo Naibata do age ia. 4Ai ise do ham, mambahen na iuhumi ham jabolon ni halak na legan? Marguru bani tuanni do ia, atap na jongjong ia barang na tompas. Tapi totap do ia, ai tarpatotap Tuhan in do ia. 5Bani uhur ni na deba, marsisurungan do ari, bani uhur ni na legan, dos do ari in. Ganup ma marsijoloman bani hatengeran ni uhurni bei. 6Na papansing ari in, bani Tuhan in ma ipapansing in: na mangankon, halani Tuhan in ma ipangan, ai bani Naibata do ia martarima kasih; anjaha na mangorom, halani Tuhan ma ia mangorom, anjaha bani Naibata ma ia martarima kasih. 7Ai ganup hita seng manggoluh bani dirinta, anjaha ganup hita seng matei bani dirinta. 8Ai manggoluh pe hita, manggoluh bani Tuhan in do, anjaha matei pe hita, matei bani Tuhan in do. Ase manggoluh barang matei pe hita, tong do bani Tuhan in hita. 9Ai ase matei pe Kristus anjaha mulak manggoluh, ase Ia do Tuhan ni na matei age na manggoluh. 10Ia ham, mase ma uhum-uhumonmu hasomanmu, anjaha mase ma mapas uhurmu bani hasomanmu? Ai lang haganup do hita maningon jongjong i lobei ni paratas ni Naibata? 11Ai tarsurat do: Na manggoluh do Ahu, nini Tuhan. Bangku do manrogop sagala towod, anjaha sagala dilah mangakui Naibata. 12Ase ganup do hita marbalos pasal dirinta bei i lobei ni Naibata. 13Ase ulang be hita marsiuhum-uhuman! Tapi dearan ma naputushon, ulang be nabahen partolsuan atap parsangsian bani sanina. 14Torang do hubotoh marhitei Tuhan Jesus, na so adong na butak hinan, tapi gabe butak do ai bani na mangahapkon ai butak. 15Ai anggo ipusoki ham uhur ni hasomanmu marhitei na pinanganmu, seng be mardalan ibagas holong ham. Ulang ma magou hasomanmu halani sipanganon, ai na dob matei do Kristus manghophopsi. 16Ulang ma na madear ai bani nasiam, gabe sirisaon ni halak. 17Ai sedo sipanganon barang siinumon harajaon ni Naibata, tapi hapintoran ampa damei ampa malas ni uhur do ibagas Tonduy Napansing. 18Ai anggo pambalosi ham bani Kristus pasal ai, harosuh ni Naibata ma ham anjaha harga bani jolma. 19Halani ai parayak hita ma na padameihon ampa na patorsa-torsahon hita samah hita! 20Ulang ma parseda horja ni Naibata halani sipanganon. Haganup do namin pansing, tapi gabe hasedaon do ai bani sada halak, anggo sangsi ia ibagas na mangankon ai. 21Dearan ma, ulang mangan gulei, ulang minum anggur, atap mangkorjahon aha pe, anggo mambahen parsangsian do ai bani hasomanmu. 22Ia adong pe haporsayaonmu, bamu ma ai i lobei ni Naibata. Martuah ma halak, na so mansalahkon dirini be, pasal na dob hinadearhon ni uhurni. 23Ise na sangsi, tapi ipangan do, domma hona uhum, halani seng humbani haporsayaon ai. Ai sagala na so tubuh humbani haporsayaon, dousa do.

will be added

X\