PILIPPI 3

1Ambah ni ai, nasiam sanina, marmalas ni uhur ma nasiam ibagas Tuhan in! Manurathon in hun gati bani nasiam, seng borat uhurhu, ai patotap uhur nasiam do in. 2Jaga ma nasiam bani baliang, jaga bani parhorja na jahat, jaga bani parsunaton na lepak! 3Ai hita do siparsunat na tongon, siparsombah ibagas Tonduy ni Naibata siparmegah-megah ibagas Kristus Jesus, na so martenger ni uhur bani daging, 4porini pe adong do namin sipangunsagahkononku ibagas daging. Ai anggo adong halak na legan, na mangagan adong sipangunsagahkononni ibagas daging, ahu bueinan: 5Tarsunat bani ari paualuhkon, marasal humbani halak Israel, humbani marga Benjamin, halak Heber anjaha tubuh humbani halak Heber, halak Parisei mangihutkon titah in, 6garang mardakdaki kuria in, seng dong sihataon ibagas hapintoran mangihutkon titah. 7Tapi paruntungan hinan pe bakku, harugian do in huhira halani Kristus. 8Tongon haganup do harugian huhira marimbang hamuliaon ni panandaion bani Kristus Jesus, Tuhankin. MarhalaniSi harugian do bakku ganupan ai, anjaha tompoh-tompoh do ai huhira, ase bakku Kristus, 9ase ibagas Ia ahu jumpah, seng marhapintoran sandiri marhitei titah, tapi marhitei haporsayaon ibagas Kristus do, ai ma hapintoran na humbani Naibata, maronjolan bani haporsayaon, 10ase hutanda Ia ampa hagogohon ni parpuhoonNi ai ampa hasadaon bani sitarononNi ai, gabe songonSi ibagas parmateiNi, 11andohar das ahu hubani parpuhoon humbani na matei. 12Seng ope, na dob jumpah ahu ma ai, atap na dob gokan dear ma ahu; tapi sai huparayak do ase jumpah ahu, halani na dob tinangkap ni Kristus Jesus ahu. 13Nasiam sanina, lape huhira, na dob jumpah ahu ai, tapi on do tene: Huhalupahon do na i pudingku, huparayak na i lobeihu, 14dompak tujuan ai do hupojong, dompak upah hamonangan ni pandiloon na humbabou, na humbani Naibata ibagas Kristus Jesus. 15Barang piga hita na gokan dear, in ma paruhurhon hita; anjaha anggo legan ope pingkiran nasiam pasal atap aha pe, age ai patalaron ni Naibata do bani nasiam. 16Asal ma torus dalani hita dalan na dob nidalananta. 17Nasiam sanina, usihi nasiam ma ahu, anjaha pardiatei nasiam ma na marparlahou songon hanami, siusihan nasiam. 18Ai buei do na marparlahou, gabe munsuh ni silang ni Kristus; anjaha pasal sidea domma gati huhatahon bani nasiam, anjaha anggo sonari marhasoman iluh do huhatahon bani nasiam. 19Hamagouan do ujung ni sidea, boltokni do iparnaibata, sihamelahononkon do ihasangapkon, anjaha na i tanoh on iparuhurhon. 20Ai warga nagori atas do hita, hunjai do ipaima-ima hita Sipaluah hita, in ma Tuhanta Jesus Kristus in. 21PaubahonNi do angkulanta na dorun on, gabe doshon angkulaNi na sangap in, domu hubani hagogohonNi, na boi patundukkon haganupan ai Bani.

will be added

X\