PANGUNGKABON 8

1Sanggah ibuha lak na papituhon ai, sip ma haganup i nagori atas tar satongah jam dokahni. 2Jadi huidah ma malekat na pitu ai, na jongjong i lobei ni Naibata, anjaha ibere ma bani sidea pitu tarompit. 3Dob ai roh ma sada malekat na legan jongjong hu lambung ni anjap-anjap panggalangan ai, manjolom sada pardahupaan omas. Ibere ma bani buei dahupa, ase igalangkon ai mangurupi tonggo ni halak na pansing bani anjap-anjap omas ai i lobei ni paratas ai. 4Gabe naik ma timus ni dahupa ai mangurupi tonggo ni halak na pansing, humbani tangan ni malekat ai hu lobei ni Naibata. 5Dob ai ibuat malekat ai ma pardahupaan ai anjaha igoki ma ai bani apuy na humbani anjap-anjap ai, anjaha igijigkon ma ai hu tanoh; jadi masa ma longgur, sora, hilap pakon lalou. 6Jadi marugas ma sipitu malekat ai, na manjolom tarompit na pitu ai, laho manompul ai. 7Gabe isompul malekat na parlobei ai ma tarompitni, jadi masa ma sira-sira pakon apuy marsaor daroh; iuseihon ma ai hu tanoh, gabe mosog ma sapartolu ni tanoh pakon sapartolu ni hayu, anjaha mosog ma homa haganup poyon-poyon na maratah. 8Dob ai isompul malekat na paduahon ai ma tarompitni, gabe adong ma songon dolog na banggal anjaha na gara igijigkon hu laut; gabe daroh ma sapartolu ni laut in, 9lanjar matei ma sapartolu ni na tinompa na manggoluh i laut, anjaha maseda sapartolu ni sagala kapal. 10Dob ai isompul malekat na patoluhon ai ma tarompitni, gabe madabuh ma hun langit sada bintang na banggal, na gara songon suluh, lanjar idabuhi ma sapartolu ni bah mardalan pakon bah tubuh. 11Ia goran ni bintang ai Apsintos (hapaeton) do; gabe paet ma sapartolu ni bah in, lanjar matei ma buei jolma ibahen bah na gabe mapaet ai. 12Dob ai isompul malekat na paompathon ai ma tarompitni, gabe hona bogbog ma sapartolu ni mataniari pakon sapartolu ni bulan ampa sapartolu ni bintang, gabe golap ma sapartoluni bei, gabe seng marsinondang be sapartolu ni arian, sonai age borgin. 13Dob ai mangkawah ma ahu, gabe hubogei ma sada manuk-manuk nanggordaha habang i tongah langit, na marsora na maling mangkatahon: Bursik, bursik, bursik ma sagala na mangianhon tanoh in, pangkorhon ni sora na tading ai ope, ai ma tarompit ni malekat na tolu nari, na sihol manompul tarompit ope.

will be added

X\