PANGUNGKABON 4

1Dob salpu ai, mangkawah ma ahu, jadi tonggor ma, tarbuka ma sada labah i nagori atas. Anjaha sora na hubogei bani mulani ai, na marsora songon sora ni tarompit hubakku, nini ma: Naik ma ho hujon, ase Hupatuduhkon bam na maningon laho masa, dob salpu on. 2Jadi mintor ibagas Tonduy ma ahu, anjaha tonggor ma, adong do sada paratas i nagori atas, anjaha adong do na hundul bani paratas ai. 3Ia rupaNi na hundul ai songon intan jaspis pakon sardis do. Dong do sada halibitongan manliotisi paratas ai songon intan samarah rupani. 4Inggot paratas ai adong do dua puluh ompat hotak, hundulan ni dua puluh ompat sintua, na marhiou silopak anjaha marsortali omas bani ulu ni sidea. 5Anjaha luar do humbani paratas ai hilap ampa sora pakon longgur. Gara do pitu suluh i lobei ni paratas ai, ai ma na pitu Tonduy ni Naibata. 6I lobei ni paratas ai adong ma songon laut kasa usih songon kristal. I tongah-tongah ni paratas ai pakon inggotni ai, adong do ompat pargoluh, parmata na buei i lobei ampa i pudi. 7Pargoluh na parlobei ai usih do songon singa, pargoluh na paduahon songon lombu jonggi, pargoluh na patoluhon marbohi songon jolma, anjaha na paompathon usih songon manuk-manuk nanggordaha na habang. 8Ganup pargoluh na ompat ai marhabong do onom bei; marmata na buei inggot ampa ibagas. Seng marsaran sidea arian borngin manghatahon: Na pansing, na pansing, na pansing do Tuhan Naibata, Sigomgom haganupan, na dob dong hinan, na dong nuan pakon na laho roh. 9Siap hali, sanggah ibere pargoluh ai hasangapon pakon hamuliaon pakon tarima kasih bani na hundul i atas paratas ai, na manggoluh ronsi sadokah ni dokahni, 10manrogop ma na dua puluh ompat sintua ai i lobei ni na hundul bani paratas ai, isombah ma Ia na manggoluh sadokah ni dokahni, itibalhon ma sortali ni sidea hulobei ni paratas ai, anjaha ihatahon ma: 11Ham Tuhan Naibatanami, na talup do ham manjalo hasangapon, hamuliaon pakon hagogohon, ai Ham do na manompa sagala na dong; humbani rosuhmu do ase manjadi in haganup anjaha tartompa.

will be added

X\