PANGUNGKABON 19

1Dob salpu ai hubogei ma sora na gogoh humbani humpulan banggal i nagori atas, mangkatahon: Haleluya! Haluahon pakon hasangapon ampa hagogohon, Naibatanta do simada ai, 2Ai sintong anjaha pintor do uhumni; ai domma iuhumi boru jalang na banggal ai, na dob mangagou tanoh in marhitei parriah-riahonni, anjaha ibalashon do hubani daroh ni juak-juakni 3Dob ai ihatahon sidea ma paduahalihon: Haleluya! Anjaha naik do timusni ai ronsi sadokah ni dokahni. 4Jadi manrogop ma sintua na dua puluh ompat ai pakon pargoluh na ompat ai marsombah bani Naibata, na hundul bani paratas ai, nini: Amen! Haleluya! 5Anjaha roh ma sada sora humbani paratas ai, mangkatahon: Puji nasiam ma Naibatanta, nasiam haganup juak-juakni, na mangkabiariSi, na etek age na banggal! 6Jadi hubogei ma songon sora ni jolma mabuei, songon sora ni buei bah banggal, songon sora ni longgur na gogoh, manghatahon: Haleluya! Ai domma manrajai Tuhan Naibatanta, Sigomgom haganup. 7Marmalas ni uhur ma hita anjaha marolob-olob, anjaha bere hita ma hasangapon Bani! Ai jumpah ma pesta parunjukon ni Anak ni Biri-biri in, domma sirsir parinangonni. 8Domma ibere hubani hiou putih na borsih sipaheionni. Ia hiou putih ai, ai ma horja hapintoran ni halak na mapansing. 9Anjaha nini ma hubakku: Surathon ma: Martuah do na niontang bani pesta parunjukon ni Anak ni Biri-biri in. Dob ai ihatahon ma hubakku: Hata on tongon do hata humbani Naibata. 10Jadi manrogop ma ahu i lobei ni naheini laho manombahsi, tapi nini ma dompak ahu: Ulang sonin, hasomanmu juak-juak do ahu anjaha hasoman juak-juak ni saninamu, na manjolom hasaksian ni Jesus. Naibata do sisombahonmu! Ai hasaksian ni Jesus, ai ma tonduy ni panjahaion. 11Dob ai huidah ma mungkab nagori atas, anjaha tonggor ma, sada huda na putih, anjaha na mangajak ai margoran do Haposan anjaha Parsintong, anjaha ibagas hapintoron do Ia manguhumi anjaha mamorang. 12Songon gara ni apuy do matani, anjaha buei do sortali bani uluni; adong do goranni tarsurat, na so binotoh ni age ise, sobali Ia sandiri. 13Ipakei do hiou na nironjamhon bani daroh anjaha goranNi ai ma: Hata ni Naibata. 14Mangihut do Bani sagala bala na i surga mangajak huda putih. Hiou na putih anjaha na borsih do pakeian ni sidea. 15Mandarat do humbani pamanganni podang na marot, sitampulhononni bani bangsa-bangsa. Parmahanonni ma sidea marhitei tungkot bosi, anjaha Ia do mandogei pangilangan anggur ni ringis banggal ni Naibata, Sigomgom haganup. 16Tarsurat do goranni bani hiouNi pakon binongeiNi: Raja ni sagala raja anjaha Tuhan ni sagala tuan. 17Dob ai huidah ma sada malekat jongjong ibagas mata ni ari, anjaha mandilohon marhitei sora na gogoh bani manuk-manuk na i awang-awang na gijang in: roh ma hanima martumpu bani pesta mangan-mangan bolon ni Naibata. 18laho manganhon daging ni raja-raja, daging ni puanglima pakon halak na gogoh, daging ni sagala huda pakon daging ni na mangajaksi, daging ni sagala halak na mardeka pakon jabolon, age na etek age na banggal. 19Jadi huidah ma binatang ai ampa raja-raja ni tanoh on rap pakon bala ni sidea martumpu laho marmunsuh dompak na mangajak huda ai pakon balani. 20Gabe tartangkap ma binatang ai rap pakon nabi sipakulah-kulah ai, na dob mambahen tanda-tanda i lobeini, parhiteianni paoto-otohon sagala na manjalo tanda ni binatang ai pakon na manombah gambaranni. Manggoluh do na dua ai idabuhkon hu laut apuy na gajag marhasoman hirtah. 21Ia na tading ai ibunuh do marhitei podang na kaluar humbani pamangan ni na mangajak huda ai, gabe bosur ma sagala manuk-manuk ibahen daging ni sidea.

will be added

X\